27 Sentyabr – Tarixin qanla yazılan şərəf səhifəsi

Bakı:

10 °C

81 %

7 m/s

Əlaqə

AZ RU EN

Ana səhifə / YAP xəbərləri / 27 Sentyabr – Tarixin qanla yazılan şərəf səhifəsi

27 Sentyabr – Tarixin qanla yazılan şərəf səhifəsi

29.09.2025 [11:59]

Azərbaycan xalqının yaddaşında 27 Sentyabr təkcə müharibənin başlandığı gün kimi deyil, eyni zamanda milli həmrəyliyin, vətənə sədaqətin və azadlıq uğrunda canından keçməyə hazır olan igid oğul və qızlarımızın Anım Günü kimi əbədi olaraq iz salıb. Bu gün yalnız hüzn və kədərin deyil, həm də şərəfli mübarizənin, yenilməz iradənin və tarixi Zəfərin başlanğıcı kimi dəyərləndirilir.

Azərbaycan Respublikasının Prezidenti, Müzəffər Ali Baş Komandan İlham Əliyevin dediyi kimi:

“Onların qanı yerdə qalmadı... Mən demişdim ki, biz onların qisasını döyüş meydanında alacağıq, belə də oldu. Bu Qələbəni bizə bəxş edən qəhrəman əsgər və zabitlərimiz bizim qürur mənbəyimizdir.”

Uzun illər bölgədə davam edən gərginliyin əsas səbəbi Ermənistanın təcavüzkar və ifrat millətçi siyasəti olub. "Dənizdən dənizə Ermənistan" kimi əsassız xülyalara qapılan rəsmi İrəvan, xarici havadarların dəstəyi ilə Azərbaycanın ərazi bütövlüyünü pozaraq, 20%-ə yaxın torpaqlarını işğal etmiş, bir milyondan artıq insanı doğma yurd-yuvasından didərgin salmışdır.

Azərbaycan daim beynəlxalq hüquqa sadiq qalmış, münaqişəni sülh yolu ilə həll etməyə çalışmışdır. Lakin beynəlxalq aləmdəki ikili standartlar və səssizlik nəticəsində bu ədalətsizlik uzun illər davam etmişdir. 2020-ci ilin sentyabr ayında Ermənistanın növbəti hərbi təxribatı, xüsusilə mülki əhalinin və yaşayış məntəqələrinin atəşə tutulması, artıq dözülməz həddə çatdı və Azərbaycan xalqı haqq savaşına qalxdı.

44 gün davam edən Vətən Müharibəsində Azərbaycan ordusu, xalqın birliyi və Prezidentin qətiyyətli liderliyi ilə möhtəşəm Qələbə qazandı. "Döndü yoxdur, öldü var!" deyərək irəli atılan əsgər və zabitlərimiz düşməni döyüş meydanında məğlub etdi. Bu Qələbə hərbi, siyasi və ideoloji cəhətdən tarixi dönüş nöqtəsi oldu.

Bu zəfər şəhidlərimizin canı, qazilərimizin fədakarlığı və xalqımızın sarsılmaz iradəsi sayəsində qazanıldı. Qələbə yalnız torpaqlarımızı deyil, milli qürurumuzu da bizə qaytardı.

27 Sentyabr – Anım Günü, Birinci və İkinci Qarabağ müharibəsində canından keçən şəhidlərimizin əziz xatirəsinə hörmət və ehtiram günüdür. Bu gün hər bir Azərbaycan vətəndaşı şəhidlərin müqəddəs ruhu qarşısında baş əyir, onların qəhrəmanlığı ilə qürur duyur.

Prezident İlham Əliyevin dediyi kimi:

“Şəhidlərimiz bizim qəlbimizdə əbədi yaşayacaq. Biz bu Qələbəyə görə onlara borcluyuq.”

Müharibədən sonra dövlət tərəfindən şəhid ailələrinə və qazilərə göstərilən diqqət və dəstək, verilən mənzillər, tibbi və sosial xidmətlər bu qəhrəmanlara olan ehtiramın təzahürüdür. Təkcə döyüş meydanında deyil, müharibədən sonra da Azərbaycan dövləti öz vətəndaşlarının yanında olduğunu nümayiş etdirir.

İşğaldan azad olunmuş ərazilərdə artıq həyat yenidən canlanır. İnfrastruktur layihələri, məktəblər, xəstəxanalar, yollar və sosial obyektlərin tikilməsi bu torpaqlarda ədalətin bərqərar olmasının göstəricisidir. Bu, həm də şəhidlərimizin bizə miras qoyduğu müqəddəs torpaqlara olan borcumuzdur.

27 Sentyabr – Anım Günü bizim tariximizin dönüş nöqtəsidir. Bu gün bir xalq olaraq keçmişimizi xatırlayır, şəhidlərimizin xatirəsini yaşadır və gələcəyə daha güclü, daha inamlı addımlayırıq. Bu gün milli qürurumuzun, vətənə sədaqətin və tarixi ədalətin simvoludur.

Kənan Quliyev,

YAP Laçın rayon təşkilatının məsləhətçisi

Paylaş:

Baxılıb: 313 dəfə