Azərbaycanın əbədi lideri

Bakı:

17 °C

77 %

4 m/s

Əlaqə

AZ RU EN

Ana səhifə / Arxiv / Azərbaycanın əbədi lideri

Azərbaycanın əbədi lideri

05.05.2026 [10:14]

Hər bir xalqın tarixində unudulmayan hadisələr çox, dahi şəxsiyyətlər isə az olur. Belə şəxsiyyətlər həmişə tərəqqiyə xidmət edən ali məqsədlər uğrunda gedən mübarizənin bayraqdarı olub, siyasi fürsətlərdən xalqının xoşbəxt gələcəyi naminə məharətlə, müdrikliklə istifadə edib, gələcəyə doğru inamla addımlayıblar. Tarixi faktlar göstərir ki, şəxsiyyətlərin gücü, siyasi iradəsi və müdrikliyi xalqın taleyində əvəzsiz rol oynayır. Heydər Əliyev Azərbaycanın müasir dövlətçiliyinin banisi kimi xalqın qəlbində daim yaşayır.

Qeyd etmək lazımdır ki, Heydər Əliyevin fəaliyyəti yalnız siyasi hakimiyyətlə məhdudlaşmamış, o, Azərbaycan xalqının milli-mədəni irsini qoruyub, ölkənin sosial-iqtisadi inkişafını təmin etmişdir. 1969-cu ildə respublika rəhbərliyinə gəldiyi ilk gündən Ümummilli Lider xalqın enerjisini, milli müstəqillik duyğularını reallaşdırmaq üçün böyük işlər görmüşdür. O, sosial-iqtisadi böhran yaşayan Azərbaycanı keçmiş İttifaqın qabaqcıl respublikalarından birinə çevirmişdir. Ulu Öndər rəhbərliyində Azərbaycanda yüzlərlə yeni müəssisə və istehsalat sahələri yaradılmış, elektronika, elektrotexnika, radiotexnika və cihazqayırma sənayesi inkişaf etmişdir. Bu dövrdə ölkədə iqtisadi tərəqqi ilə yanaşı, sosial sabitlik və milli həmrəylik də təmin edilmişdir. Heydər Əliyev yalnız iqtisadi deyil, həm də siyasi sahədə uğurlu fəaliyyət göstərmişdir. Onun müdrik siyasəti xalqın dövlətçiliyə olan etibarını artırmış, ölkədə ictimai-siyasi stabilliyi möhkəmləndirmişdir.

Heydər Əliyevin ikinci dəfə hakimiyyətə qayıdışı Azərbaycan xalqının xilaskarı missiyasını həyata keçirdi. 1993-cü ilin iyun ayında xalq onu yenidən ölkəni idarə etməyə çağırdı. O, vətəndaş müharibəsi təhlükəsini aradan qaldırdı, ictimai-siyasi sabitliyi təmin etdi və itirilməkdə olan dövlət müstəqilliyini qorudu. Ümummilli Liderin həyata keçirdiyi təxirəsalınmaz tədbirlər nəticəsində Azərbaycanın beynəlxalq imici bərpa edildi, iqtisadi inkişaf üçün mühüm baza yaradıldı. 1994-cü ildə “Əsrin müqaviləsi”nin imzalanması Azərbaycanın beynəlxalq aləmdə strateji mövqeyini möhkəmləndirdi. 1995-ci ildə qəbul edilən Konstitusiya ölkədə insan hüquq və azadlıqlarının qorunmasına yeni bir mərhələ açdı. 1998-ci ildə ölüm hökmünün ləğv edilməsi ölkədə hüquqi islahatların bariz nümunəsi oldu. Ümummilli Liderin siyasi fəaliyyətinin mərkəzində azadlıq, demokratiya, iqtisadi tərəqqi və sosial ədalət dayanırdı.

Heydər Əliyev yalnız ölkənin daxili siyasətində deyil, həm də xarici siyasətdə Azərbaycanın milli maraqlarını qoruyub. Onun həyata keçirdiyi strategiya bu gün Prezident İlham Əliyev tərəfindən uğurla davam etdirilir. Azərbaycan beynəlxalq aləmdə etibarlı tərəfdaş, regional güc və sürətlə inkişaf edən ölkə kimi tanınır. Ulu Öndərin ideyaları və siyasəti Azərbaycan xalqının tarixi qürur mənbəyinə çevrilmişdir. Onun yaratdığı dövlətçilik ənənələri və prinsipial siyasət Prezident İlham Əliyev tərəfindən daha da möhkəmləndirilir. Bu gün Azərbaycan xalqı öz dövlətinin güclü və etibarlı əllərdə olduğunu görür.

Ən əsası, Müstəqil Azərbaycanın memarı və qurucusu Heydər Əliyevin adı Azərbaycanın özü qədər əbədi olacaq, onun parlaq ideyaları gələcəyimizə daim nur saçacaq!

Arif Kərimov,

YAP Göygöl rayon təşkilatı üzrə Göygöl rayon Təhsil Sektoru ərazi partiya təşkilatının üzvü, partiya veteranı

Paylaş:

Baxılıb: 268 dəfə