Blinkenin zəngi ABŞ-ın sülh gündəliyini daha da inkişaf etdirmək istəyini nümayiş etdirir

Bakı:

26 °C

70 %

2 m/s

Əlaqə

AZ RU EN

Ana səhifə / Xəbər lenti / Blinkenin zəngi ABŞ-ın sülh gündəliyini daha da inkişaf etdirmək istəyini nümayiş etdirir

Blinkenin zəngi ABŞ-ın sülh gündəliyini daha da inkişaf etdirmək istəyini nümayiş etdirir

21.03.2023 [22:40]

Hazırda dünyada gedən mühüm geosiyasi proseslər fonunda ABŞ-ın Cənubi Qafqaza marağı getdikcə artır. Amerika Birləşmiş Ştatlarının dövlət katibi Antoni Blinken martın 21-də Azərbaycan Respublikasının Prezidenti İlham Əliyevə zəng etməsi də göstərir ki, ABŞ regionda sülhün, təhlükəsizliyin və sabitliyin qorunmasında maraqlıdır. Dövlət katibi Antoni Blinken bir daha vurğulayıb ki, ABŞ Azərbaycanla Ermənistan arasında münasibətlərin normallaşdırılması və sülh müqaviləsinin imzalanması üçün səylərini bundan sonra da davam etdirəcək.

Xüsusilə vurğulamaq lazımdır ki, telefon danışığı əsnasında Azərbaycanın Laçın-Xankəndi yolu ətrafındakı vəziyyət müzakirə olunub. Prezident İlham Əliyev qeyd edib ki, ötən il dekabrın 12-dən bugünədək Rusiya sülhməramlılarının və Beynəlxalq Qırmızı Xaç Komitəsinin xətti ilə buradan 4700-dən artıq nəqliyyat vasitəsinin, tibbi yardıma ehtiyacı olan şəxslərin və onları müşayiət edənlərin keçidi təmin olunub. Yol humanitar məqsədlər üçün açıqdır. Buna görə də bu yolun guya blokadada olması barədə məlumat Ermənistanın yalançı təbliğatıdır.

Bununla yanaşı, Azərbaycan Prezidenti vurğulayıb ki, Ermənistanın Laçın yoluna köməkçi yoldan istifadə edərək Rusiya sülhməramlılarının müvəqqəti yerləşdirildiyi ərazilərimizdə qanunsuz hərbi daşımalar, şəxsi heyətin rotasiyasını həyata keçirməsi, habelə Ermənistan silahlı qüvvələrinin 10 minə yaxın hərbçisinin hələ də Azərbaycan ərazisində olması ciddi narahatlıq doğurur. Bu xüsusda dövlətimizin başçısı Azərbaycanın Laçın yolunun Ermənistanla sərhədinin son nöqtəsində sərhəd-keçid məntəqəsinin yaradılmasının labüdlüyünü xüsusilə vurğulayıb. Sərhəd-keçid məntəqəsinin yaradılması artıq zərurətə çevrilib və bölgənin təhlükəsizliyinin qorunması üçün mühüm əhəmiyyətə malikdir.

Digər tərəfdən, Prezident İlham Əliyev son həftələr ərzində Ermənistan tərəfinin Avropa İttifaqının bu ölkədəki missiyasının yerləşməsindən sui-istifadə edərək vəziyyəti qəsdən gərginləşdirmək istiqamətində siyasət yürütdüyünü, Azərbaycan-Ermənistan dövlət sərhədi boyu və Rusiya sülhməramlılarının müvəqqəti yerləşdirildiyi Azərbaycan ərazilərində Ermənistan silahlı qüvvələri və qanunsuz erməni hərbi birləşmələri tərəfindən atəşkəsin intensiv şəkildə pozulması hallarının müşahidə olunduğunu diqqətə çatdırıb. Azərbaycan Prezidenti bu xüsusda 2023-cü il martın 5-də qeyri-qanuni erməni birləşmələrinin törətdikləri təxribat nəticəsində 2 hərbi qulluqçumuzun şəhid olmasını və Novruz bayramı günü - martın 20-də Azərbaycan-Ermənistan dövlət sərhədinin Zəngilan rayonu ərazisindən keçən hissəsində Ermənistanın növbəti təxribatı nəticəsində Dövlət Sərhəd Xidmətinin hərbi qulluqçusunun yaralandığını qeyd edib. Ermənistanın sistemli şəkildə atəşkəsi pozması və Avropa İttifaqının emissarlarını da təxribat planının tərkibinə daxil etməsi prosesi müşahidə olunmaqdadır. Bütün bu hərbi-siyasi təxribatlara son qoyulmalı və rəsmi İrəvan bütün diqqəti sülh müqaviləsi üzərində işə yönəltməlidir. Digər tərəfdən, Azərbaycanın işğaldan azad edilmiş ərazilərinə Böyük Qayıdış Proqramı üzrə Zəngilan rayonunda “Ağıllı kənd” konsepsiyası əsasında yenidən salınmış Ağalı kəndinə sakinlərin köçürülməsinə başlanmışdır. Bu günlərdə Tərtərin Talış kəndinə də keçmiş məcburi köçkünlərin qayıtması prosesi davam etdirilir. Qarşıdakı dönəmdə Laçına da analoji qayıdış həyata keçiriləcək. Məhz buna görə Azərbaycan-Ermənistan dövlət sərhədinin Zəngilan rayonu ərazisindən keçən hissəsində Ermənistanın növbəti təxribatı Azərbaycanın Böyük Qayıdış konsepsiyasının qarşısını almaq məqsədi daşıyır.

Qeyd edək ki, A.Blinkenlə telefon danışığında Prezident İlham Əliyev vurğulayıb ki, Azərbaycan sülh gündəliyinə tam sadiqdir, Ermənistanla münasibətlərin normallaşdırılmasına və tezliklə sülh müqaviləsinin imzalanmasına hazırdır və son təklif və düzəlişlərinin olduğu sülh müqaviləsinin mətnini Ermənistan tərəfinə təqdim edib.

Təəssüflər olsun ki, Ermənistan bölgədəki destruktiv fəaliyyətini davam etdirir və sülh prosesinə sadiqlik nümayiş etdirmir. Praqa və Soçi görüşlərində Azərbaycanın ərazi bütövlüyünü və suverenliyini qəbul edən Ermənistanın rəhbərliyi sonrakı proseslərdə sülhdən tamamilə uzaq mövqe nümayiş etdirməyə davam etdi.

Prezident İlham Əliyev tərəfindən Münhen Təhlükəsizlik Konfransında bəyan olunduğu kimi hazırda danışıqlar iki istiqamətdə aparılır. Dövlətimizin başçısı Münhendə keçirilmiş görüşün davamı olaraq Azərbaycanın Qarabağdan olan erməni sakinlərlə təmaslara hazır olduğunu və bu xüsusda Azərbaycan Respublikası Prezidentinin Administrasiyası tərəfindən reinteqrasiya üzrə təmasları davam etdirmək və infrastruktur layihələrini müzakirə etmək üçün onların Bakıya dəvət edildiyini də ABŞ dövlət katibi ilə keçirilən telefon danışığında xatırladıb.

Beləliklə, ABŞ-ın dövlət katibi Antoni Blinkenin Prezident İlham Əliyevə zəng etməsi Birləşmiş Ştatların öz sülh gündəliyini daha da inkişaf etdirmək istəyini nümayiş etdirir. ABŞ Bakı və İrəvan arasında birbaşa dialoqun tərəfdarı olduğunu dəfələrlə bəyan edib. Prezident İlham Əliyevlə keçirilən telefon danışığından sonra sosial şəbəkə hesabında Blinken birbaşa danışıqların davamlı sülhə nail olmağın yeganə yolu olduğunu qeyd edib. Bununla yanaşı, İranın regionda hərbi cəhətdən aktivləşməsi müşahidə olunur. İstisna deyil ki, İranın aqressiv davranışlarına qarşı da müzakirələr aparılıb.

Politoloq İlyas Hüseynov

Paylaş:

Baxılıb: 618 dəfə