Qlobal çağırışlar fonunda yeni tərəfdaşlıq konsepsiyası

Bakı:

8 °C

93 %

10 m/s

Əlaqə

AZ RU EN

Ana səhifə / Arxiv / Qlobal çağırışlar fonunda yeni tərəfdaşlıq konsepsiyası

Qlobal çağırışlar fonunda yeni tərəfdaşlıq konsepsiyası

16.02.2026 [11:49]

Elşən Alıyev

YAP Daşkəsən rayon təşkilatının sədr müavini

ABŞ-ın Vitse-prezidenti Cey. Di. Vensin Azərbaycana rəsmi səfəri və imzalanmış Strateji Tərəfdaşlıq Xartiyası Bakı–Vaşinqton münasibətlərində yeni geosiyasi mərhələnin başlandığını nümayiş etdirir. Prezident İlham Əliyevin mətbuata verdiyi bəyanat isə bu mərhələnin dərin siyasi və iqtisadi məzmun daşıdığını göstərir. Dövlətimizin başçısının çıxışında səslənən fikirlər sübut edir ki, Azərbaycan ABŞ-la münasibətləri uzunmüddətli strateji planlama çərçivəsində inkişaf etdirir.

Bu səfər, eyni zamanda regionun dəyişən siyasi reallıqları fonunda baş verib. Cənubi Qafqazda yeni təhlükəsizlik arxitekturası formalaşır və Azərbaycan bu arxitekturanın əsas aktorlarından biri kimi çıxış edir. ABŞ-la imzalanmış Strateji Tərəfdaşlıq Xartiyası isə bu prosesə beynəlxalq legitimlik və institusional çərçivə qazandırır. Prezident İlham Əliyevin “Bizim üçün dünyanın ən qüdrətli ölkəsi – Amerika Birləşmiş Ştatları ilə strateji tərəfdaş olmaq böyük şərəfdir” ifadəsi Azərbaycanın xarici siyasət kursunun unikallığını bir daha təcəssüm etdirir. Bu fikir həm də qarşılıqlı siyasi etimadın səviyyəsinin göstəricisidir. ABŞ kimi qlobal güc mərkəzi ilə strateji tərəfdaşlıq Azərbaycanın beynəlxalq mövqeyini möhkəmləndirir və dövlətimizin regional siyasətdə rolunu daha da artırır.

Strateji Tərəfdaşlıq haqqında Xartiya münasibətləri konkret mexanizmlər müstəvisinə keçirir. İşçi Qruplarının yaradılması, üç ay ərzində layihə siyahılarının hazırlanması və yol xəritələrinin razılaşdırılması sənədin real icra mexanizmlərinə əsaslandığını göstərir. Bu isə tərəfdaşlığın davamlı və sistemli xarakter daşıdığını təsdiqləyir.

Ermənistan və Azərbaycanın Ağ Evdə sülh sənədini paraflaması Cənubi Qafqaz üçün tarixi hadisə kimi qiymətləndirilir. Altı ay ərzində sülh şəraitində yaşanılması regionda yeni təhlükəsizlik mühitinin formalaşdığını göstərir. Bu faktor yalnız hərbi qarşıdurmanın dayanması deyil, həm də iqtisadi və siyasi inteqrasiyanın başlanğıcıdır.

Azərbaycan üçün sülh mərhələsi yeni nəqliyyat, enerji və iqtisadi layihələrin reallaşdırılması üçün təhlükəsiz platforma yaradır. ABŞ-ın bu prosesdə iştirakı isə regionda balanslaşdırılmış və beynəlxalq hüquqa əsaslanan yanaşmanın təmin olunmasına xidmət edir. Beləliklə, Bakı–Vaşinqton əməkdaşlığı regional sabitliyin əsas məsələlərindən birinə çevrilir.

Beynəlxalq Sülh və Rifah naminə Tramp Marşrutu – TRIPP layihəsi Azərbaycanın geoiqtisadi rolunu yeni səviyyəyə qaldırır. Layihə ölkənin əsas hissəsi ilə Naxçıvan Muxtar Respublikası arasında maneəsiz bağlantını təmin etməklə yanaşı, regionda iqtisadi əməkdaşlığı gücləndirəcək genişmiqyaslı multimodal dəhliz funksiyası daşıyır. TRIPP Trans-Xəzər Nəqliyyat Dəhlizi – Orta Dəhliz strategiyası ilə inteqrasiya olunaraq Asiya ilə Avropa arasında alternativ və təhlükəsiz tranzit xətti formalaşdırır. Azərbaycanın Ermənistan istiqamətində tranzit məhdudiyyətlərini aradan qaldırması və enerji təchizatına başlaması sülhün real iqtisadi nəticələrə çevrildiyini göstərir. Bu amil regionda qarşılıqlı asılılıq modelinin formalaşmasına və uzunmüddətli sabitliyə xidmət edir.

Strateji Tərəfdaşlıq Xartiyasında interkonnektor layihələrinin inkişafı, təchizat marşrutlarının şaxələndirilməsi və mülki nüvə əməkdaşlığının dərinləşdirilməsi kimi istiqamətlərin yer alması enerji sahəsində əməkdaşlığın daha geniş çərçivəyə keçdiyini göstərir. Bu yanaşma Azərbaycanın enerji diplomatiyasını qlobal enerji təhlükəsizliyinin mühüm komponentinə çevirir.

Xartiyanın iqtisadi sərmayələr və süni intellekt sahəsinə həsr olunmuş bölməsi xüsusi əhəmiyyət daşıyır. AI data mərkəzlərinin yaradılması, innovasiya körpülərinin təşkili, tədqiqat və inkişaf mexanizmlərinin qurulması Azərbaycanın iqtisadiyyatının yüksək texnologiyalar əsasında transformasiyasını sürətləndirə bilər. ABŞ-ın aparıcı şirkətləri ilə əməkdaşlıq Azərbaycanın rəqəmsal tranzit və data mərkəzi kimi mövqeyini gücləndirə bilər. Bu isə insan kapitalının inkişafına, yeni iş yerlərinin yaradılmasına və qeyri-neft sektorunun genişlənməsinə töhfə verəcək. Rəqəmsal transformasiya uzunmüddətli iqtisadi dayanıqlılığın əsas elementlərindən biri kimi çıxış edir.

Strateji sənədin təhlükəsizlik bölməsi müdafiə sənayesi, antiterror əməkdaşlığı, kibertəhlükəsizlik və humanitar minatəmizləmə sahələrini əhatə edir. Bu əməkdaşlıq klassik hərbi əməkdaşlıqdan daha geniş məzmun daşıyır və müasir təhlükə spektrini nəzərə alır. Kibertəhlükəsizlik və mühüm infrastrukturun qorunması məsələlərinin prioritet kimi müəyyənləşdirilməsi rəqəmsal dövrdə təhlükəsizlik anlayışının dəyişdiyini göstərir. Humanitar minatəmizləmə sahəsində texnologiya və maliyyə dəstəyi isə post-münaqişə reabilitasiyasını sürətləndirərək azad edilmiş ərazilərin bərpasına mühüm töhfə verir.

Vitse-prezident Vensin səfəri və imzalanmış Strateji Tərəfdaşlıq Xartiyası Azərbaycan–ABŞ münasibətlərində institusional və dərin məzmunlu mərhələnin başlanğıcıdır. Bu əməkdaşlıq yalnız ikitərəfli maraqlara deyil, həm də regional sabitliyə, qlobal enerji təhlükəsizliyinə və rəqəmsal transformasiyaya xidmət edir. Beləliklə, formalaşan yeni strateji model Azərbaycanın beynəlxalq mövqeyini gücləndirir, dövlətimizi regional aktordan qlobal əməkdaşlıq platformasında mühüm tərəfdaşa çevirir. Bakı–Vaşinqton xəttində yaranmış bu dinamika Cənubi Qafqazın gələcək inkişaf trayektoriyasına da ciddi təsir göstərəcək.

Paylaş:

Baxılıb: 223 dəfə