BMT xəbərdarlıq edir: Reklamda süni intellektdən istifadə dezinformasiya böhranını dərinləşdirə bilər

Bakı:

17 °C

67 %

2 m/s

AZ RU EN

Ana səhifə / Arxiv / BMT xəbərdarlıq edir: Reklamda süni intellektdən istifadə dezinformasiya böhranını dərinləşdirə bilər

BMT xəbərdarlıq edir: Reklamda süni intellektdən istifadə dezinformasiya böhranını dərinləşdirə bilər

01.05.2026 [19:23]

Birləşmiş Millətlər Təşkilatı xəbərdarlıq edir ki, dünyada illik reklam xərcləri bir trilyon dolları ötür və iri şirkətlər süni intellektin gələcəyinin formalaşmasında mühüm rol oynaya bilər. Beynəlxalq ictimaiyyətin hərəkətsiz qalması isə qlobal dezinformasiya böhranını daha da ağırlaşdıra bilər.

AZƏRTAC xəbər verir ki, bu barədə təşkilatın mətbuat xidməti məlumat yayıb.

Mövzuya həsr olunmuş və BMT-nin Qlobal Kommunikasiyalar Departamenti ilə “Conscious Advertising Network” şəbəkəsi tərəfindən hazırlanmış yeni analitik qeyddə bildirilir ki, reklam sahəsində süni intellektin nəzarətsiz tətbiqi ümumilikdə rəqəmsal informasiya mühitində ciddi problemlər yarada bilər.

Qeyd olunur ki, reklam sənayesi internetdə informasiya axınlarının mərkəzində dayanır və büdcələrin bölüşdürülməsi ilə bağlı qərarlar hansı məzmunun hazırlanacağını, təşviq olunacağını və monetizasiya ediləcəyini müəyyən edir. Süni intellekt alətlərinin reklam satınalmaları və məzmun yaradılması proseslərinə daxil edilməsi bu təsiri daha da gücləndirir.

“Reklam insanların nə gördüyünü və nəyə inandığını formalaşdırmağa kömək edən sistemləri maliyyələşdirir”, – deyə BMT-nin informasiya bütövlüyü məsələləri üzrə baş müşaviri Şarlotta Skedden bildirib. “Operativ tədbirlər və qoruyucu mexanizmlər olmadan süni intellekt informasiya ekosisteminin bütövlüyünün dağılmasını sürətləndirə bilər. Reklam verənlərin bu vəziyyəti dəyişmək imkanı var”, – deyə o əlavə edib.

Analitik qeyddə bir sıra problemlər qeyd olunur:

– Dezinformasiya və nifrət çağırışları: süni intellekt dezinformasiyanın və nifrət çağırışlarının yayılmasını sürətləndirir, reklam gəlirləri isə məzmunun keyfiyyətindən və ya etibarlılığından asılı olmayaraq onlayn materialların maliyyələşdirilməsini davam etdirir.

– Şəffaflığın olmaması: süni intellektə əsaslanan reklam sistemlərinin qeyri-şəffaf fəaliyyəti fırıldaqçılıq və səmərəsizlik üçün zəmin yarada bilər.

– Jurnalistikaya təhdid: süni intellekt tərəfindən yaradılan məzmunun artması müstəqil jurnalistikanın davamlılığına təhlükə yaradır, rəqəmsal mühitə inamın azalması isə reklam kampaniyalarının effektivliyini zəiflədir.

Sənədin müəllifləri vurğulayırlar ki, bu, yalnız sosial problem deyil, həm də biznes riskidir. Auditoriya reklam yerləşdirilən platformalara etimadını itirdikdə, ziyarətçi axını azalır və investisiyalar özünü doğrultmur.

“Brendlər süni intellekti sürətlə tətbiq etməyə məcburdur, lakin məhdudiyyətlər olmadıqda bu cür həllər onların marketinq strategiyalarının asılı olduğu mühiti zəiflədə bilər”, – deyə məsuliyyətli reklamı təşviq edən “Conscious Advertising Network” şirkətinin nümayəndəsi Harriyet Kinqabi bildirib: “Söhbət innovasiyalara mane olmaqdan deyil, onların həm biznesə, həm də cəmiyyətə fayda verməsini təmin etməkdən gedir”.

BMT ekspertləri hesabatda siyasətçiləri süni intellekt və reklamın tənzimlənməsi mexanizmlərini beynəlxalq standartlara uyğunlaşdırmağa, həmçinin şəffaflığın artırılması üçün sənaye və vətəndaş cəmiyyəti ilə əməkdaşlığı gücləndirməyə çağırırlar.

Reklam verənlərə süni intellektin təchizat zəncirlərində daha yüksək şəffaflıq tələb etmək, keyfiyyətli media resurslarına üstünlük vermək və maliyyə alətlərindən istifadə etməklə onlayn platformaları istifadəçi və istehlakçıların qorunması üçün daha etibarlı mexanizmlər yaratmağa təşviq etmək tövsiyə olunur.

Qeyddə təqdim olunan məlumatlar göstərir ki, reklam satınalmalarında şəffaflığın artırılması effektivlik göstəricilərinin iki rəqəmli artımına gətirib çıxara bilər və bu da məsuliyyətli yanaşmaların uğurlu biznes maraqları ilə uzlaşdığını təsdiqləyir.

Paylaş:

Baxılıb: 270 dəfə