2023 Formula 1 Azərbaycan Qran Prisinin növbəti ulduzu dünyaca məşhur musiqiçi olacaq

Bakı:

13 °C

82 %

5 m/s

Əlaqə

AZ RU EN

Ana səhifə / Formula 1 / 2023 Formula 1 Azərbaycan Qran Prisinin növbəti ulduzu dünyaca məşhur musiqiçi olacaq

2023 Formula 1 Azərbaycan Qran Prisinin növbəti ulduzu dünyaca məşhur musiqiçi olacaq

29.03.2023 [16:35]

2023 Formula 1 Azərbaycan Qran Prisinin növbəti ulduzu dünyaca məşhur DJ Don Diablo olacaq

Bakı Şəhər Halqası Əməliyyat Şirkətindən (BŞH) verilən məlumata görə, tanınmış musiqiçi aprelin 28-i, cümə günü Bakıda səhnə alacaq.

Dünyaca məşhur musiqiçi, prodüser, elektronik rəqs musiqisi bəstəkarı və DJ - Don Diablo 28 aprel, cümə günü Dənizkənarı Bulvar ərazisində yerləşən səhnədə Formula 1 həftəsonunun açılışını edərək öz yüksək templi canlı şousunu sərgiləyəcək. Bununla da, Bakı yarışı əyləncəsevərləri daha bir gözlənilməz konsert proqramı ilə sevindirəcək. Həmyerlisi DJ Hardwell ilə yanaşı Don Diablonun da çıxış edəcək ulduzların siyahısına əlavə edilməsi F1 azarkeşlərinə Bakıda daha bir unudulmaz həftəsonu yaşadacaq.

Dünyada böyük rəğbət görən prodüser Dua Lipa, Justin Biber, Gucci Mane, Ed Sheeran, Mark Ronson, Travis Barker, Miley Cyrus, Rihanna, Madonna, Ty Dolla $ign, The Chainsmokers və Coldplay kimi bir çox meqa ulduzlar ilə əməkdaşlıq etmişdir.

Bundan başqa, sənətçi 2015-ci ildə özünün musiqi şirkətini qurmuş və bununla da gənc istedadların yetişdirilməsinə öz töhfəsini vermişdir. Digər sahələrdə eksperiment etməkdən çəkinməyən sənətçi, həmçinin, öz dizaynı olan geyim brendinin də sahibidir. Onun digər yaradıcı layihələrinin arasında eyni adlı yarı avtobioqrafik, elmi-fantastik xarakter daşıyan karikatura seriyası da var.

Onun elektronik musiqi səhnəsinə bəxş etdiyi əvəzolunmaz töhfələri göz önündə olsa da, o, fiziki və rəqəmsal dünya, eləcə də, nostalgiya ilə gələcək arasında körpü rolunu oynayan kripto-incəsənət əsərləri yaratmaqla məşhurlaşaraq 2021-ci ilin mart ayında NFT (rəqəmsal sənət nümunələri) sahəsində də özünü sınamışdır. “GΞNΞSIS NFT” – holoqrafik musiqi nümunəsi və “DΞSTINATION HΞXAGONIA” – dünyanın ilk tammetrajlı rəqəmsal konsert filminin buraxılışı ilə hazırda dünyada ən çox satılan kriptovalyuta sənətçisi kimi də tanınır. “DΞSTINATION HΞXAGONIA” dörd dəqiqə ərzində “SuperRare” adlı kriptovalyuta sənəti platformasında 600Ξ (1,2 milyon dollar) dəyərində satılaraq ilkin satış rekordunu dərhal qıraraq tarixə düşmüşdür.

F1 təqviminin ən sürətli şəhər yarışlarından olan Formula 1 Azərbaycan Qran Prisi trekdə və trekdən kənarda avtoidman həvəskarlarına yarış boyu bol əyləncə vəd edir! Bakıdakı yarış həftəsonu cari mövsümdə keçiriləcək altı sprint yarışından birincisidir və bu yarış pərəstişkarları üç gün davam edəcək möhtəşəm mübarizə və yüksək rəqabət şəraitində keçəcək yarışdan sonra Bulvardakı böyük səhnədə Don Diablo və Hardwell konsertlərindən zövq alaraq möhtəşəm F1 təcrübəsi yaşayacaqlar.

Qeyd edək ki, yarışa üç günlük bilet sahibləri paytaxtın bənzərsiz mənzərəsinə sahib Dənizkənarı Bulvar ərazisində təşkil olunacaq əyləncə zonasına sərbəst daxil ola və konsertlərə qatıla biləcəklər. Həmin azarkeşlərin pit yolu gəzintisinə qoşularaq Formula 1 komandalarının pərdə arxasını görmək kimi eksklüziv bir təcrübə yaşamaq şansları da olacaq.

İlin ən gözlənilməz yarışına tamaşa etmək üçün biletlər sürətlə satılsa da, hələ də əldə etmək şansı var! Unudulmaz yarış həftəsonunu qaçırmaq istəməyən F1 azarkeşləri biletləri BŞH-nın rəsmi veb səhifəsindən (www.bakucitycircuit.com) və ya aşağıda qeyd olunan satış nöqtələrindən əldə edə bilərlər:

· 28 Mall

· Gənclik Mall

· Heydər Əliyev Sarayı

· Kiosk 1 (Azərbaycan kinoteatrı)

· Kiosk 2 (Nizami küçəsi)

· ASAN 1

· ASAN 2

· ASAN 3

· ASAN 4

· ASAN Sumqayıt”

Əlavə məlumat və suallar üçün *6003 çağrı mərkəzi ilə əlaqə saxlaya bilərsiniz.

Paylaş: