“Ramştayn” platformasından Ukraynaya rekord hərbi dəstək...

Bakı:

21 °C

68 %

1 m/s

Əlaqə

AZ RU EN

Ana səhifə / Analitik / “Ramştayn” platformasından Ukraynaya rekord hərbi dəstək...

“Ramştayn” platformasından Ukraynaya rekord hərbi dəstək...

13.06.2025 [08:58]

Sonuncu görüşdə platformaya üzv ölkələr önəmli qərarlar qəbul ediblər

Ukraynanın Müdafiəsi üzrə Təmas Qrupunun (“Ramştayn” formatı) son toplantısında Ukraynaya müttəfiqləri tərəfindən böyük həcmdə hərbi dəstək göstərilməsi qərara alınıb. Sayca 28-ci görüş Brüsseldə keçirilib. Belə bir qərar Tramp administrasiyası tərəfindən Kiyevə dəstəyin zəifləməsi fonunda baş verib.

Ukrayna müdafiə naziri Rustem Umerov qeyd edib ki, Ukraynanın mühüm nəticələri var. Nazirin sözlərinə görə, 2025-ci ildə təhlükəsizlik yardımı tammiqyaslı müharibənin bütün əvvəlki illərinin rəqəmlərini üstələyəcək: “Görüşdən sonra tərəfdaşlarımız yeni yardım paketləri və mühüm dəstək addımlarını açıqladılar”.

Əsas yardımlar Avropa ölkələrinin payına düşür

Belə ki, Böyük Britaniya pilotsuz təyyarələrin tədarükü üçün rekord məbləğdə - 350 milyon funt-sterlinq dəyərində yardım elan edib. Nazirin sözlərinə görə, bu, Ukraynaya 2025-ci ildə 100 min pilotsuz uçan aparatı ötürməyə imkan verəcək. Ümumilikdə, 2025-ci ildə Britaniyanın hərbi dəstəyi 4,5 milyard funt-sterlinq təşkil edir ki, bunun da 247 milyon funt-sterlinqi Ukrayna Silahlı Qüvvələrinin təliminə sərf olunacaq.

Almaniya isə 5 milyard avro dəyərində yeni hərbi yardım paketini elan edib. “Bundestaq artıq bu qərarı təsdiqləyib”, - deyə Umerov bildirib. Paketə, xüsusən də Ukraynada istehsal olunacaq uzaqmənzilli silahların maliyyələşdirilməsi, hava hücumundan müdafiə sistemlərinin, silah və sursatların ötürülməsi daxildir. Bu arada Almaniyanın müdafiə naziri Boris Pistorius iyunun 12-də Ukraynanın paytaxtı Kiyevə gözlənilməz səfər edib. Almaniyanın DPA agentliyinin məlumatına görə, nazirin səfəri əvvəlcədən elan olunmayıb. O, səfər zamanı mövcud vəziyyətlə tanış olub və Ukrayna rəhbərliyi ilə yeni hərbi yardımın göstərilməsini müzakirə edib.

Niderland da Kiyevə 400 milyon avro dəyərində yardım paketi təqdim edib. Buraya mina əleyhinə gəmi, qayıqlar və dəniz dronları daxildir. Belçika isə uzunmüddətli bir təşəbbüs elan edib. Ukraynaya 2029-cu ilə qədər 1 milyard avro məbləğində illik yardım edəcək. Norveç də Ukrayna müdafiə sənayesini dəstəkləmək üçün pilotsuz təyyarələr üçün 700 milyon dollar ayıracaq.

Kanadaya gəlincə, bu ölkə dronlar, elektron müharibə sistemləri, İT həlləri, həmçinin zirehli maşınlar üçün 45 milyon dollar, İsveç Ukrayna üçün artilleriya sursatlarının, pilotsuz təyyarələrin və digər silahların alınması üzrə beynəlxalq proqramlar üçün 440 milyon avro ayıracaqlarını açıqlayıb.

Yeni koalisiya niyə yaradılıb?

Qeyd edək ki, “Ramştayn” qrupunun bundan əvvəl-aprelin 11-də keçirilən görüşündə də Kiyevə 21 milyard avrodan (23,85 milyard dollar) çox məbləğdə dəstək elan edilmişdi. Bundan başqa, həmin görüşdə radioelektron mübarizəsi koalisiyasının yaradılması elan edilib. Artıq 11 ölkə, o cümlədən Ukrayna da bu koalisiyaya qoşulub. Ukraynanın müdafiə naziri Rustem Umerovun sözlərinə görə, yeni koalisiya avadanlıqların alınması, mütəxəssislərin hazırlanması və elektron müharibə sahəsində siyasət və doktrinaların hazırlanması işini həyata keçirəcək: “Elektron müharibə müasir hərbi münaqişələrin kritik tərkib hissəsidir. Effektiv elektron müdafiə olmadan heç bir bölmə tam döyüşə hazır ola bilməz. Koalisiyanın işə salınması bizə səyləri əlaqələndirməyə və Müdafiə Qüvvələrinin ehtiyaclarına hərtərəfli cavab verməyə imkan verəcək”. Nazir bildirib ki, koalisiya nəinki əsgərlərin cari ehtiyaclarını ödəyəcək, həm də imkanların uzunmüddətli inkişafı üçün zəmin yaradacaq.

Xatırladaq ki, dünyanın onlarla ölkəsinin iştirak etdiyi “Ramştayn” platforması Ukraynanın Müdafiəsi üzrə Təmas Qrupunun müntəzəm görüşlərinin adıdır. İlk görüş 2022-ci ildə Almaniyada yerləşən ABŞ-ın “Ramştayn” hərbi bazasında keçirilib və adını da oradan alıb. Bu iclasların məqsədi Ukraynaya Rusiyaya qarşı müharibədə hərbi yardımın koordinasiyası, müdafiə ehtiyaclarının müzakirəsi, silah tədarükü, hərbçilərin təlimi və uzunmüddətli dəstəklə bağlı məsələlərin həllidir. “Ramştayn” iştirakçıları NATO ölkələri, Avropa İttifaqı dövlətləri və Ukraynanın digər tərəfdaşlarıdır. Bu görüşlər tanklar, hava hücumundan müdafiə sistemləri, artilleriya və digər silah növlərinin verilməsi ilə bağlı qərarların qəbul olunduğu əsas platformaya çevrilib.

N.BAYRAMLI

Paylaş:

Baxılıb: 535 dəfə