Qlobal çağırışlar və Azərbaycanın artan rolu

Bakı:

10 °C

93 %

4 m/s

Əlaqə

AZ RU EN

Ana səhifə / Arxiv / Qlobal çağırışlar və Azərbaycanın artan rolu

Qlobal çağırışlar və Azərbaycanın artan rolu

16.03.2026 [21:28]

Səyyad Mirzəyev

YAP Ağdam rayon təşkilatının əməkdaşı

Prezident İlham Əliyev 12 mart 2026-cı il tarixində Bakıda keçirilən XIII Qlobal Bakı Forumunun açılış mərasimində çıxış edərək müasir beynəlxalq münasibətlər sistemində baş verən dəyişikliklər, qlobal təhlükəsizlik məsələləri və Azərbaycanın artan geosiyasi rolundan geniş bəhs edib. Dövlət başçısının çıxışı qlobal gündəmin əsas məsələlərinə dair mühüm mesajlarla yadda qalıb və forum iştirakçıları tərəfindən böyük maraqla qarşılanıb. Prezident İlham Əliyev çıxışında vurğulayıb ki, Qlobal Bakı Forumu artıq beynəlxalq səviyyədə nüfuzlu siyasi və intellektual platformalardan birinə çevrilib. Müxtəlif ölkələrdən sabiq və fəaliyyətdə olan dövlət və hökumət başçıları, nüfuzlu siyasətçilər, beynəlxalq təşkilatların nümayəndələri və ekspertlərin qatıldığı bu forum qlobal problemlərin müzakirəsi və həlli yollarının axtarılması baxımından mühüm əhəmiyyət daşıyır. Dövlət başçısı qeyd edib ki, forum beynəlxalq dialoqun inkişafına və ölkələr arasında qarşılıqlı anlaşmanın möhkəmləndirilməsinə töhfə verir. Prezident çıxışında dünyada baş verən geosiyasi proseslərə toxunaraq bildirib ki, hazırkı dövrdə beynəlxalq münasibətlər sistemi ciddi transformasiya mərhələsindən keçir. Prezident İlham Əliyev qeyd etdi ki, bir sıra regionlarda baş verən münaqişələr, siyasi qarşıdurmalar və iqtisadi qeyri-sabitlik qlobal təhlükəsizlik mühitini daha da mürəkkəbləşdirir. Dövlət başçısı vurğulayıb ki, mövcud beynəlxalq mexanizmlər bəzən qlobal problemlərin həlli üçün yetərli olmur və yeni əməkdaşlıq modellərinə ehtiyac yaranır. Bu baxımdan, müxtəlif ölkələrin liderlərini və ekspertlərini bir araya gətirən Qlobal Bakı Forumu kimi platformalar fikir mübadiləsi üçün mühüm rol oynayır.

Prezident İlham Əliyev çıxışında Azərbaycanın müstəqil və balanslaşdırılmış xarici siyasət kursundan da bəhs edib. Dövlət başçısı qeyd edib ki, Azərbaycan bütün tərəfdaşları ilə qarşılıqlı hörmət və etimad əsasında əməkdaşlıq edir və beynəlxalq münasibətlərdə etibarlı tərəfdaş kimi tanınır.

Onun sözlərinə görə, Azərbaycan regional sabitliyin təmin olunmasına və beynəlxalq əməkdaşlığın genişlənməsinə daim töhfə verir. Ölkənin təşəbbüsü ilə həyata keçirilən böyük enerji və nəqliyyat layihələri təkcə region üçün deyil, bütövlükdə Avrasiya məkanı üçün strateji əhəmiyyət kəsb edir. Bu layihələr müxtəlif regionları birləşdirərək iqtisadi əməkdaşlığın genişlənməsinə yeni imkanlar yaradır.

Prezident İlham Əliyev çıxışında enerji təhlükəsizliyi məsələsinə xüsusi diqqət ayırıb. Dövlət başçısı bildirib ki, Azərbaycan uzun illərdir Avropa və digər regionların enerji təhlükəsizliyinin təmin olunmasına mühüm töhfə verir.

Azərbaycanın zəngin enerji ehtiyatları və həyata keçirdiyi iri enerji layihələri bir çox ölkələrin enerji tələbatının qarşılanmasına xidmət edir. Prezident qeyd edib ki, Azərbaycanın təşəbbüsü ilə reallaşdırılan layihələr sayəsində enerji marşrutlarının şaxələndirilməsi təmin olunur və enerji təhlükəsizliyi daha dayanıqlı əsaslar üzərində qurulur.

Paylaş:

Baxılıb: 347 dəfə