Azərbaycan bayrağı Xudafərin körpüsündə dalğalanır

Bakı:

23°C

46%

4m/s

Əlaqə

AZ RU EN

Ana səhifə / Arxiv / Azərbaycan bayrağı Xudafərin körpüsündə dalğalanır

Azərbaycan bayrağı Xudafərin körpüsündə dalğalanır

04.10.2025 [12:55]

Azərbaycan bayrağının Xudafərin körpüsündə dalğalanması xalqımızın tarixi zəfərinin və milli qürurunun parlaq simvoludur. Bu hadisə 2020-ci ilin Vətən müharibəsi zamanı Cəbrayıl rayonunun işğaldan azad edilməsindən sonra baş vermiş və Azərbaycan xalqının illərlə arzuladığı qələbənin rəmzinə çevrilmişdir. Xudafərin körpüsü əsrlərlə tarixə şahidlik etmiş, Cənubi Qafqazla Cənubi Azərbaycanı birləşdirən strateji əhəmiyyətli bir abidədir. Bu körpü təkcə coğrafi baxımdan deyil, həm də mədəni, tarixi və mənəvi baxımdan Azərbaycan xalqı üçün dəyərli bir simvoldur. İşğal dövründə bu ərazilərdən uzaq düşən Azərbaycan xalqı üçün Xudafərin körpüsü bir nisgil, bir həsrət məkanı idi. Ancaq Vətən müharibəsində qazanılan parlaq qələbə ilə bu nisgil sona çatdı. Azərbaycan Ordusunun qəhrəman əsgərləri Cəbrayılı işğaldan azad etdikdən sonra Xudafərin körpüsünə çataraq orada üçrəngli bayrağımızı ucaltdılar. Bu an tarixə yazıldı və hər bir azərbaycanlının yaddaşında əbədi iz qoydu.

Azərbaycan bayrağının Xudafərin körpüsündə dalğalanması xalqın birliyinin, ordunun gücünün və dövlətin qətiyyətinin göstəricisidir. Bu görüntü illərlə gözlənilən ədalətin bərpası idi. Hər bir azərbaycanlı üçün bu mənzərə təkcə bir bayrağın ucaldılması deyil, həm də torpağa sahib çıxmağın, tarixə hörmətin və gələcəyə inamın göstəricisidir. Bayrağın dalğalanması şəhidlərimizin ruhunu şad etdi, xalqımıza isə sonsuz bir qürur yaşatdı. Xudafərin körpüsündə dalğalanan bayraq təkcə bu torpaqlarda deyil, bütün Azərbaycan coğrafiyasında milli həmrəyliyin və vətənə bağlılığın simvoludur.

Bu hadisə eyni zamanda bir mesaj idi – həm ölkə daxilində, həm də beynəlxalq miqyasda. Mesaj ondan ibarət idi ki, Azərbaycan heç bir zaman öz torpaqlarından vaz keçməyib və keçməyəcək. Ərazi bütövlüyümüz bərpa olunub, dövlət suverenliyi tam təmin olunub. Xudafərin kimi tarixi bir məkanda bayrağın dalğalanması bu torpaqların Azərbaycan dövlətinə məxsus olduğunu bir daha sübut edir. Azərbaycan bayrağının Xudafərin körpüsündə dalğalanması yalnız bir hadisə deyil, bir xalqın iradəsinin, milli kimliyinin və torpaq sevgisinin canlı təzahürüdür. Bu mənzərə nəsillər boyu xalqımızın yaddaşında qalacaq, gələcək nəslə vətənpərvərlik nümunəsi kimi təqdim olunacaq. Bayrağımız Xudafərin körpüsündə əbədi dalğalanacaq və bu torpaqlar üzərində Azərbaycan var olduqca heç vaxt enməyəcək.

Nicat Quliyev
Yeni Azərbaycan Partiyası Laçın rayon təşkilatının məsləhətçisi

Paylaş:

Baxılıb: 52 dəfə