Azərbaycanın strateji xətti dünyaya nümunədir

Bakı:

22 °C

49 %

1 m/s

Əlaqə

AZ RU EN

Ana səhifə / Arxiv / Azərbaycanın strateji xətti dünyaya nümunədir

Azərbaycanın strateji xətti dünyaya nümunədir

06.05.2026 [18:07]

4 may 2026-cı il tarixdə Azərbaycan Respublikasının Prezidenti İlham Əliyev tərəfindən Ermənistanın paytaxtı İrəvan şəhərində keçirilən “Avropa Siyasi Birliyi Zirvəsi”nin 8-ci toplantısında videobağlantı vasitəsilə səsləndirilən çıxış yalnız diplomatik bəyanat deyildi. Bu, Azərbaycanın gələcəyə baxışını, sülh strategiyasını və prinsipial mövqeyini açıq şəkildə nümayiş etdirir. Uzun illər qarşıdurma şəraitində yaşamış iki ölkə arasındakı münasibətlər yeni mərhələyə, qarşılıqlı əməkdaşlığa qədəm qoyur.

Tarix göstərir ki, müharibədə qalib gələn tərəflər adətən öz şərtlərini diktə etməyə çalışır. Lakin Azərbaycan bu stereotipi qırdı. Prezident İlham Əliyevin çıxışında vurğuladığı əsas mesajlardan biri məhz bu idi ki, qalib olmasına baxmayaraq, Azərbaycan qarşı tərəfə əməkdaşlıq və birgə inkişaf təklif edib.

Bu yanaşma humanism ilə yanaşı uzaqgörən dövlətçilik strategiyasıdır. Artıq doqquz aydır regionda nisbi sabitliyin qorunması, dialoqun davam etməsi və praktiki addımların atılması sübut edir ki, seçilmiş yol real nəticələr verir. Dövlət başçısının vurğuladığı kimi, bu Azərbaycan və Ermənistan arasında sülhün real olmasının aydın göstəricisidir. Biz cəmi doqquz aydır ki, sülh şəraitindəyik və sülhdə yaşamağı öyrənirik.

Xüsusilə Ağ Evdə imzalanmış və Donald Trampın şahidliyi ilə təsdiqlənmiş birgə bəyannamə bu prosesdə dönüş nöqtəsi kimi qiymətləndirilir. Bu sənəd tərəflər arasında etimadın formalaşmasına mühüm təkan verdi.

Siyasi razılaşmalar nə qədər vacibdirsə, iqtisadi əlaqələr də bir o qədər həlledicidir. Ölkə başçısının çıxışında qeyd etdiyi kimi, Azərbaycanın Ermənistana 12 min ton neft məhsulu ixrac etməsi artıq yeni mərhələnin başlanğıcını göstərir. Ümumiyyətlə, indiyə qədər Azərbaycan Ermənistana ərazisi vasitəsilə 28 min ton yük çatdırıb.

Uzun illər qarşıdurma şəraitində yaşamış iki ölkə üçün bu, sadəcə ticarət deyil - bu, etimadın praktiki formasıdır. Enerji əməkdaşlığı isə regionda sabitliyin əsas sütunlarından birinə çevrilə bilər.

Prezident İlham Əliyevin çıxışında diqqət çəkən məqamlarından biri də Avropa Parlamenti ilə bağlı səsləndirilən tənqidi fikirlər idi. Dövlət başçısı açıq şəkildə bildirdi ki, bu qurum sülh prosesinə dəstək vermək əvəzinə, tez-tez qərəzli və birtərəfli qərarlarla çıxış edir. Avropa Parlamenti və Avropa Şurası Parlamenti Assambleyası Ermənistan və Azərbaycanın sülh prosesində ikili standartları nümayiş etdirir.

Qəbul edilmiş çoxsaylı qətnamələr Azərbaycanın mövqeyini əks etdirmir. Ölkə başçısının qeyd etdiyi kimi, bu yanaşmanın əsas səbəbi Azərbaycanın öz suverenliyini və ərazi bütövlüyünü bərpa etməsidir.

Azərbaycan isə bu cür təzyiqlərə qarşı ardıcıl və prinsipial mövqe nümayiş etdirir. Milli Məclis tərəfindən qəbul edilən son qərarlar da bunu bir daha təsdiqləyir. Bu addımlar ölkənin suveren hüquqlarını qorumağa və milli maraqları müdafiə etməyə yönəlib.

Azərbaycanın xarici siyasəti bu gün balanslı, müstəqil və qətiyyətli xətt üzərində uğurla inkişaf edir. Ölkə heç bir xarici təsir qarşısında geri çəkilmir və eyni zamanda regionda əməkdaşlıq üçün açıq platforma yaradır.

Prezident İlham Əliyevin ortaya qoyduğu siyasi xətt təkcə region üçün deyil, qlobal səviyyədə də diqqətəlayiq modeldir. Bu model sülhə açıq olmaq, əməkdaşlığı təşviq etmək, milli maraqları qətiyyətlə qorumaq, prinsipləri üzərində qurulub.

Məhz bu tarazlıq Azərbaycanın həm regionda sabitliyin təminatçısına, həm də beynəlxalq arenada etibarlı tərəfdaşa çevrilməsini təmin edir.

Azərbaycan bu gün yalnız qalib ölkə deyil — həm də sülhü seçən, gələcəyi düşünən və beynəlxalq münasibətlərdə yeni yanaşma formalaşdıran dövlətdir. Bu yanaşma isə getdikcə daha çox ölkə üçün nümunəyə çevrilir.

Prezident İlham Əliyevin çıxışında vurğuladığı kimi, prosesə mane olmaq istəyənlərin bütün səylərinə baxmayaraq, Azərbaycan sülh gündəliyinə sadiqdir və ermənistanlı həmkarlarının şərhləri bunu aydın şəkildə göstərir.

Qadir İbrahimov

Yeni Azərbaycan Partiyası Culfa rayon təşkilatının sədri

Paylaş:

Baxılıb: 143 dəfə