İstanbulda ikinci görüşün nəticələri

Bakı:

15°C

88%

1m/s

Əlaqə

AZ RU EN

Ana səhifə / Analitik / İstanbulda ikinci görüşün nəticələri

İstanbulda ikinci görüşün nəticələri

12.04.2025 [09:16]

ABŞ və Rusiyanın bir-birinə ehtiyacı var

Vaşinqton və Moskva ikitərəfli diplomatik-siyasi münasibətlərin və əməkdaşlığın bərqərar olunması istiqamətində qarşılıqlı təmasları daha da gücləndirmək niyyətindədir. Yaxın zamanda Rusiyanın ABŞ-da, ABŞ-ın isə Rusiyada diplomatik missiyalarının fəaliyyəti tam şəkildə bərpa oluna bilər. Artıq bu prosesə start verilib. Qeyd edək ki, aprelin 10-da Rusiyanın İstanbuldakı baş konsulluğunda ABŞ və Rusiya nümamayəndələrinin ikinci görüşü keçirilib. Rusiyanın ABŞ-dakı səfiri Aleksandr Darçiyev və Dövlət Departamentinin Avropa və Avrasiya məsələləri üzrə köməkçisinin müavini Sonata Koulterin rəhbərliyi ilə keçirilən görüşdə əsas müzakirə predmenti iki ölkənin diplomatik nümayəndəliklərinin fəaliyyətinin bərpası ilə bağlı olub. Rusiya Prezidentinin mətbuat katibi Dmitri Peskov jurnalistlərə açıqlamasında bildirib ki, İstanbulda 4-5 saat davam edən görüşdə ikitərəfli münasibətlərin nizamlanması və normallaşdırılmasının perspektivləri barədə ətraflı müzakirələr aparılıb. “Rusiya XİN və Dövlət Departamenti arasında aparılan danışıqlar ikitərəfli münasibətlərin nizamlanması və normallaşdırılmasına yönəlmişdi. Bu danışıqlarda Ukrayna münaqişəsinin nizamlanması mövzusu müzakirə olunmayıb”, - deyə Kreml rəsmisi vurğulayıb.

Görüşdə hansı razılaşmalar əldə olunub?

Dövlət Departamenti və Rusiya XİN rəhbərliyi görüşün nəticələrini yüksək qiymətləndirib. Departamentin bəyanatında qeyd olunur ki, İstanbulda Rusiya ilə ABŞ arasında məsləhətləşmələr konstruktiv şəkildə aparılıb və tərəflər yeni təmas imkanlarını müzakirə ediblər. Rusiya nümayəndə heyətinin rəhbəri Aleksandr Darçiyev isə qeyd edib ki, ABŞ tərəfi ilə danışıqların ikinci raundu müsbət atmosferdə keçib. Onun sözlərinə görə, görüşdə tərəflər diplomatların gediş-gəlişini və onların vizasının rəsmiləşdirilməsini asanlaşdırmaq üçün gələcək tədbirlər görmək barədə razılığa gəliblər. Darçiyev, həmçinin vurğulayıb ki, diplomatik missiyaların fəaliyyətinin bərpası ilə bağlı məsələlərin müzakirəsi zamanı Rusiya tərəfi ABŞ tərəfindən müsadirə edilmiş diplomatik əmlakın geri qaytarılması üçün “yol xəritəsi” üzərində işləməyə hazır olduğunu, o cümlədən diplomatların maneəsiz bank xidmətlərinin təmin edilməsinə dair sazişi əks etdirən nota mübadiləsinin zəruriliyini qarşı tərəfin diqqətinə çatdırıb. Bundan başqa, tərəflər danışıqları davam etdirmək barədə də razılığa gəliblər.

ABŞ və Rusiya dialoqda maraqlıdır

Məsələ ilə bağlı politoloq İlqar Vəlizadə “Yeni Azərbaycan” qəzetinə şərhində qeyd edib ki, Vaşinqton və Moskva diplomatik-siyasi münasibətlərin bərqərar olunmasında maraqlıdır. Onun sözlərinə görə, yaxın zamanda ABŞ-Rusiya münasibətlərində müsbət proseslərin baş verməsinin şahidi ola bilərik: “İlk növbədə qeyd edim ki, hər zaman dövlətlərarası münasibətlərin qurulması, normallaşması və inkişaf etdirilməsində diplomatik nümayəndəliklər müstəsna və əhəmiyyətli rol oynayıb. Ümumiyyətlə, diplomatik nümayəndəliklərin tərkibində müxtəlif sahələr - siyasi, hərbi, elmi, mədəni, texnoloji və iqtisadi-ticari sahələrdə münasibətlərin qurulmasına cavabdeh olan diplomatlar var. Həmin şəxslər bu sahələrdə ikitərəfli əlaqələrin inkişaf etdirilməsi üçün səylər göstərirlər, əməli işlər görürlər. ABŞ-Rusiya münasibətlərinə gəlincə, hesab edirəm ki, yaxın dövrlərdə həm Dövlət Departamenti, həm də Rusiya XİN rəhbərliyi nəinki diplomatik-siyasi sahədə, hətta iqtisadi-ticari və digər müxtəlif sahələrdə əlaqələrin canlanması, habelə konsulluqların fəaliyyətinin bərpası üçün birgə addımlar atacağı istisna deyil. Rusiya ilə ABŞ arasında məsləhətləşmələrin mütəmadi hala çevrilməsi ikitərəfli münasibətlərin normallaşmasına müsbət təsir göstərəcək. Bu gün ABŞ və Rusiyanın istərsə regional, istərsə də beynəlxalq münasibətlərin koordinasiya olunmasında qarşılıqlı maraqlara söykənən əməkdaşlığa ehtiyacı var. Ağ Ev və Kremldə bunu çox yaxşı başa düşürlər”.

Yunis ABDULLAYEV

Paylaş:

Baxılıb: 298 dəfə