Genişmiqyaslı və müfəssəl dövlət proqramı

Bakı:

22 °C

68 %

2 m/s

Əlaqə

AZ RU EN

Ana səhifə / YAP xəbərləri / Genişmiqyaslı və müfəssəl dövlət proqramı

Genişmiqyaslı və müfəssəl dövlət proqramı

14.01.2026 [18:43]

Ölkəmizdə son illər ərzində genişmiqyaslı infrastruktur layihələri icra edilmişdir. İnfrastruktur layihələri həm Bakını, həm də bütün bölgələri əhatə edir. Demək olar ki, əsas infrastruktur məsələləri öz həllini tapmışdır. Prezident İlham Əliyevin rəhbərliyi ilə iyirmi il ərzində bir neçə regional inkişaf proqramı qəbul edilmişdir. Hər bir proqram uğurla icra olunmuşdur. Həyata keçirilən proqramlar nəticəsində əsas infrastruktur məsələləri həll edilmişdir.

Bakı şəhərində və Abşeron yarımadasında su təchizatı, yağış və tullantı suları sistemlərinin təkmilləşdirilməsinə dair 2026−2035-ci illər üçün Dövlət Proqramına həsr olunmuş müşavirədə Prezident İlham Əliyev ölkəmizdə icra edilmiş bir çox infrastruktur layihələri haqqında geniş məlumat verdi. Ölkə başçısı qeyd etdi ki, son 20 il ərzində dörd böyük su anbarı inşa edilib və bu su anbarlarının potensialı 500 milyon kubmetrdən çoxdur. Əgər bu su anbarları tikilməsəydi, bu gün həm Bakının su təchizatı, həm də qərb zonasının su təchizatı böyük problemlərlə üzləşə bilərdi.

Prezident müşavirədə bildirdi ki, Bakının və Abşeron yarımadasının içməli su problemləri uzun illər ciddi problem kimi qarşımızda durur. Təbii ki, bu istiqamətdə müəyyən işlər görülüb. Lakin genişmiqyaslı və müfəssəl dövlət proqramının qəbul edilməsinə ehtiyac vardı. Qəbul edilən Dövlət Proqramı Bakı şəhərini, onun qəsəbələrini, Sumqayıt şəhərini və Abşeron rayonunu əhatə edəcək.

Dövlət Proqramı 2026−2035-ci illəri əhatə etməklə iki mərhələdə həyata keçiriləcəkdir. 2026−2030-cu illəri əhatə edən birinci mərhələdə su və kanalizasiya infrastrukturu yenidən qurulacaq. Bu çərçivədə mövcud infrastrukturun əsaslı təmiri və yenilənməsi, yağış sularının idarə olunması və tullantı sularının təkrar istifadəsi üzrə müasir texnologiyaların tətbiqi, “ağıllı su şəbəkələri”nin qurulması və ekoloji təhlükəsizliyin təmin olunması nəzərdə tutulur. Bu mərhələdə mərkəzləşdirilmiş kanalizasiya sistemi olmayan ərazilərdə yeni infrastruktur yaradılacaq, eləcə də su şəbəkələrində itkilərin aşkarlanması və azaldılması üçün tədbirlər görüləcəkdir. 2031−2035-ci illəri əhatə edən ikinci mərhələdə yeni su anbarlarının və nasos stansiyalarının tikintisi, su təchizatının fasiləsizliyinin təmin olunması və müasir xidmət modellərinin tətbiqi prioritet istiqamətlər kimi müəyyən ediləcəkdir. Dövlət Proqramının icrası nəticəsində içməli su mənbələrinin dayanıqlığının artırılması, su anbarlarının, eləcə də supaylayıcı şəbəkələrin inkişaf etdirilməsi, suyun uçot sisteminin təkmilləşdirilməsi, yağış və tullantı suları sistemlərinin yenilənməsi və alternativ su mənbələrinin istifadəyə cəlbinə nail olunması nəzərdə tutulur.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 724 dəfə