Azərbaycan enerji sahəsində etibarlı tərəfdaşdır

Bakı:

26 °C

57 %

9 m/s

Əlaqə

AZ RU EN

Ana səhifə / Arxiv / Azərbaycan enerji sahəsində etibarlı tərəfdaşdır

Azərbaycan enerji sahəsində etibarlı tərəfdaşdır

09.01.2026 [20:32]

Prezident İlham Əliyevin yerli telekanallara müsahibəsi ölkənin əsas gündəmini əhatə edib. Dövlət başçısı bərpa prosesi, Böyük Qayıdış və gələcək prioritetlərlə bağlı açıqlamalar verib.

Prezident İlham Əliyev yerli televiziya kanallarına verdiyi müsahibə zamanı Azərbaycanın daxili və xarici siyasətinin əsas istiqamətləri, postmüharibə dövründə həyata keçirilən bərpa-quruculuq işləri və Böyük Qayıdış prosesi ilə bağlı mühüm fikirlər səsləndirib. Müsahibə cəmiyyətin maraq dairəsində olan aktual mövzuları əhatə edib.

Dövlət başçısı azad edilmiş ərazilərdə aparılan yenidənqurma işlərinə toxunaraq bildirib ki, Qarabağ və Şərqi Zəngəzurun bərpası Azərbaycan dövlətinin ən prioritet istiqamətlərindən biridir. Bu ərazilərdə infrastrukturun müasir standartlara uyğun qurulması, yaşayış məntəqələrinin yenidən salınması və dayanıqlı inkişaf modelinin formalaşdırılması əsas hədəflər kimi müəyyən edilib.

Prezident İlham Əliyev Mirşahinin Qarabağ və Şərqi Zəngəzurun bərpası, eləcə də Böyük Qayıdışa dair Birinci Dövlət Proqramının icrası ilə bağlı sualını cavablandırarkən qeyd edib ki, proqram planlı və ardıcıl şəkildə həyata keçirilir və artıq real nəticələr əldə olunub. Onun sözlərinə görə, qısa müddət ərzində yollar, tunellər, elektrik və su infrastrukturu, sosial obyektlər inşa edilib, bir sıra yaşayış məntəqələrinə keçmiş məcburi köçkünlərin qayıdışı təmin olunub.

Dövlət başçısı vurğulayıb ki, Böyük Qayıdış prosesi yalnız əhalinin doğma yurdlarına qayıtması ilə məhdudlaşmır. Bu, eyni zamanda yeni iqtisadi imkanların yaradılması, məşğulluğun təmin edilməsi və müasir yaşayış mühitinin qurulmasını nəzərdə tutur. Prezidentin sözlərinə görə, Birinci Dövlət Proqramının icrası növbəti mərhələlər üçün möhkəm əsas yaradıb və qarşıdakı illərdə qayıdış prosesi daha geniş miqyas alacaq.

Müsahibədə xarici siyasət məsələlərinə də toxunan Prezident İlham Əliyev Azərbaycanın beynəlxalq münasibətlərdə müstəqil və milli maraqlara əsaslanan siyasət yürütdüyünü bildirib. Regionda davamlı sülhün təmin olunmasının qarşılıqlı hörmət və beynəlxalq hüquq prinsiplərinə əsaslanmalı olduğu vurğulanıb.

İqtisadi mövzulardan danışan dövlət başçısı Azərbaycanın enerji sahəsində etibarlı tərəfdaş kimi mövqeyini qoruduğunu, eyni zamanda qeyri-neft sektorunun inkişafı, rəqəmsallaşma və investisiya mühitinin yaxşılaşdırılmasının əsas prioritetlər sırasında olduğunu qeyd edib.

Prezident müsahibə zamanı daxili sabitlik və milli birlik məsələsinə də xüsusi diqqət ayıraraq bildirib ki, ölkədə mövcud olan ictimai-siyasi sabitlik və xalq–dövlət birliyi əldə edilən uğurların əsasını təşkil edir.

Prezident İlham Əliyevin yerli telekanallara verdiyi bu müsahibə Azərbaycanın mövcud reallıqlarını, həyata keçirilən dövlət siyasətinin mahiyyətini və qarşıdakı dövr üçün müəyyən edilmiş əsas hədəfləri əks etdirən mühüm ictimai-siyasi çıxış kimi qiymətləndirilir.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 843 dəfə