YAP Nəsimi rayon təşkilatı bələdiyyə seçkilərinə tam hazırdır

Bakı:

23 °C

83 %

6 m/s

Əlaqə

AZ RU EN

Ana səhifə / YAP xəbərləri / YAP Nəsimi rayon təşkilatı bələdiyyə seçkilərinə tam hazırdır

YAP Nəsimi rayon təşkilatı bələdiyyə seçkilərinə tam hazırdır

30.10.2009 [09:02]

“Seçki ölkədəki siyasi-iqtisadi, sosial atmosferə təsir edə bilən bir siyasi prosesdir. Seçki prosesi məsuliyyətli, həm də çətin bir işdir. İlk illərdə, əlbəttə ki, seçkilərin keçirilməsində, hazırlıq işlərinin aparılmasında müəyyən çətinliklər olub. Amma bu gün Yeni Azərbaycan Partiyası (YAP) dörd prezident, üç parlament, iki bələdiyyə seçkisi və iki referendumda iştirak etmiş böyük siyasi qüvvə kimi dərin təcrübəyə, mükəmməl seçki texnologiyasına malikdir”. Bunu YAP Nəsimi rayon təşkilatının sədri, millət vəkili Məlahət İbrahimqızı söyləyib. Onun sözlərinə görə, əldə olunan uğurlar Yeni Azərbaycan Partiyasını işə məsuliyyətlə yanaşmaqdan azad etmir: “Əksinə, partiyamız hər bir seçkidə ortaya yeni texnologiya qoymağa çalışır ki, seçkilər daha şəffaf, ədalətli və demokratik keçirilsin. Hərçənd ki, opponentlərimiz, hər zamankı kimi, diqqəti cəlb etmək məqsədilə böhtan kampaniyası aparır. Amma bunun heç bir təsiri yoxdur. çünki xarici dövlətlər artıq Azərbaycanın seçki təcrübəsindən istifadə edirlər, bəhrələnirlər. Bələdiyyə seçkilərinə gəlincə isə, ilk olaraq, söyləməliyəm ki, bu özünüidarəetmə orqanı Azərbaycanda cavan strukturdur. Əvvəlki illərdə, bələdiyyələrə seçilən şəxslər bu orqanların konkret olaraq, hansı fəaliyyətlə məşğul olduğunu, əsas funksiyasının nədən ibarət olduğunu və s. bilmirdilər. Amma artıq bu sahə üzrə parlamentdə bir sıra qanunlar qəbul edilib, həyata keçirilib, bələdiyyələrə sosial baxış tamamilə dəyişib. İndi, bu sahədə artıq təkmilləşmələr aparılmalı, mükəmməl proqramlar ortaya qoyulmalıdır. Bu baxımdan, YAP artıq bələdiyyələrlə bağlı yeni konsepsiyasını formalaşdırıb.
Seçkilərə hazırlıq işləri sistemli şəkildə aparılır. Artıq seçki qərargahı yaradılıb. Rayon təşkilatı olaraq, Nəsimi rayonundakı bir bələdiyyə üzrə 19 namizəd irəli sürmüşük.
21500 üzvü olan YAP Nəsimi rayon təşkilatı işini elə qurub ki, təbliğat-təşviqat zamanı heç bir problem ortaya çıxmasın. Bu günə qədər elə bir problem olmayıb, amma ehtiyatı da əldən vermək olmaz”.
Məlahət İbrahimqızı vurğulayıb ki, müxalifət xalqa özünün aktiv olduğunu nümayiş etdirməyə çalışır: “Amma cəmiyyət əsl həqiqətləri görür. Ona görə də, əminliklə deyə bilərik ki, sosial bazası, dəstəyi olmayan müxalifət budəfəki seçkilərdə də məğlub olacaq, xalqın inamını, etimadını qazanmış Yeni Azərbaycan Partiyası qarşıdan gələn bələdiyyə seçkilərində də parlaq qələbə qazanacaq”.
YAP Nəsimi rayon təşkilatı Gənclər Birliyinin sədri Zəfər Qurbanov isə deyib ki, xalq seçimini hansı qüvvənin xeyrinə etmək lazımdırsa, bunu çoxdan müəyyənləşdirib: “Qeyd etməliyəm ki, malik olduğu xalq sevgisi YAP-ın uğurlarının və qələbələrinin təməl daşını təşkil edir. YAP-ın Sədri, Prezident İlham Əliyevin gördüyü qlobalmiqyaslı işlər xalqın partiyaya olan inamını daha da artırır. Nəzər salsanız, ölkədə hər gün yeniləşmə baş verir. Bu yeniləşmə prosesi özünü həm insanların həyat səviyyəsinin yüksəlməsində, həm də yeni-yeni sosial obyektlərin, yolların, körpülərin açılmasında göstərir”.
Gənclər Birliyinin sədri cəmiyyətimizin aktiv üzvləri olan gənclərin əvvəlki siyasi kampaniyalarda olduğu kimi, budəfəki seçkilərdə də fəallıq nümayiş etdirəcəklərinə əminliyini ifadə edib: “Nəsimi rayon gəncləri də partiyamızın kursu ətrafında sıx birləşib. Əminəm ki, qarşıdan gələn bələdiyyə seçkilərində də Nəsimi rayonu seçici aktivliyinə görə ilk yeri tutacaq”.
Ramil VƏLİBƏYOV

Paylaş:

Baxılıb: 1689 dəfə