Minsk qrupunun “dəfni”...

Bakı:

24 °C

57 %

7 m/s

Əlaqə

AZ RU EN

Ana səhifə / Analitik / Minsk qrupunun “dəfni”...

Minsk qrupunun “dəfni”...

03.12.2022 [10:21]

Kreml də etiraf etdi

44 günlük Vətən müharibəsi regionla yanaşı beynəlxalq müstəvidə də bir sıra yeni reallıqlar formalaşdırdı. Belə ki, münaqişənin bitməsi ilə 30 ilə yaxın Azərbaycanla Ermənistan arasında vasitəçilik missiyasını yerinə yetirmiş ATƏT-in Minsk qrupu aktuallığını itirmiş oldu. İşğal altında olan ərazilərimiz ilə bağlı BMT TŞ-nin məlum 4 qətnaməsinin Azərbaycan tərəfindən icra edilməsi ilə Minsk qrupunun funksionallığı aradan qalxdı.

Yeri gəlmişkən, Rusiya xarici işlər naziri Sergey Lavrov bildirib ki, hazırda fransızlar, amerikalılar və bütövlükdə Avropa İttifaqı vasitəçilik xidmətləri ilə dəfn etdikləri Minsk qrupunu kompensasiya etməyə çalışırlar. Onun sözlərinə görə, Rusiya sərhədin delimitasiyasında Ermənistan və Azərbaycana kömək edir, həmçinin İrəvanla Bakı arasında sülh müqaviləsinin razılaşdırılmasına da yardım göstərəcək. “Paralel olaraq, digər oyunçuların bu proseslərə müdaxilə etmək üçün bəzi konvulsiv cəhdlərini müşahidə etdik. Biz bununla bağlı heç bir problem yaşamırıq. Paris rəsmi olaraq Rusiya ilə heç bir formatda əməkdaşlıq etməyəcəyini açıqlayıb. Beləliklə, onlar ATƏT-in Minsk qrupunun fəaliyyətinin yekunlaşdığını elan etdilər”, - deyə rusiyalı diplomat fikrini tamamlayıb.

ATƏT-in Minsk qrupu mandatını yerinə yetirmək üçün heç nə etməyib

ATƏT-in Minsk qrupunun aktuallığını itirməsi yeni hadisə deyil. Vurğulamaq lazımdır ki, bu fakt artıq iki ildir ki, Azərbaycan dövlətinin və cəmiyyətinin yekdil rəyidir. İllər boyu yalnız turistik səfərləri ilə yadda qalan, vasitəçi olsa belə, Ermənistanın maraqlarının açıq müdafiəçisinə çevrilən, hətta işğalçı ilə işğala məruz qalmış arasında bərabərlik işarəsi qoymağa çalışan ATƏT-in Minsk qrupu hüquqları pozulan azərbaycanlıları görməzdən gəlirdi. Aparılan danışıqlarda Ermənistana təzyiq göstərməyi, etdiyi cinayətlərə görə bu ölkədən hesab sormağı yada belə salmayan Minsk qrupu son nəticədə tarixin arxivinə atıldı. 2020-ci ildə Vətən müharibəsində əldə olunan qələbə bu quruma ehtiyacın qalmadığını faktiki olaraq ortaya qoydu. Yeri gəlmişkən, oktyabrın 5-də Ağdam şəhərində keçirilən “Dayanıqlı İnkişaf Məqsədləri” və “Yeni Şəhər Gündəliyi” - postmünaqişə dövründə bərpa və yenidənqurmanın aparıcı qüvvəsi kimi” mövzusunda keçirilən Forumda çıxış edən Prezident İlham Əliyev bildirmişdi ki, beynəlxalq ictimaiyyət Azərbaycan əhalisinin başına gələn humanitar fəlakətə göz yumurdu. Dövlət başçısı vurğulamışdı ki, ATƏT-in Minsk qrupunun həmsədrləri dəfələrlə işğal olunmuş ərazilərə səfər ediblər, burada bütün şəhər və kəndlərin vəhşicəsinə viran edilməsinin, ermənilərin ərazilərimizdə qanunsuz məskunlaşmasının şahidi olublar, lakin Ermənistanı qınamayıblar: “27 illik qondarma fəaliyyəti ərzində Ermənistanı qınayan bircə söz belə deyilməmişdi. İndi isə ATƏT-in Minsk qrupunun fəaliyyətini bərpa etmək cəhdlərini görəndə, əlbəttə ki, biz bunu dəstəkləyə bilmərik, çünki onlar öz mandatlarını yerinə yetirmək üçün heç nə etməyiblər. Etdikləri yeganə şey Ermənistanın təcavüzünü müəyyən dərəcədə leqallaşdırmaq, təcavüzkarla təcavüzün qurbanı arasında balans yaratmaq cəhdləri olub. Azərbaycan özü beynəlxalq hüququ bərpa etdikdən və BMT-nin Təhlükəsizlik Şurasının qətnamələrini yerinə yetirdikdən sonra bizim artıq vasitəçiyə ehtiyacımız yoxdur”.

Rusiya səmimidirmi?

Sergey Lavrovun indi dilə gətirdiyi fakt ötən il Rusiya Prezidenti Vladimir Putinin Valday Diskussiya Klubundakı çıxışı zamanı da səslənmişdi. Prezident Putin bildirmişdi ki, məsələnin həllinə iki tərəf və Rusiyadan başqa heç kim lazım deyil. Əslində, bu faktlar Rusiyanın ATƏT-in Minsk qrupunun “dəfn edilməsi” reallığı ilə barışdığını göstərir. Amma Rusiya bu fikirlərində nə qədər səmimidir? Və ya hazırki siyasi situasiya olmasaydı, başqa sözlə, Qərblə Rusiya arasında siyasi qarşıdurmalar yaşanmasaydı, Kreml yenə də eyni fikirdə olcaqdımı? Bunu demək çətindir. Ən azından, digər Minsk qrupu üzvü olan ölkələr kimi Azərbaycan-Ermənistan münasibətlərinin normallaşdırılması üzrə xüsusi nümayəndə təyin etməzdi...

SADİQ

Paylaş:

Baxılıb: 842 dəfə