Dələduzluğun yeni növü...

Bakı:

25 °C

51 %

1 m/s

Əlaqə

AZ RU EN

Ana səhifə / Xəbər lenti / Dələduzluğun yeni növü...

Dələduzluğun yeni növü...

17.02.2023 [10:42]

İnsanlar nələrə diqqət etməlidir?

Yeganə BAYRAMOVA

Axtardığımız məlumatları tapmağın ən asan yolu internetdir. Buna görə gündəlik istifadə etdiyimiz bir çox xidmətlər və sahələr artıq öz fəaliyyətlərini onlayn həyata keçirir. İnsanlar iş axtarmaq və yaxud hansısa məhsulları almaq üçün elan verilən saytlara müraciət edirlər. Ancaq son zamanlar elan saytlarında yeni dələduzlar peyda olub.

Araşdırmaya əsasən, vətəndaşlar iş tapmaq üçün “tap.az”, “rabota.az”, “boss.az” və.s kimi elan saytlarına müraciət edir. İkinci əl və münasib qiymətli məhsulu əldə etmək istəyənlər isə əsasən “lalafo.az” saytına daxil olurlar. Düzdür, bir çox insan bu saytların effektiv ola biləcəyinə inanmır, buna baxmayaraq, insanların əksəriyyəti həmin dələduzların “tor”una düşür.

“Yaxşı ki, vaxtında hisslərimə güvəndim”

Tamilla Məmmədova adlı şəxs elan saytları vasitəsilə iş tapmaq istəsə də, buna nail ola bilməyənlərdəndir. “Tələbə olduğum müddətdən müxtəlif saytlarda iş axtarmışam. Bacarıqlarıma uyğun işlər tapıb, bir neçə dəfə müsahibəyə dəvət edilsəm də bunun nəticəsini görə bilmədim. Onu da deyim ki, saytlar vasitəsilə qurumlar yalnız yaxşı niyyətlə işçi axtarmır. Öz təcrübəmə əsaslanaraq əminliklə deyə bilərəm ki, bu növ saytlar dələduzların məkanıdır. Bir dəfə elan saytlarının birində yüksək maaşlı vakansiya gördüm. CV-mi müzakirə etmək üçün qurumun ofisinə dəvət edildim və qəribə mənzərə ilə qarşılaşdım. Yaxşı mühit, hamı bir-biri ilə həddindən artıq səmimi olan insanlar. Nə qədər cəhd göstərsəm də, qeydiyyat şöbəsindən şirkətin adını dəqiq öyrənə bilmədim. Qısaca, nə vakansiya, nə də şirkət barədə məlumat əldə edə bilmirdim. Yanımda şəxsiyyət vəsiqəmi də götürməmişdim. Əslində, vəsiqəmi şirkət nümayəndələrinə təqdim etsəydim, bəlkə vəziyyət daha da gərginləşə bilərdi. İki gün həmin ofisə getdim, oranın gülərüz kollektivi və yüksək maaş vədlərinə aldandım. Əslində, həmin şirkət adı bilinməyən dərmanların satışı ilə məşğul idi və məhsullarını daha çox insana təqdim etmək üçün əməkdaş axtarırdı. Burada işə başlamaq istəyənlər əvvəlcə şirkət tərəfindən təşkil olunan ödənişli kursu keçməli və bir neçə bahalı kitab almalı idilər. Bütün bu səmimilik də məhz buna görə imiş. Yaxşı ki, vaxtında hisslərimə güvəndim və oradan birdəfəlik uzaqlaşdım. Təəssüf ki, bu ofisə yalnız mən yox, onlarla mənim kimi insan eyni vakansiyanı bir neçə saytda görüb gəlmişdi. Ümid edirəm ki, başıma gələnləri oxuduqdan sonra saytlarda yüksək maaşlı vakansiyanı görüb aldanan insanlar bir daha fikirləşərlər”.

Ziyan 500 manatdan çoxdursa...

Hüquqşünas Nadir Məmmədovun sözlərinə görə, bu gün elan saytlarında bəzi dələduzlara aldanan vətəndaşların sayı az deyil: “Bir çoxları müxtəlif elan saytlarında vətəndaşları peşəkarcasına aldatmaqla məşğuldurlar. Kimisi işlə bağlı vakansiya, kimisi kirayə mənzil, kimisi də hansısa məshulların satışına dair elan verərək insanlara maddi ziyan vurur. Qanunvericilikdə isə bunun adı dələduzluqdur. Dələduzluq-etibardan sui-istifadə etmə və ya aldatma yolu ilə özgənin əmlakını ələ keçirmə və ya əmlak hüquqlarını əldə etməklə törədilən cinayətdir.

Həmin cinayət çoxşaxəli olub, bütün hallarda törədilmə üsulundan asılı olmayaraq özgə əmlakına ziyan vurmaqla nəticələnir. Belə hallara yol verənlər Cinayət Məcəlləsinin 178-ci dələduzluq maddəsi ilə məsuliyyətə cəlb olunurlar. Ziyan 500 manatdan az olduqda şəxs inzibati məsuliyyətə cəlb olunur.

Ziyan 500 manatdan çox olduqda isə həmin şəxs barəsində Cinayət Məcəlləsinin 178.1.2 (təkrar dələduzluq),178.1.3 (xeyli miqdarda ziyan vurmaqla dələduzluq) maddəsi ilə həbs qətimkan tədbiri seçilir”.

Paylaş:

Baxılıb: 428 dəfə