“Azərbaycan dövləti, xalqı və ordusu 44 gün ərzində öz qüdrətini göstərdi”

Bakı:

25 °C

55 %

1 m/s

Əlaqə

AZ RU EN

Ana səhifə / Arxiv / “Azərbaycan dövləti, xalqı və ordusu 44 gün ərzində öz qüdrətini göstərdi”

“Azərbaycan dövləti, xalqı və ordusu 44 gün ərzində öz qüdrətini göstərdi”

03.11.2025 [23:05]

XXI əsrin ən şanlı səhifələrindən biri 2020-ci ilin payızında – Vətən müharibəsi günlərində yazıldı. 27 sentyabrda başlanan və 44 gün davam edən bu mübarizə təkcə hərbi əməliyyat deyildi – bu, Azərbaycan xalqının milli iradəsinin, dövlətimizin gücünün və ordumuzun qəhrəmanlığının təntənəsi idi. Bu 44 gün ərzində Azərbaycan dövləti, xalqı və ordusu bir yumruq kimi birləşərək, tarixə qızıl hərflərlə yazılan bir zəfərə imza atdı.

Azərbaycan dövlətinin 30 il ərzində apardığı məqsədyönlü siyasət, ordunun gücləndirilməsi, diplomatik səviyyədə apardığı balanslaşdırılmış siyasət Vətən müharibəsində öz bəhrəsini verdi. Prezident, Müzəffər Ali Baş Komandan İlham Əliyevin rəhbərliyi altında Azərbaycan Ordusu yüksək peşəkarlıq, nizam-intizam və müasir döyüş bacarığı nümayiş etdirdi. Dövlətin hər bir qurumu, diplomatik korpus, informasiya cəbhəsi və iqtisadi sahə – hamısı vahid məqsədə – torpaqlarımızın azadlığına xidmət etdi.

Azərbaycan xalqı 44 gün ərzində misilsiz birlik və həmrəylik nümayiş etdirdi. Ön cəbhədə döyüşən əsgərlərimizə arxa cəbhədən dəstək olmaq üçün milyonlarla insan könüllü şəkildə yardımlar etdi, qan verdi, dua etdi, bayrağımızı qürurla dalğalandırdı. Şəhid anaları, qazilər, gənclər və uşaqlar — hər biri bu mübarizənin mənəvi iştirakçısına çevrildi. Xalq və dövlət bir ruh kimi hərəkət etdi, bu da zəfərin əsas sirri oldu.

Azərbaycan Ordusu 44 gün ərzində dünyanın ən çətin relyeflərindən biri sayılan Qarabağ torpaqlarında qəhrəmanlıq nümunəsi göstərdi. Cəbrayıl, Füzuli, Zəngilan, Qubadlı rayonlarının azad edilməsi, Şuşa əməliyyatı isə qəhrəmanlığın zirvəsi oldu. Xüsusilə Şuşa şəhərinin azad edilməsi təkcə hərbi qələbə deyil, həm də milli ruhun, iradənin və zəkanın simvolu idi. Bu əməliyyat, azərbaycanlı əsgərin döyüş ruhunu, vətən sevgisini bütün dünyaya göstərdi.

Bu 44 gün Azərbaycan tarixinin dönüş nöqtəsi oldu. Xalq öz ərazi bütövlüyünü bərpa etdi, 30 illik ədalətsizliyə son qoydu. Qələbə günləri təkcə torpaqların azad olunması ilə deyil, həm də xalqın öz tarixi ədalətinə qovuşması, milli kimliyinin bərpası ilə əlamətdar oldu. Qarabağ artıq bir arzudan reallığa çevrildi.

Azərbaycan dövləti, xalqı və ordusu 44 gün ərzində bir yumruq kimi birləşərək dünyaya sübut etdi ki, ədalət, birlik və Vətən sevgisi qarşısında heç bir güc dayana bilməz. Bu zəfər nəsildən-nəslə ötürüləcək, şəhidlərimizin qəhrəmanlığı, əsgərlərimizin şücaəti, xalqımızın iradəsi Azərbaycan tarixinin ən parlaq səhifələrindən biri kimi əbədi yaşayacaq.

44 günün qəhrəmanları – xalqın, dövlətin və ordunun birliyindən doğan Böyük Qələbə bizim milli qürurumuzun simvoludur.

Elnur Qəhrəmanov,

YAP Gədəbəy rayon təşkilatının əməkdaşı

Paylaş:

Baxılıb: 513 dəfə