Multikulturalizm Mərkəzi “Biz birlikdə güclüyük” mövzusunda tədbir keçirib

Bakı:

28 °C

54 %

3 m/s

Əlaqə

AZ RU EN

Ana səhifə / Xəbər lenti / Multikulturalizm Mərkəzi “Biz birlikdə güclüyük” mövzusunda tədbir keçirib

Multikulturalizm Mərkəzi “Biz birlikdə güclüyük” mövzusunda tədbir keçirib

12.11.2025 [23:01]

Bakı Beynəlxalq Multikulturalizm Mərkəzi (BBMM) 8 Noyabr - Zəfər Gününün 5 illiyinə həsr edilən “Biz birlikdə güclüyük” mövzusunda tədbir keçirib. Azərbaycan Respublikasının Dövlət Himninin səsləndirilməsi ilə başlayan tədbirdə Ulu Öndər, müasir müstəqil Azərbaycanın qurucusu Heydər Əliyevin və Vətənimizin ərazi bütövlüyü, suverenliyi uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.

Sonra BBMM-in hazırladığı “Vətənimiz” sənədli filmi nümayiş olunub.

Tədbirdə çıxış edən BBMM-in icraçı direktoru Rəvan Həsənov bildirib ki, bu gün tariximizin ən şanlı səhifələrindən birini - Vətən müharibəsində əldə etdiyimiz Qələbənin 5-ci ildönümünü böyük qürur və iftixar hissi ilə qeyd edirik. Müzəffər Ali Baş Komandan, Azərbaycan Respublikasının Prezidenti cənab İlham Əliyevin rəhbərliyi ilə xalqımız 44 gün ərzində əzmini, birliyini, milli həmrəyliyini nümayiş etdirərək işğal altında olan torpaqlarımızı azad etdi, tarixi Zəfər qazandı. Zəfər Günü təkcə hərbi qələbənin deyil, eyni zamanda xalqımızın mənəvi birliyinin, vətənə sədaqətinin və milli iradəsinin təntənəsidir. Bakı Beynəlxalq Multikulturalizm Mərkəzi bu tarixi günü “Biz birlikdə güclüyük” şüarı altında qeyd etməklə həm ölkəmizdə, həm də beynəlxalq müstəvidə birliyin, həmrəyliyin və qarşılıqlı hörmət dəyərlərinin vacibliyini bir daha vurğulayır. Çünki Azərbaycan xalqının Zəfəri həm də milli və mənəvi birliyimizin, gücümüzün parlaq təzahürüdür. Zəfər Günü ilə bağlı “Azərbaycan multikulturalizmi” fənninin tədris olunduğu xarici ölkə universitetlərində də silsilə tədbirlər keçirilib.

Rəvan Həsənov diqqətə çatdırıb ki, Vətən müharibəsindəki Zəfərimizin arxasında duran ideya birlik, qardaşlıq idi. Təsadüfi deyil ki, Şanlı Zəfərimizdən sonra Qarabağda, Şuşada keçirilən ilk mədəni tədbir xalqların birliyini tərənnüm edən “Xarı Bülbül” festivalı oldu. Bu gün Zəfər qazanmışıq, suverenliyimizi tam bərpa etmişik, lakin Azərbaycanın ərazi bütövlüyünü pozmaq istəyən qüvvələr yenə də öz məkrli mövqelərindən geri durmurlar. Bu səbəbdən Azərbaycan Respublikasının vətəndaşları dinindən, dilindən, etnik mənsubiyyətindən asılı olmayaraq öz həmrəyliyini daim qorumalıdır.

BBMM-in Himayəçilik Şurasının üzvü, Xalq yazıçısı Elmira Axundova diqqətə çatdırıb ki, Ulu Öndər Heydər Əliyevin “Azərbaycanın dövlət müstəqilliyi əbədidir, dönməzdir, sarsılmazdır” kəlamı bu gün real həqiqətə çevrilib. O qeyd edib ki, Vətən müharibəsi günlərində milliyyətindən, dinindən, dilindən asılı olmayaraq bütün vətəndaşlarımız bir amal uğrunda - Azərbaycanın Qələbəsi naminə birləşdilər. Müxtəlif etnik və dini icmaların nümayəndələri eyni səngərdə vuruşdu, Vətən üçün can qoydu. Bu, Azərbaycan multikulturalizminin, xalqımızın mənəvi gücünün ən gözəl təzahürüdür. Azərbaycan artıq postmünaqişə dövründədir, lakin bu dövrdə də mənəvi birliyimizə, multikultural dəyərlərimizə sadiq qalmaq, onları daha da möhkəmləndirmək mühüm vəzifə olaraq qalır. Çünki bu dəyərlər bizim milli kimliyimizin ayrılmaz hissəsidir.

Digər çıxış edənlər - Mətbuat Şurasının sədri Rəşad Məcid, Milli Məclisin deputatları Vüqar Rəhimzadə, Rizvan Nəbiyev, Mixail Zabelin, Qafqaz Müsəlmanları İdarəsinin sədrinin müavini Fuad Nurullayev, Alban-Udi Xristian Dini İcmasının sədri Robert Mobili, tat icmasının nümayəndəsi, Qarabağ qazisi, polkovnik-leytenant Hümmət Bəndiyev, ləzgi icmasının nümayəndəsi, Vətən müharibəsi iştirakçısı polkovnik Rəşad Aslanov, şəhid Məhəmməd Murtuzovun atası, avar icmasının nümayəndəsi Ramazan Murtuzov, AMEA Fəlsəfə və Sosiologiya İnstitutunun “İslam fəlsəfəsi” şöbəsinin aparıcı elmi işçisi, talış icmasının nümayəndəsi, Qarabağ qazisi, ehtiyatda olan leytenant Radif Mustafayev bildiriblər ki, Vətən müharibəsində əldə etdiyimiz möhtəşəm Zəfər Ali Baş Komandan, Prezident İlham Əliyevin uzaqgörən siyasəti, rəşadətli Ordumuzun qəhrəmanlığı və xalqımızın bir yumruq kimi birləşməsi sayəsində mümkün oldu. Bu Qələbə Azərbaycanın müstəqillik tarixində yeni bir mərhələ açdı, xalqımızın milli kimliyini, vətənpərvərlik ruhunu daha da möhkəmləndirdi. Diqqətə çatdırılıb ki, müxtəlifliyimiz bizim zənginliyimizdir, həmrəyliyimiz isə gücümüzdür. Azərbaycan bu dəyərləri ilə regionda və dünyada sülhün, tolerantlığın və qarşılıqlı hörmətin nümunəsinə çevrilib.

Paylaş:

Baxılıb: 744 dəfə