Zəfərdən suverenliyə

Bakı:

24 °C

64 %

6 m/s

Əlaqə

AZ RU EN

Ana səhifə / YAP xəbərləri / Zəfərdən suverenliyə

Zəfərdən suverenliyə

18.09.2026 [16:26]

20 Sentyabr Azərbaycan dövlətçiliyi tarixində xüsusi əhəmiyyət daşıyan günlərdəndir. Bu tarix ölkəmizin bütün ərazisində dövlət suverenliyinin tam təmin edilməsi ilə nəticələnən tarixi hadisənin rəmzidir. 2023-cü il sentyabrın 19-da başlayan və cəmi bir gündən az davam edən lokal xarakterli antiterror tədbirləri Azərbaycanın Konstitusiya quruluşunun bütün ərazilərimizdə bərpa olunması ilə nəticələndi. Bununla da ölkəmizin ərazi bütövlüyünün və suverenliyinin tam bərpası istiqamətində mühüm tarixi mərhələ başa çatdı.

Prezident İlham Əliyev bu tarixi hadisənin əhəmiyyətini belə ifadə edib: “Düz bir il bundan əvvəl qəhrəman Azərbaycan Ordusu dövlət suverenliyini tam bərpa etmişdir. Bir gündən az davam edən antiterror əməliyyatı nəticəsində separatçıların kökü kəsildi, Azərbaycan öz dövlət suverenliyini tam təmin etdi, beynəlxalq hüquq zəfər çaldı və Azərbaycan öz gücünü bir daha göstərdi.” Dövlət başçısının bu fikirləri 20 Sentyabrın mahiyyətini və Azərbaycanın keçdiyi tarixi yolu aydın şəkildə ifadə edir.

2020-ci ildə 44 günlük Vətən müharibəsində qazanılan möhtəşəm Zəfər suverenliyimizin tam bərpasına gedən yolun ən mühüm mərhələsi oldu. Müzəffər Ali Baş Komandan İlham Əliyevin rəhbərliyi ilə Azərbaycan Ordusunun göstərdiyi qəhrəmanlıq nəticəsində torpaqlarımızın böyük hissəsi işğaldan azad edildi. 2023-cü ilin sentyabrında həyata keçirilən antiterror tədbirləri isə Qarabağda separatizmə son qoyaraq Azərbaycanın dövlət suverenliyinin bütün ərazidə təmin olunmasına şərait yaratdı. Beləliklə, illər ərzində qarşıya qoyulan tarixi məqsəd tam şəkildə reallaşdı.

Bu Zəfər yalnız hərbi uğur deyil, həm də Azərbaycan dövlətinin siyasi iradəsinin, xalqımızın birliyinin və milli həmrəyliyinin təntənəsi idi. Ölkəmizin bütün ərazisində Azərbaycan Respublikasının Konstitusiyasının hüquqi qüvvəsi və dövlət idarəçiliyi təmin olundu. Üçrəngli Dövlət Bayrağımızın Xankəndidə və Qarabağın digər şəhər və yaşayış məntəqələrində dalğalanması isə suverenliyimizin ən parlaq rəmzinə çevrildi.

Dövlət suverenliyinin tam bərpasından sonra qarşıda yeni vəzifələr müəyyənləşdirildi. Bu gün Qarabağ və Şərqi Zəngəzur genişmiqyaslı quruculuq meydanına çevrilib. Şəhər və kəndlər yenidən qurulur, müasir yollar, yaşayış kompleksləri, məktəblər, səhiyyə və sosial obyektlər yaradılır, keçmiş məcburi köçkünlərin doğma torpaqlarına qayıdışı təmin olunur. Böyük Qayıdışın uğurla həyata keçirilməsi Azərbaycanın əldə etdiyi Zəfərin davamlı nəticələrinin ən mühüm göstəricilərindəndir.

Prezident İlham Əliyevin təşəbbüsü ilə 2025-ci ilin Azərbaycanda “Konstitusiya və Suverenlik İli” elan edilməsi də bu baxımdan xüsusi əhəmiyyət daşıyır. Bu qərar Azərbaycanın dövlətçilik tarixində mühüm hadisələrin və dəyərlərin vahid məna ətrafında birləşdirilməsini ifadə edir. Konstitusiyamızın 30 illiyi və dövlət suverenliyimizin tam bərpasının yaratdığı yeni reallıqlar Azərbaycan dövlətçiliyinin inkişafında mühüm mərhələ kimi qiymətləndirilir.

Bu gün 20 Sentyabr xalqımız üçün həm böyük Zəfərin nəticələrini xatırlamaq, həm də dövlət suverenliyinin əhəmiyyətini bir daha dərk etmək baxımından mühüm gündür. Şəhidlərimizin canı, qazilərimizin qəhrəmanlığı və Azərbaycan əsgərinin şücaəti hesabına əldə olunan bu tarixi nailiyyət dövlətimizin ən qiymətli sərvətlərindən biridir. Bu Zəfər xalqımızın milli iradəsinin və Azərbaycan dövlətinin gücünün əbədi rəmzi olaraq tariximizdə yaşayacaq.

20 Sentyabr – Dövlət Suverenliyi Günü Azərbaycanın keçdiyi şərəfli yolun, dövlətimizin gücünün və milli birliyimizin təcəssümüdür. Bu gün bütün ərazilərimizdə dalğalanan üçrəngli bayrağımız müstəqil Azərbaycanın suverenliyinin əbədi və sarsılmaz olduğunu nümayiş etdirir. Azərbaycan xalqı bu tarixi Zəfəri qoruyaraq, quruculuq və inkişaf yolunda inamla irəliləyir.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 107 dəfə