Ermənistan KTMT-ni Fransaya dəyişir...

Bakı:

16 °C

63 %

8 m/s

Əlaqə

AZ RU EN

Ana səhifə / Analitik / Ermənistan KTMT-ni Fransaya dəyişir...

Ermənistan KTMT-ni Fransaya dəyişir...

03.04.2025 [10:01]

Ermənistan KTMT-ni tərk etmək niyyətindədir - qeyd edək ki, Ermənistan Kollektiv Təhlükəsizlik Müqaviləsi Təşkilatının 2024-cü il büdcəsini imzalamamaq qərarına gəlib. Ermənistan Xarici İşlər Nazirliyi “Sputnik Ermənistan”a bildirib ki, İrəvan KTMT -nin maliyyələşdirilməsində iştirak etməyəcəyinə dair rəsmi şəkildə bəyanat verib: “Ermənistan tərəfi KTMT Katibliyinə “KTMT-nin 2024-cü il büdcəsi haqqında” qərarı imzalamayacağı və müvafiq olaraq təşkilatın fəaliyyətinin maliyyələşdirilməsində iştirak etməyəcəyi barədə rəsmi məlumat verib”, - deyə Ermənistan XİN-in bəyanatında qeyd olunur.

Bundan əvvəl Rusiya xarici işlər nazirinin müavini Aleksandr Pankin Ermənistanın 2025-ci ilin sonuna qədər üzvlük haqqını ödəməyəcəyi təqdirdə KTMT-yə üzv dövlətlərin vəziyyətin inkişafı üzrə müxtəlif ssenariləri nəzərdən keçirəcəyini bəyan edib. Xatırladaq ki, Ermənistan ötən ilin mayında təşkilatın 2024-cü il büdcəsini maliyyələşdirməkdən imtina etdiyini rəsmən elan edib. İrəvanın 2024-cü il üçün KTMT-yə üzvlük haqqı 53,22 milyon rubl təşkil edib. Xüsusi bir məqamı da qeyd etmək lazımdır ki, 2023-cü ilin aprel və may aylarında Ermənistan-Azərbaycan sərhədində baş verən toqquşmalardan sonra İrəvan KTMT-yə tam fərqli münasibət sərgiləyir.

Paşinyan nə etməyə çalışır?

Məsələ ilə bağlı politoloq Tural İsmayılov “Yeni Azərbaycan” qəzetinə şərhində qeyd edib ki, Ermənistan hakimiyyəti Qərbdəki havadarlarının tapşırığı əsasında KTMT ilə körpüləri yandırmaq siyasətini həyata keçirir.

“Bu gün Ermənistanda hakimiyyətdə olanlar Ermənistanın Kollektiv Təhlükəsizlik Müqavilə Təşkilatını tərk etməsində maraqlıdırlar və bunu xarici siyasi xətt kimi müəyyənləşdiriblər. Bunun səbəbi budur ki, sorosçu Paşinyan hakimiyyətini himayə edən Qərbdəki dairələr Ermənistanın Rusiyanın rəhbərlik etdiyi hərbi təşkilatda fəaliyyətini davam etdirməsini istəmirlər. Paşinyanın atdığı addımlar məhz bu siyasətə söykənir. Yəni həm hazırki hakimiyyət, həm də Qərbdəki dairələr bütün vasitələrdən istifadə edərək hər vəchlə Ermənistanı Rusiyadan uzaqlaşdırmağa çalışırlar”.

KTMT-ni tərk etmək o qədər asan olmayacaq

“Nəzərə almaq lazımdır ki, Ermənistan müstəqil qərarlar qəbul etmək iqtidarında deyil və azad siyasi idarəetmə meyarlarından çox uzaqdır. Bunun faktiki göstəricisidir ki, Ermənistan istədiyi addımları ata bilmir və əlləri zəifləmiş formada regional siyasət yürüdür. Bir tərəfdən Fransadan daha çox ağır hücum xarakterli silah-sursat və hərbi ləvazimatlar almaq üçün KTMT-nin büdcəsinə maliyyə ayırmaqdan imtina edir, yəni özünü Qərbdəki havadarlarına qərbpərəst siyasətçi kimi təqdim edir, digər yandan isə Ermənistanın Gümrü şəhərində 102-ci hərbi bazanın mövcudluğunu və İrəvanın Rusiyadan iqtisadi və enerji asılılığını görən Paşinyan KTMT-ni tərk etməkdən qorxur,” -deyə T.İsmayılov bildirib.

Politoloq vurğulayıb ki, Paşinyan hakimiyyətinin xarici siyasət kursu Ermənistanı uçuruma apara bilər: “Ermənistan inqilabi addımlar ataraq rəsmi mövqeyini ortaya qoymalı və KTMT ilə münasibətlərə aydınlıq gətirməlidir. Ya KTMT-də fəaliyyətini tamamilə dondurmalıdır, ya da təşkilatı birdəfəlik tərk etməlidir. Paşinyan hakimiyyətinin Rusiya ilə Qərb qüvvələri arasında var-gəl etməsi Ermənistanı çox təhlükəli vəziyyətə düçar edəcək”.

Yunis ABDULLAYEV

Paylaş:

Baxılıb: 394 dəfə