Bəzi günlər var ki, təqvimdə sadəcə bir tarix deyil, bütöv bir xalqın yaddaşına həkk olunan böyük bir salnamənin başlanğıcını və ya zirvəsini ifadə edir. 8 Noyabr da Azərbaycan xalqı üçün məhz belə bir gündür. Bu tarix Vətən müharibəsində qazanılmış tarixi Zəfərin, milli iradənin, dövlət gücünün və Azərbaycan əsgərinin qəhrəmanlığının rəmzidir. 8 Noyabr – Zəfər Günü Azərbaycan tarixinin ən şərəfli səhifələrindən biridir. Bu gün illərlə həsrətində olduğumuz torpaqların azadlığına qovuşmasının, tarixi ədalətin bərpasının və xalqımızın böyük arzularının gerçəkləşməsinin simvoludur.
Azərbaycan xalqı uzun illər ərzində torpaqlarının işğaldan azad ediləcəyinə, ərazi bütövlüyünün bərpa olunacağına və məcburi köçkünlərin doğma yurdlarına qayıdacağına inanıb. 2020-ci il sentyabrın 27-də Ermənistan silahlı qüvvələrinin genişmiqyaslı hərbi təxribatına cavab olaraq Azərbaycan Ordusu əks-hücum əməliyyatına başladı. 44 gün davam edən Vətən müharibəsi Azərbaycanın hərb tarixinin ən şanlı səhifələrindən birinə çevrildi. Müharibənin ilk günlərindən Azərbaycan Ordusu yüksək döyüş hazırlığı, peşəkarlığı və qətiyyəti ilə seçildi. Füzuli, Cəbrayıl, Zəngilan, Qubadlı və digər yaşayış məntəqələrinin, strateji yüksəkliklərin azad edilməsi ordumuzun hərbi üstünlüyünü nümayiş etdirdi. Hər gün cəbhədən gələn qələbə xəbərləri xalqın ruh yüksəkliyini daha da artırırdı. Azərbaycan cəmiyyətində görünməmiş birlik və həmrəylik formalaşmışdı. Ölkənin hər yerində üçrəngli Azərbaycan bayrağı dalğalanır, milyonlarla insan ordumuza və Ali Baş Komandana dəstəyini nümayiş etdirirdi. Bu, yalnız hərbi qarşıdurma deyildi. Bu, xalqın Vətən uğrunda səfərbər olduğu, hər bir vətəndaşın özünü bu mübarizənin bir parçası hesab etdiyi böyük milli birlik nümunəsi idi.
44 günlük müharibənin ən mühüm hadisələrindən biri Şuşanın azad edilməsi oldu. 2020-ci il noyabrın 8-də Prezident, Müzəffər Ali Baş Komandan İlham Əliyev Şuşanın azad edildiyini elan etdi. Bu xəbər Azərbaycan xalqı tərəfindən böyük sevinc və qürur hissi ilə qarşılandı. Şuşanın azad olunması hərbi baxımdan olduğu qədər mənəvi və tarixi baxımdan da böyük əhəmiyyət daşıyırdı. Qarabağın incisi, Azərbaycanın mədəniyyət paytaxtı olan Şuşanın azadlığı Zəfərin taleyini müəyyən edən mühüm mərhələ oldu. Şuşanın azadlığı ilə sanki Qarabağın dağlarından illərdir susmayan bir səs yenidən ucaldı: bu, Azərbaycanın səsi, Vətənin səsi, Zəfərin səsi idi.
Şuşanın azad edilməsinin elan olunduğu 8 Noyabr tarixinin Zəfər Günü kimi qeyd edilməsi təsadüfi deyil. Çünki Şuşanın azadlığı Vətən müharibəsində əldə olunan tarixi qələbənin kulminasiya nöqtələrindən biri idi. Bu tarix Azərbaycan xalqının milli qürur hissini daha da gücləndirdi. Dünyaya nümayiş etdirildi ki, Azərbaycan öz ərazi bütövlüyünü bərpa etmək əzmində olan güclü dövlətdir. Zəfər Günü həm də bir həqiqəti bütün dünyaya göstərdi: Azərbaycan xalqı öz torpaqlarını unutmayıb, Vətən sevgisini heç zaman itirməyib və haqq uğrunda mübarizədən geri çəkilməyib. Bu Zəfərin arxasında illərlə aparılan ordu quruculuğu, iqtisadi inkişaf, diplomatik fəaliyyət və ən əsası, xalq-dövlət birliyi dayanırdı.
Hər bir böyük Zəfərin arxasında böyük fədakarlıq dayanır. Azərbaycanın 2020-ci ildə qazandığı tarixi qələbə də şəhidlərimizin müqəddəs qanı ilə yazıldı. Minlərlə Azərbaycan oğlu Vətən torpağının azadlığı uğrunda canından keçdi. Onlar ən müqəddəs amal – Vətənin bütövlüyü naminə həyatlarını fəda etdilər. Şəhidlərimizin hər biri Azərbaycanın Zəfər tarixinin qəhrəmanıdır. Onların həyatı, döyüş yolu və göstərdikləri şücaət gələcək nəsillər üçün əsl Vətən sevgisi nümunəsidir. Bu gün azad Qarabağın hər bir guşəsində şəhidlərimizin xatirəsi yaşayır. Dalğalanan bayrağımızda, yenidən qurulan şəhər və kəndlərimizdə, doğma torpağına qayıdan insanların sevincində onların əmanəti və arzusu var.
Azərbaycanın hərbi Zəfəri Qarabağda yeni tarixi mərhələnin başlanğıcını qoydu. Artıq azad edilmiş ərazilərdə genişmiqyaslı bərpa və quruculuq işləri həyata keçirilir. Vaxtilə işğal nəticəsində dağıdılmış şəhər və kəndlər yenidən qurulur, yollar və infrastruktur layihələri həyata keçirilir, yaşayış məhəllələri salınır, məktəblər, xəstəxanalar və digər sosial obyektlər inşa edilir. Böyük Qayıdış prosesi nəticəsində uzun illər doğma yurd həsrəti ilə yaşayan insanlar öz torpaqlarına qayıdırlar. Bu qayıdış sadəcə insanların yaşayış yerinə dönməsi deyil. Bu, tarixin yenidən canlanması, həyatın işğaldan azad edilmiş torpaqlara geri qayıtmasıdır. Bu gün Qarabağda yeni şəhərlər, kəndlər və yaşayış məntəqələri qurulur. Qarabağın bərpası Azərbaycanın Zəfərinin yalnız hərbi nəticələrlə məhdudlaşmadığını, bu qələbənin quruculuq və inkişafla davam etdiyini göstərir.
Bu tarix Azərbaycan xalqının yaddaşında əbədi yaşayacaq. Bu tarix hər il qeyd olunarkən biz Vətən müharibəsində göstərilən qəhrəmanlığı, şəhidlərimizin fədakarlığını, qazilərimizin şücaətini və xalqımızın sarsılmaz birliyini bir daha xatırlayacağıq. Zəfər Günü – keçmişə ehtiram, bu günə qürur, gələcəyə inam deməkdir. Bu gün azad Qarabağın səmasında dalğalanan Azərbaycan bayrağı minlərlə şəhidimizin müqəddəs arzusunun gerçəkləşdiyini göstərir. Onların Vətən uğrunda göstərdiyi fədakarlıq heç vaxt unudulmayacaq. 8 Noyabr Azərbaycan tarixində sadəcə bir tarix deyil. Bu, qalib xalqın qürurudur, müzəffər ordunun şərəfidir, şəhidlərin müqəddəs əmanətidir.
Yaşasın, qalib Azərbaycan xalqı! Yaşasın, Ali Baş Komandan!
Araz Xudadanov
YAP Sabunçu rayon təşkilatının sədri
