“Həmrəylik günü bizim üçün təsəlli və qürur mənbəyidir”

Bakı:

27 °C

48 %

6 m/s

Əlaqə

AZ RU EN

Ana səhifə / Xəbər lenti / “Həmrəylik günü bizim üçün təsəlli və qürur mənbəyidir”

“Həmrəylik günü bizim üçün təsəlli və qürur mənbəyidir”

31.12.2021 [00:59]

Xaricdəki soydaşlarımız həmrəylik gününü fərqli qeyd edirlər

Bu gün 50 milyonluq xalqın nümayəndəsi olduğumuzu bir daha hiss edirik

Günel Abbas

1991-ci il dekabrın 16-da Naxçıvan Muxtar Respublikası Ali Məclisinin Heydər Əliyevin sədrliyi ilə keçən iclasında 31 dekabrın dünya azərbaycanlılarının həmrəylik bayramı kimi qeyd olunması barədə qərar qəbul edilib. Ali Məclis bununla bağlı qanunvericilik aktının qəbul olunması üçün ölkə parlamentinə - Ali Sovetə müraciət edib. Dekabrın 25-də Azərbaycan Respublikası Ali Sovetinin Milli Şurası müraciəti nəzərə alaraq, dekabrın 31-nin Dünya Azərbaycanlılarının Həmrəyliyi Günü elan olunması barədə Qanun qəbul edib.

2001-ci il noyabrın 9-10-da Bakıda Dünya Azərbaycanlılarının I Qurultayı keçirilib. Qurultay soydaşlarımızın milli mənlik şüurunun güclənməsinə, müxtəlif ölkələrdə azərbaycanlı icmalarının mütəşəkkilliyinin və fəallığının artmasına təsir göstərib. Bu, ölkənin ictimai-siyasi həyatında yeni bir hərəkat, dövlət siyasətinin yeni bir istiqaməti idi. Həmin qurultayda Ulu Öndərin böyük iftixarla söylədiyi “Mən həmişə fəxr etmişəm, bu gün də fəxr edirəm ki, mən azərbaycanlıyam!” kəlamı isə dillər əzbərinə çevrilib.

Qurultaydan sonra ümummilli lider Heydər Əliyevin 2002-ci il 5 iyul tarixli Fərmanı ilə xaricdəki soydaşlarımızla əlaqələrin genişləndirilməsi və inkişaf etdirilməsi məqsədilə Xarici Ölkələrdə Yaşayan Azərbaycanlılarla İş üzrə Dövlət Komitəsinin (hazırda Diasporla İş üzrə Dövlət Komitəsi) yaradılması, həmin il dekabrın 27-də isə soydaşlarımızla bağlı dövlət siyasəti haqqında Qanunun qəbul edilməsi dünya azərbaycanlılarının milli birliyi və təşkilatlanması prosesini daha da gücləndirib.

Yorulmaz fəaliyyəti ilə Heydər Əliyev siyasi fəlsəfəsinə, onun liderlik məktəbinə söykənən Prezident İlham Əliyev Ulu Öndərin bu sahədəki xidmətlərini uğurla davam etdirir. Dövlətimizin başçısının “Dünya azərbaycanlılarının II Qurultayının keçirilməsi haqqında” 2006-cı il 8 fevral tarixli Sərəncamına uyğun olaraq, həmin il martın 16-da Bakıda keçirilən növbəti mötəbər toplantı xaricdə yaşayan azərbaycanlıların diaspordan lobbiyə çevrilməsi istiqamətində yeni addım olub, ölkəmizlə bağlı həqiqətlərin dünya ictimaiyyətinə çatdırılması işində əhəmiyyətli rol oynayıb.

Diasporumuzun təşkilatlanması prosesi bu gün daha sürətlə gedir. Dünya Azərbaycanlılarının I Qurultayında yaradılmış Əlaqələndirmə Şurasının 2008-ci il dekabrın 18-də Bakıda keçirilmiş iclası, toplantıda “Dünya Azərbaycanlılarının Xartiyası”nın qəbulu birlik və mütəşəkkilliyinin artması, tarixi Vətənlə əlaqələrinin möhkəmlənməsi, diaspor potensialının möhkəm amilə çevrilməsini göstərməklə yanaşı, müstəqil Azərbaycanın bütün dünya azərbaycanlıları üçün cazibə mərkəzi olduğunu da bir daha təsdiqləyib.

Dövlətimizin diaspor siyasəti, həmvətənlərimizin birlik və həmrəyliyinin möhkəmləndirilməsi, onların daha mütəşəkkil formada təşkilatlanması prosesi özünün yeni mərhələsinə qədəm qoyub. Artıq dünya azərbaycanlıları yaşadıqları ölkələrin sosial-iqtisadi, ictimai-siyasi və mədəni həyatında daha fəal rol oynayır, respublikamızla qarşılıqlı əlaqələrin genişlənməsinə böyük töhfə verir, Azərbaycan həqiqətlərinin dünya ictimaiyyətinə çatdırılmasında, zəngin mədəni irsimizin təbliğində, təcavüzkar erməni dairələrinin ideoloji təxribatlarının qarşısının alınmasında qətiyyət nümayiş etdirirlər. Onlar Azərbaycan dövlətinin dəstəyi sayəsində qardaş və dost xalqların lobbi və diasporları ilə səmərəli əməkdaşlığın qurulması sahəsində təsirli tədbirlər həyata keçirir, Azərbaycanın, xalqımızın tarixini yazır və nəsillərdən-nəsillərə ötürürlər.

Ukrayna Azərbaycanlıları Radasının (UAR) baş katibi Ceyhun Məmmədov “Yeni Azərbaycan” qəzetinə xaricdə yaşayan həmvətənlərimizin yeni ili qeyd etməsindən və Ukraynada bu münasibətlə keçirilən tədbirlərdən danışdı: “Bu bayramı qeyd edərkən 50 milyonluq xalqın nümayəndəsi olduğumuzu bir daha hüceyrələrimizə qədər hiss edirik. Bu onu göstərir ki, xalqımız 250 milyonluq Türk Dünyası içərisində böyük bir qolu əhatə edir. Bu günü biz tamamilə fərqli hisslərlə qeyd edirik. Çünki bu bayramın əsli də elə ayrılıqdan başlayır, kökündə isə ayrılığın bitməyi dayanır. Xaricdə yaşayan həmvətənlərimiz üçün həmrəylik günü bir növ təsəlli və qürur mənbəyidir. Torpaqlarımızı azad edəndən sonra isə bu günü daha ürəkli qeyd edirik, çünki Vətənin bir ayrılığına son qoymuşuq. Həmişə bu bayramda Söhrab Tahirin bir sözü yadıma düşür, deyir, ayrılmaqdan elə qorxuram ki, iki çöpü də bir-birindən ayırmaq istəmirəm. Xalqımıza və bütün insanlığa birlik, bərabərlik, həmrəylik arzu edirəm”.

Baş katib qeyd edib ki, UAR-a bağlı olan kollektiv üzvləri dekabr ayının ortalarından başlayaraq, həmrəylik günü ilə bağlı bir sıra rəsmi tədbirlər həyata keçirib: “Poltavada həmrəylik günü münasibətilə kikboksinq yarışı, Diasporla İş üzrə Dövlət Komitəsinin iştirakı ilə Odessa azərbaycanlıları birliyinin tədbiri, Kiyevdə Diasporla İş üzrə Dövlət Komitəsi əməkdaşlarının iştirakı ilə Ukrayna Azərbaycanlıları Radası İdarə Heyətinin görüşü, həmçinin Xarkov-Dostluq görüşü və Kiyev futbol turniri keçirildi. “Xarı-bülbül” Mədəniyyət və Təhsil Mərkəzinin kollektivi dekabrın 26-da Xarkovda tələbələrimiz və onların valideynləri üçün gözəl bayram təşkil etdi. Azərbaycan Respublikasının Ukraynadakı Səfirliyi məşhur Azərbaycan xalçaçı-rəssamı Eldar Hacıyevin Dünya Azərbaycanlılarının Həmrəyliyi Gününə həsr olunmuş sərgisini, həmçinin “Diplomatic Kiev” jurnalının dekabr nömrəsinin təqdimatını keçirdi”.

Paylaş:

Baxılıb: 1048 dəfə