Yeni casus şəbəkəsi ifşa edildi

Bakı:

12 °C

94 %

2 m/s

Əlaqə

AZ RU EN

Ana səhifə / Xəbər lenti / Yeni casus şəbəkəsi ifşa edildi

Yeni casus şəbəkəsi ifşa edildi

15.11.2022 [10:40]

DTX İranın xüsusi xidmət orqanları tərəfindən məxfi əməkdaşlığa cəlb olunan şəxsləri həbs edib

Xəbər verildiyi kimi, İran İslam Respublikası xüsusi xidmət orqanları nümayəndələrinin Azərbaycan Respublikasına qarşı həyata keçirdiyi kəşfiyyat-pozuculuq fəaliyyətinin qarşısının alınması, yaradılmış casus şəbəkəsinin ifşa olunması istiqamətində Dövlət Təhlükəsizliyi Xidməti (DTX) tərəfindən kompleks əməliyyat-istintaq tədbirləri davam etdirilir. Xatırladaq ki, bu ayın əvvəlində İran xüsusi xidmət orqanları tərəfindən Azərbaycan Respublikası vətəndaşlarının gizli şəkildə ölkə hüdudlarından kənarda hərbi təlimlərə cəlb olunması, onların maliyyələşdirilməsi və fəaliyyətlərinin istiqamətləndirilməsi, Azərbaycan Respublikasının dövlət təhlükəsizliyi maraqlarına zidd olaraq istifadə edilməsi məqsədilə şantaj və digər zorakı üsullarla təsir dairəsində saxlanılması halları ilə bağlı Dövlət Təhlükəsizliyi Xidməti (DTX) tərəfindən kompleks araşdırma tədbirləri görülmüşdü.

Hərbi Dəniz Qüvvələrinin keçirdiyi təlimlərin yeri və vaxtı, neft platformalarına daşınan yüklər barədə məlumatlar...

DTX-nin mətbuat xidmətinin yaydığı məlumata görə, həyata keçirilmiş tədbirlər nəticəsində müəyyən edilib ki, Xəzər Dəniz Neft Donanmasında gəmi kapitanı vəzifəsində işləyən Əsgərov Zahir Fəxrəddin oğlu İranın Qum şəhərində dini təhsil aldığı müddətdə maddi maraq müqabilində həmin ölkənin xüsusi xidmət orqanı nümayəndələri tərəfindən məxfi əməkdaşlığa cəlb olunub. O, ötən dövrdə onların tapşırığı ilə Azərbaycan Respublikasının suverenliyi və müdafiə qabiliyyətinin zərərinə istifadə etmək üçün xarici dövlətlərin ölkəmizdə fəaliyyət göstərən şirkət və nümayəndəlikləri, Xəzər dənizində Hərbi Dəniz Qüvvələrinin keçirdiyi təlimlərin yeri və vaxtı, neft platformalarına daşınan yüklər barədə məlumatlar toplayıb. Zahir Əsgərov həmin məlumatları mobil telefon vasitəsilə, eləcə də İranda həmin şəxslərlə görüşlər zamanı bilavasitə təqdim etməklə casusluq formasında dövlətə xəyanət edib.

Hava limanlarında saxlanılan pilotsuz uçuş aparatları, tankların və müxtəlif hərbi avadanlıqların olduğu ərazilər...

Başqa bir araşdırma ilə müəyyən edilib ki, Rəsulov Elnur Akif oğlu 2018-ci ildə müalicə məqsədilə İranda olarkən orada özünü “Meyse” və “Doktor” adları altında təqdim edən bu ölkənin xüsusi xidmət orqanı nümayəndələri ilə məxfi əməkdaşlıq barədə sövdələşib. Elnur Rəsulov əvvəlcə bilavasitə, daha sonra məxfi əməkdaşlığa cəlb etdiyi qohumu Rəsulov Arif Əmrah oğlu ilə birlikdə müxtəlif məbləğlərdə ödəniş qarşılığında verilən tapşırıqları icra edərək Bakı şəhəri Qaradağ rayonunda neft və qaz boru kəmərlərinin keçdiyi ərazilərin, hava limanlarında saxlanılan Müdafiə Nazirliyi və Dövlət Sərhəd Xidmətinə aid pilotsuz uçuş aparatlarının, tankların və müxtəlif hərbi avadanlıqların olduğu ərazinin, Bakı şəhərində “Texnofest” Aviasiya, Kosmik və Texnologiya festivalında nümayiş etdirilmiş texnikaların, Bakıda, həmçinin Salyan və Füzuli rayonlarında yerləşən strateji və hərbi obyektlərin, zenit-raket komplekslərinin, eləcə də digər radar-nəzarət qurğularının fotoşəkillərini və videoçəkilişlərini “WhatsApp” ani mesajlaşma sistemi vasitəsilə xüsusi xidmət orqanının nümayəndəsinə göndərib.

Maddi maraq müqabilində məxfi əməkdaşlıq

Eyni zamanda müəyyənləşdirilib ki, Azərbaycan Respublikası vətəndaşı Ağazadə Bəxtiyar Rafiq oğlu dini təhsil almaq üçün İranda olarkən orada həmin ölkənin xüsusi xidmət orqanının nümayəndələri ilə maddi maraq müqabilində məxfi əməkdaşlığa başlayıb, onların tapşırığı ilə xarici dövlətlərin Azərbaycanda fəaliyyət göstərən nümayəndəlikləri, ölkədə baş verən ictimai-siyasi proseslər, hərbi hissələr, onların yerləşdiyi yerlər və təyinatları, o cümlədən komanda heyəti barədə əldə etdiyi məlumatları toplayaraq İran xüsusi xidmət orqanına verməklə dövlətə xəyanət etməsinə dair əsaslı şübhələr yaranıb.

Həmçinin müəyyən edilib ki, Cəfərzadə Mirhafiz Mirisaq oğlu İran xüsusi xidmət orqanlarının nəzarəti altında törətdiyi cinayət əməllərinə görə 2018-ci ildən barəsində məhkəmə qərarı ilə həbs qətimkan tədbiri seçilməklə beynəlxalq axtarışa verilmiş, hazırda İranda gizlənən Məmmədov Orxan Kəmran oğlunun Azərbaycanın dövlət təhlükəsizliyi və müdafiə qabiliyyətinin zərərinə verdiyi tapşırıqların yerinə yetirilməsi istiqamətində fəaliyyət göstərərək hərbi təyinatlı obyektlərin yerləşdiyi əraziləri dəqiqləşdirməklə onların lokasiyasını və digər məlumatları “Teleqram” tətbiqi sistemi vasitəsilə sonuncuya göndərib.

Azərbaycan Respublikasının vətəndaşları Zahir Əsgərov, Elnur Rəsulov, Arif Rəsulov, Mirhafiz Cəfərzadə və Bəxtiyar Ağazadə Azərbaycan Respublikası Cinayət Məcəlləsinin 274-cü (dövlətə xəyanət) maddəsi ilə cinayət məsuliyyətinə cəlb edilərək həbs olunublar.

“Müzakirələr”, “Elanlar - “WhatsApp”da xəyanətkar qruplar...

Araşdırmalar zamanı İran xüsusi xidmət orqanının tapşırığı əsasında fəaliyyət göstərən, barələrində olan cinayət işləri üzrə məsuliyyətdən yayınaraq İranda gizlənən Tohid İbrahimbəyli, Orxan Məmmədov, Elşad Hacıyev və digərləri tərəfindən təsir dairəsində saxlanılan Azərbaycan vətəndaşlarının üzv kimi cəlb edildiyi “Müzakirələr”, “Elanlar” və digər adlar altında “WhatsApp” tətbiqində yaradılmış qapalı qruplar ifşa edilib. Məlum olub ki, bu qruplar vasitəsilə müasir beynəlxalq hüquqla tanınan insan hüquqlarına, Azərbaycan Respublikasının Konstitusiyasına zidd, Azərbaycanda dini dövlətin yaradılmasına hesablanan radikal, dini-ekstremist ideyaların yayılması həyata keçirilib. Hazırda Dövlət Təhlükəsizliyi Xidmətində kompleks istintaq-əməliyyat tədbirləri davam etdirilir.

İran Azərbaycandan qorxduğunu aşkar şəkildə ortaya qoyur

Məsələ ilə bağlı fikirlərini bölüşən politoloq Qabil Hüseynli bildirib ki, İranın ölkəmizdə törətməyə çalışıdığı təxribatların qarşısı uğurla alınır. Onun sözlərinə görə, ötən dövrdə İran ölkəmizə qarşı çirkin planlar qurub və planlarda da bəzi şəxslərdən maddi maraq qarşılığında yararlanıb: “Keçirilən əməliyyat birinci deyil. Bunun üçün İranın Azərbaycandakı səfirliyi cavab verməlidir. Deyim ki, baş verənlərin, hazırlanan təxribatların səfirliklə bağlılığına əminlik böyükdür. Ümumiyyətlə, İranın Azərbaycandakı səfirliyi hər zaman ölkəmizə qarşı təxribat yuvası funksiyasını həyata keçirib. Bu səfirlik hər zaman Azərbaycan dövlətçiliyinə qarşı müxtəlif qruplaşmaların təşkil edilməsində, onların təbliğati-ideoloji materiallarla təmin olunmasında və istiqamətləndirilməsində böyük rol oynayıb. Artıq böyük bir şəbəkə DTX tərəfindən ifşa edilib. Fikrimcə, bu çox böyük təxribat hadisəsidir. Əldə edilmiş faktlar isə İranın Azərbaycandakı səfirliyinin bu işdə əlinin olduğunu göstərir. Fikrimcə, bu səfirliklə bağlı mühüm addımlar atılmalıdır. Bu fakt hətta İranla diplomatik əlaqələrə də yenidən baxmağı ortaya qoyur. Bu təxribat yuvasını tam ifşa edib dünya ictimaiyyətinə tanıtmaq lazımdır. Onlar hətta müəyyən televiziya və radio verilişləri vasitəsilə də Azərbaycana qarşı təxribatlar törədir, təbliğat aparırlar. Biz bu məsələlərə də baxmalıyıq. İran bizə açıq kartlarla bütün istiqamətlərdən hücum edir. Biz da lazımi cavabı verməliyik. Təəssüfləndirici haldır ki, bəzi vətəndaşlarımız maddi maraq qarşılığında bu kimi təxribatlarda yer alırlar. İran bu addımları ilə bir daha Azərbaycandan qorxduğunu aşkar şəkildə ortaya qoyur. Bu gün İranın daxilində vəziyyət qeyri-stabildir və rejim sonunun çatdığını anlayır. Onlar anlayırlar ki, müstəqil, dünyada böyük imic qazanan Azərbaycan dövləti cənubdakı 40 milyondan çox azərbaycanlı üçün ruhlandırıcı nümunədir, İrandakı azərbaycanlıların müstəqil dövlət qurmaq uğrunda mübarizəsinə stimul verən vasitədir. Ona görə də Azərbaycan dövlətini sıradan çıxarmağa çalışırlar ki, bunu da bacara bilməzlər”.

SADİQ

Paylaş:

Baxılıb: 599 dəfə