İsveç və Finlandiya NATO-ya üzv olarsa...

Bakı:

11 °C

93 %

3 m/s

Əlaqə

AZ RU EN

Ana səhifə / Analitik / İsveç və Finlandiya NATO-ya üzv olarsa...

İsveç və Finlandiya NATO-ya üzv olarsa...

11.05.2022 [10:21]

Rusiya “ikinci Ukrayna” planını işə salacaqmı?

Pərviz SADAYOĞLU

NATO-nun şimala doğru “genişlənmə” planı vəziyyəti yenidən gərginləşdirib. Belə ki, Finlandiya və İsveçin mayın 16-dan 20-dək eyni vaxtda Şimali Atlantika Alyansına üzvlük üçün müraciət edəcəkləri ilə bağlı xəbərlər Rusiya tərəfindən birmənalı qarşılanmayıb. Xatırladaq ki, Skandinaviya ölkələrinin NATO-ya müraciətləri 20-ci həftədə, yəni mayın 16-dan başlayan həftədə dərc edilməlidir. Həmin həftə, mayın 17-18-də Finlandiya prezidenti Sauli Niinistö Kral XVI Karlzın dəvəti ilə İsveçə səfər edəcək. Səfər çərçivəsində Finlandiya və İsveç dövlət rəhbərləri də görüşəcək və ölkələrin NATO-ya daxil olmağa hazır olduqlarını bəyan edəcəklər.

Kreml isə bu xəbərdən narahatdır. Bununla bağlı rəsmi Moskva Finlandiya və İsveçə xəbərdarlq edib. Bunu Rusiya Xarici İşlər Nazirliyinin sözçüsü Mariya Zaxarova İspaniyanın ABC qəzetinə müsahibəsində deyib. Onun sözlərinə görə, Finlandiya və İsveç ittifaqa qoşulsalar, Şimali Atlantika bloku ilə Rusiya arasında qarşıdurma məkanına çevriləcəklər.

Maraqlıdır ki, bu ilin fevralında Rusiyanın Ukraynaya hücumunun bir səbəbi məhz Kiyevin Şimali Atlantika Alyansına daxil olmaq arzusundan qaynaqlanmışdı. Öz sərhədlərində NATO ölkəsi görmək istəmədiyini bildirən Rusiya şimal qonşularının Alyansa daxil olmasını sakit tərzdə seyr edə biləcəkmi? Əks halda nələr gözlənilir. Kremlin bu davranışı III Dünya Müharibəsi anonsunu verirmi?

Məsələ ilə bağlı fikirlərini “Yeni Azərbaycan”a bölüşən politoloq İlqar Vəlizadənin fikrincə, Rusiya ilə Ukrayna arasındakı müharibənin sona çatmayacağı, eləcə də digər ölkələr üçün təhdidin aradan qalxmayacağı təqdirdə İsveçin və Finlandiyanın NATO-ya daxil olması real görünür. Bu dövlətlər özlərini sığortalamaq üçün belə bir addım atırlar. Politoloqun sözlərinə görə, Skandinaviya dövlətlərinin bu qərarı onların cəmiyyətinin son proseslərlə bağlı mövqeyidir. İndiyə qədər belə bir sosial sifariş olmadığı üçün bu ölkələr NATO-ya üzv olmamışdı. Bu baxımdan, qərarın legitimliyini heç kim şübhə altına ala bilməz: “Təəssüf ki, Üçüncü Dünya Müharibəsi təhlükəsi hələ də davam edir. Amma burada ehtimallarla yanaşı, tərəflərin maraqları da rol oynayır. İnanmıram ki, indiki məqamda Rusiya III Dünya Müharibəsinə başlasın. Hətta bu arzuolunan da deyil. Onsuz da Ukraynadakı müharibə ilə bağlı Çin, Hindistan kimi böyük ölkələr Rusiya ilə aralarında məsafə saxlamağa çalışırlar, bir qədər kənarda dayanmağa üstünlük verirlər. Əgər Rusiya açıq müharibəyə can atsa, aylardır neytral mövqedə dayanan Çin və Hindistan da prosesə qoşulmalı olacaq”.

Politoloq bildirib ki, Rusiya İsveçə və ya Finlandiyaya müharibə elan etməyəcək. Çünki buna heç bir əsas yoxdur. “Nə İsveç, nə də Finlandiya Ukrayna deyil. Rusiya hansısa bəhanəni əlində əsas tutub oraya hücum edə bilməz. Onsuz da bu ölkələr əvvəldən də Qərbin orbitində idi. Onların NATO-ya daxil olması hər hansı bir reallığı dəyişmir. Onlar NATO-ya daxil olmaqla Qərbin orbitində olduqlarını rəsmiləşdirəcəklər. Rusiya isə bunun qarşılığında regionda özünün silahlı qüvvələrini daha da möhkəmləndirə bilər, ən yeni sursatlarını, raket əleyhinə qurğularını oraya yerləşdirə bilər”, - deyə İ.Vəlizadə əlavə edib.

Paylaş:

Baxılıb: 988 dəfə