Müstəqil Azərbaycanın dövlət quruculuğunda gənclərin rolu

Bakı:

14 °C

82 %

7 m/s

Əlaqə

AZ RU EN

Ana səhifə / Arxiv / Müstəqil Azərbaycanın dövlət quruculuğunda gənclərin rolu

Müstəqil Azərbaycanın dövlət quruculuğunda gənclərin rolu

02.02.2026 [19:05]

Azərbaycan xalqının dövlətçilik ənənələri hələ çox qədim dövrlərdən formalaşaraq zamanın sınaqlarından uğurla çıxmış və bu günədək mövcudluğunu qoruyub saxlamışdır. Bu gün müstəqil dövlətçiliyimizin üzərində bərqərar olduğu əsas dayaqlardan biri də, heç şübhəsiz, Azərbaycan gəncliyidir.

Gənclərimizin bir fərd, əsl Azərbaycan vətəndaşı kimi formalaşmasında ümummilli lider Heydər Əliyevin danılmaz əməyi, misilsiz xidmətləri vardır. Ulu öndərin zəngin və möhtəşəm dövlətçilik fəaliyyətində gənclər siyasəti hər zaman xüsusi yer tutmuşdur. Hələ ötən əsrin 70–80-ci illərində müdrik rəhbərin göstərişi ilə yüzlərlə azərbaycanlı gənc keçmiş SSRİ-nin aparıcı ali məktəblərinə müxtəlif ixtisaslar üzrə təhsil almağa göndərilmişdir.

Heydər Əliyev ölkədə gənclər siyasətinin düzgün aparılmasını son dərəcə vacib hesab edərək bildirirdi: “Mənim üçün ən əziz nemət Azərbaycanın uşaqlarıdır, Azərbaycanın gəncləridir. Çünki Azərbaycan Prezidenti kimi mən Azərbaycanın böyük gələcəyi haqqında düşünürəm. Azərbaycanın gələcəyi isə Azərbaycanın gənclərindən və uşaqlarından asılıdır.”

Ümummilli liderin 1993-cü ildə siyasi hakimiyyətə yenidən qayıdışı ilə dövlət gənclər siyasətinin formalaşması daha çoxşaxəli və konseptual xarakter almağa başladı. 1994-cü ildə dövlət gənclər siyasətinin həyata keçirilməsi və müxtəlif gənclər təşkilatları arasında mərkəzləşdirilmiş koordinasiyanın təmin edilməsi məqsədilə Gənclər və İdman Nazirliyi yaradıldı.

Azərbaycan gənclər ölkəsidir. Gənclərə diqqət və qayğı ulu öndər Heydər Əliyevin həm sovet, həm də müstəqillik dövründə həyata keçirdiyi siyasətin əsas prioritetlərindən biri olmuşdur. Dahi şəxsiyyət vurğulayırdı ki, cəmiyyətin gələcək tərəqqisi bu gün gənclərimizə nəyi və necə öyrətməyimizdən asılıdır. Gənclərimiz mükəmməl təhsil almalı, həyatı dərindən öyrənməli, dünyada gedən proseslərdən xəbərdar olmalı, əldə etdikləri bilik və bacarıqları xalqına və dövlətinə xidmətə yönəltməlidirlər.

Ulu öndər xüsusi olaraq qeyd edirdi ki, Azərbaycan gəncləri sağlam düşüncəli və vətənpərvər gənclərdir. Gənclərə göstərilən bu etimad, diqqət və qayğı onların daha səylə çalışmalarına, müstəqil Azərbaycanın dünəni, bu günü və gələcəyi naminə sıx birləşmələrinə güclü stimul verdi.

Bu baxımdan, ulu öndərin təşəbbüsü və birbaşa iştirakı ilə keçirilən gənclər forumları gəncliklə bağlı strategiyanın ilk böyük təntənəsi kimi dəyərləndirilir. 1997-ci ildə Heydər Əliyevin sərəncamına əsasən I Azərbaycan Gənclər Forumu keçirildi və 2 fevral tarixi Azərbaycan Gəncləri Günü elan olundu. Bu addım bir daha təsdiq etdi ki, gənclər siyasəti dövlət siyasətində əsas yer tutur. Ardınca 1999, 2003, 2005, 2008 və 2011-ci illərdə keçirilən Azərbaycan Gənclər Forumları gənclərin fəaliyyətində mühüm dönüş yaradaraq onların imkan və fəaliyyət istiqamətlərini daha da genişləndirdi.

1999-cu il iyulun 29-da “Dövlət gənclər siyasəti haqqında” fərmanlar imzalandı. Gənclərlə bağlı digər mühüm sənəd isə 2002-ci ilin aprelində qəbul edilmiş “Gənclər siyasəti haqqında” qanundur. Bu qanunda gənclər siyasətinin formalaşdırılmasında və həyata keçirilməsində gənclərin iştirakı, gənclər təşkilatlarına dövlət yardımı, gənc ailələrə dəstək, gənclərin məşğulluğunun təmin edilməsi, sağlamlığının qorunması, istedadlı gənclərə dövlət qayğısı, onların mənəvi-əxlaqi tərbiyəsi və mədəni həyatda iştirakı kimi mühüm müddəalar öz əksini tapmışdır. Bu sənəd Azərbaycan Respublikasında gənclər siyasətinin məqsəd, prinsip və istiqamətlərini müəyyən edir.

Azərbaycan gəncləri üçün ən həlledici sınaqlardan biri 2020-ci il sentyabrın 27-də başlayan və noyabrın 10-dək davam edən Vətən müharibəsi oldu. Tarixi missiyanı yerinə yetirən qəhrəman gənclərimiz tarix, xalq və Vətən qarşısında misilsiz xidmətlər göstərdilər. Rəşadətli Azərbaycan Ordusunun sıralarında Vətən uğrunda mətanətlə vuruşan gənclərimiz öz adlarını xalqımızın ən yeni tarixinə qızıl hərflərlə yazdılar.
Onların qəhrəmanlığı sayəsində əldə olunan şanlı Zəfər ölkəmizin ərazi bütövlüyünü bərpa etdi, xalqımız otuz illik həsrətdən sonra tarixi torpaqlarına qovuşdu. Müstəqillik dövründə vətənpərvərlik ruhunda yetişən Azərbaycan gəncləri bu tarixi qələbəni xalqımıza bəxş etdilər. Vətən müharibəsində iştirak etmiş hər bir igid və qəhrəman gəncə Azərbaycan xalqı sonsuz minnətdardır.

Azərbaycan gəncləri hər zaman Vətənə böyük sevgiləri, mənsub olduqları xalqa dərin sədaqətləri ilə seçilmişlər. Müstəqillik tariximizin ən şanlı səhifələri məhz gənclərin adı ilə bağlıdır.

Arif Qasımov

YAP Sədərək rayon təşkilatının sədri

Paylaş:

Baxılıb: 386 dəfə