Nəticələr uğurlu olacaqdır!

Bakı:

25 °C

61 %

10 m/s

Əlaqə

AZ RU EN

Ana səhifə / Arxiv / Nəticələr uğurlu olacaqdır!

Nəticələr uğurlu olacaqdır!

20.05.2026 [10:57]

Son illərdə Azərbaycan siyasi, iqtisadi, ekoloji və idman sahələrini əhatə edən bir sıra mötəbər beynəlxalq tədbirlərin keçirildiyi məkana çevrilib. Bu cür tədbirlərin keçirilməsi ölkəmizin beynəlxalq platformalardakı rolunun artdığını və regional bir mərkəzə çevrildiyini bir daha nümayiş etdirir.

Bu il mayın 17-dən başlayaraq ölkəmizdə keçirilən Birləşmiş Millətlər Təşkilatının ən nüfuzlu qlobal urbanizasiya platformalarından biri olan Ümumdünya Şəhərsalma Forumunun 13-cü Sessiyası COP 29-dan sonra ikinci ən böyük beynəlxalq tədbirdir.

Ümumdünya Şəhərsalma Forumunun 13-cü Sessiyasında Möhtərəm Prezident İlham Əliyev cənabları çıxışında bildirdi ki, bu il mənim Sərəncamıma əsasən “Şəhərsalma və Memarlıq İli” elan edilmişdir. Mən bu tədbirin təşkilinə verilən dəstəyə, əməkdaşlığa və Forumun 13-cü Sessiyasına ev sahibliyi etmək üçün bu cür çox məsuliyyətli vəzifənin bizə həvalə edildiyinə görə təşəkkürümü bildirmək istəyirəm. 2022-ci ildən etibarən biz BMT-nin Məskunlaşma Proqramı ilə Azərbaycanda, uzun illər işğal altında olmuş şəhərlərdə -Ağdamda, Zəngilanda və Xankəndidə üç milli şəhərsalma forumlarını keçirmişik.

Dövlət Başçısı qeyd etdi ki, Bakıda keçirdikləri bu günlər ərzində bir çox qonaqlarımız, ilk dəfə səfər edən qonaqlar ölkəmizi daha yaxşı tanıyacaqlar və Azərbaycanda şəhərsalma sahəsində görülən işlərlə daha yaxından tanış olacaqlar. Azərbaycanın Avropa ilə Asiya arasında yerləşdiyini vurğulayan Dövlət Başçısı bunun bizim memarlığımızda da öz təzahürünü tapdığını qeyd etdi. Bildirdi ki, Bakı həm qədimlik, həm yenilik, həmçinin tarixi irsin qorunması, həm müasir üslubda şəhərsalmanın inkişafı baxımından aydın şəkildə onu göstərir ki, bizim ulu babalarımızın istedadı olub, tarixi və memarlıq irsimizi qoruyub saxlayırıq. Şəhərsalma nəinki Bakı üçün, bir çox Azərbaycan şəhərləri üçün elə bir məsələdir ki, biz gündəlik əsaslarla onun üzərində işləyirik. “Nəinki Bakı, o cümlədən Azərbaycanın bir çox qədim şəhərləri öz memarlığı ilə fərəhlənə bilər. Mən onlardan bəzilərini qeyd edəcəyəm” söyləyən Möhtərəm Prezident İlham Əliyev diqqəti vaxtilə Şirvanşahlar dövlətinin paytaxtı olan və XIV əsrdə yazıb-yaratmış dahi Azərbaycan şairi Nəsiminin doğulduğu yerə - Şamaxıya yönəldərək burada 743-cü ildə tikilmiş dünyanın ən qədim məscidlərindən birinin olduğunu vurğuladı. Bununla yanaşı, bir vaxtlar Atabəylər dövlətinin paytaxtı olan, dahi memar Əcəmi Naxçıvaninin vətəni Naxçıvanda onun tikdiyi XII əsrə aid Möminə xatun türbəsindən bəhs etdi. Dünyanın ən qədim şəhərlərindən biri olan, XII əsrdə yaşayıb-yaratmış digər dahi Azərbaycan şairi Nizami Gəncəvinin vətəni Gəncənin bu gün Bakı kimi inkişaf etdiyini, tarixi simasını qoruduğunu vurğulayan Prezident İlham Əliyev cənabları, həmçinin Qafqaz Albaniyası dövlətinin paytaxtı Qəbələdə və əsas şəhərlərdən biri olan Şəkidə çoxsaylı tarixi abidələrin olduğunu da tədbir iştirakçılarının diqqətinə çatdırdı. Eyni zamanda, bildirdi ki, 30 il ərzində işğal altında qalan Qarabağın tacı Şuşa indi sıfırdan yenidən qurulur və onun zədələnmiş qalası bərpa edilib.

Hökumətimizin qarşısında duran əsas vəzifələrdən birinin Qarabağın və Şərqi Zəngəzurun yenidən qurulmasını diqqətə çatdıran Ölkə Rəhbəri bildirdi ki, bu ərazi 30 il müddətində erməni işğalı altında idi və tamamilə dağıdılaraq məhv edilmişdir. Beynəlxalq müşahidəçilər və ziyarətçilər Ağdamı Xirosima ilə müqayisə edirdilər, onlar Ağdamı “Qafqazın Xirosiması” adlandırırdılar. Çünki şəhər, sadəcə, mövcud deyildi. Şəhər tamamilə yerlə-yeksan edilmişdir və o, Xirosimadan fərqli olaraq, atom bombasının atılması nəticəsində bir günə bu vəziyyətə düşməmişdir. Bu, 30 illik işğal ərzində edilmişdir və bu zaman binalar, tarixi binalar və ictimai binalar, evlər tamamilə sökülərək dağıdılmışdır.

Beləliklə, hazırda Böyük Qayıdış Proqramı həyata keçirilir, şəhər və kəndlərin Baş planları hazırlanır. Mən, əlbəttə ki, çox rəqəm gətirə bilərəm, lakin yalnız ikisini qeyd edim. Artıq 5 il ərzində çəkdiyimiz tunellərin uzunluğu 70 kilometrdir. Digər beşi də tikiləcək. 500 körpüdən 435-i inşa olunub. Bununla yanaşı, elektrik stansiyaları, su təchizatı kəmərləri, su anbarları, evlər, məktəblər, xəstəxanalar, üç beynəlxalq hava limanı tikilib, dəmir yolları çəkilib. Bütün bunlar cəmi beş il ərzində inşa olunub.

Qeyd edək ki, WUF13 çərçivəsində ilk dəfə olaraq Liderlər Sammitinin keçirilməsi isə rəsmi Bakının həm də ictimai-siyasi məsələlərin müzakirə olunduğu sabit məkan olduğunu əks etdirir. Hazırda dünyanın müxtəlif bölgələrində davam edən kəskin münaqişələr və artan geosiyasi risklər fonunda Azərbaycanın dünyanın fərqli nöqtələrindən dövlət və hökumət başçılarını, yüksək səviyyəli nümayəndələri bir yerə toplaması, onları sabitlik, dayanıqlı inkişaf, həmrəylik platforması ətrafında birləşdirməsi müasir dünya üçün yeni bir nümunə deməkdir.

Bəli, bu gün Azərbaycan ona həvalə edilmiş məsuliyyətli missiyanı uğurla davam etdirir və inanırıq ki, Ümumdünya Şəhərsalma Forumunun 13-cü sessiyasının nəticələri uğurlu olacaqdır.

Polad Ağakişiyev
YAP Qazax rayon təşkilatının məsləhətçisi

Paylaş:

Baxılıb: 130 dəfə