Milli Məclisin sədri Ermənistan təxribatları ilə əlaqədar beynəlxalq təşkilatlara müraciət ünvanlayıb

Bakı:

21 °C

57 %

5 m/s

AZ RU EN

Ana səhifə / Xəbər lenti / Milli Məclisin sədri Ermənistan təxribatları ilə əlaqədar beynəlxalq təşkilatlara müraciət ünvanlayıb

Milli Məclisin sədri Ermənistan təxribatları ilə əlaqədar beynəlxalq təşkilatlara müraciət ünvanlayıb

14.09.2022 [21:39]

Milli Məclisin sədri Sahibə Qafarova Ermənistan tərəfindən Azərbaycan-Ermənistan dövlət sərhədində törədilən təxribatla əlaqədar beynəlxalq təşkilatlara müraciət ünvanlayıb.

Milli Məclisin Mətbuat və ictimaiyyətlə əlaqələr şöbəsindən bildiriblər ki, Parlamentlərarası İttifaqın Prezidentinə və Baş katibinə, Avropa Parlamentinə, ATƏT PA-ya, MDB PA-ya, İslam Əməkdaşlıq Təşkilatının Parlament Assambleyasına, İqtisadi Əməkdaşlıq Təşkilatının Parlament Assambleyasına, Asiya Parlament Assambleyasına, Qara Dəniz İqtisadi Əməkdaşlıq Təşkilatının Parlament Assambleyasına, GUAM PA-ya ünvanlanmış məktublarda sentyabrın 12-də gecə saatlarından etibarən Ermənistanın Azərbaycana qarşı növbəti hərbi təxribata başladığı qeyd olunub. Bildirilib ki, Ermənistan silahlı qüvvələri Azərbaycan-Ermənistan dövlət sərhədinin Daşkəsən, Kəlbəcər və Laçın rayonları istiqamətində Azərbaycan Ordusunun mövqelərini intensiv atəşə tutublar. Ermənistan tərəfinin bu təxribatına cavab olaraq Azərbaycan tərəfindən cavab tədbirləri görülüb. Təxribatın qarşısının alınması zamanı 50 hərbçimiz şəhid olub.

Milli Məclisin sədri diqqətə çatdırıb ki, Ermənistan üçtərəfli bəyanatların müddəalarını və əldə olunmuş razılaşmaları kobud şəkildə pozaraq silahlı birləşmələrini Azərbaycan ərazisindən tam çıxarmayıb, Azərbaycanın ərazilərinin minalanmasını davam etdirib, bölgəyə ağır texnika və müxtəlif çaplı silahlar yerləşdirərək, sərhədboyu mövqelərimizi atəşə tutub.

Müraciətdə vurğulanıb ki, Azərbaycanın regionda uzunmüddətli sülh və sabitliyin təmin olunması istiqamətində səylərinə və təkliflərinə zidd olaraq, Ermənistan normallaşma prosesini müxtəlif bəhanələrlə ləngidir, beynəlxalq səylərlə aparılan danışıqlarda destruktiv mövqe nümayiş etdirir, regionda kommunikasiyaların və nəqliyyat marşrutlarının açılması prosesinə maneələr yaradır. Bütün bunlar Ermənistanın sülh prosesində maraqlı olmadığını və prosesə zərbə vurmaq niyyətini nümayiş etdirir.

Sənəddə qeyd olunur ki, hazırda Azərbaycan işğaldan azad edilmiş ərazilərində külli miqdarda sərmayələr hesabına genişmiqyaslı bərpa və yenidənqurma işləri həyata keçirir. Artıq bu ərazilərə bir qrup məcburi köçkün ailələrinin geri qayıtması prosesinə başlanılıb. Ermənistan öz təxribatları ilə bu prosesə də əngəl törədir.

Bildirilir ki, Azərbaycanın vəziyyətin sabitləşdirilməsi və gərginliyin aradan qaldırılması üçün zəruri addımlar atmasına baxmayaraq, Ermənistan əldə olunmuş atəşkəsi pozmağa davam edir. Baş vermiş təxribat, qarşıdurma və itkilərə görə bütün məsuliyyət Ermənistanın siyasi-hərbi rəhbərliyinin üzərinə düşür.

S.Qafarovanın müraciətində qeyd edilir ki, Azərbaycan tərəfi beynəlxalq ictimaiyyəti Ermənistanın regionda uzunmüddətli sülh və sabitliyin təmin olunması istiqamətindəki səylərə qarşı yönəlmiş bu addımlarını qınamağa çağırır.

Paylaş:

Baxılıb: 542 dəfə