Endryu Şoferin Bakıya səfəri nəyi dəyişəcək?

Bakı:

20 °C

70 %

7 m/s

Əlaqə

AZ RU EN

Ana səhifə / Xarici siyasət / Endryu Şoferin Bakıya səfəri nəyi dəyişəcək?

Endryu Şoferin Bakıya səfəri nəyi dəyişəcək?

26.04.2022 [10:15]

Ağ Ev Brüssel sülh gündəliyini dəstəkləyir

Sadiq İSMAYILZADƏ

ABŞ Dövlət Departamentinin Qafqazda danışıqlar üzrə baş müşaviri Endryu Şofer Bakıda səfərdədir. Bu barədə ABŞ-ın Azərbaycandakı səfirliyi məlumat yayıb. Bildirilir ki, ABŞ Dövlət Departamentinin Qafqazda danışıqlar üzrə baş müşaviri Endryu Şofer aprelin 29-dək Bakıda səfərdə olacaq. Məlumatda o da vurğulanır ki, ABŞ Cənubi Qafqazın dinc, demokratik və firavan gələcəyini təşviq etmək üçün ikitərəfli və çoxtərəfli qaydada əməkdaşlıq etməyə sadiqdir.

Qeyd edək ki, ötən həftə Ermənistana səfər edən Şofer burada dövlət rəsmiləri ilə görüş keçirmişdi. Artıq tarixə qovuşmuş ATƏT-in Minsk qrupunun amerikalı həmsədri olmuş Şofer regiona tanış diplomatdır. Bu qarşılıqlı səfərlər və intensiv danışıqlar sülh danışıqlarına hansı yenilikləri gətirə bilər? Ümumiyyətlə, yeni xüsusi nümayəndələr prosesin daha da aktivləşməsinə təsir göstərə bilərlərmi?

Məsələ ilə bağlı fikirlərini bölüşən politoloq İlyas Hüseynov bildirib ki, Vətən müharibəsindən sonra regionda formalaşan yeni geosiyasi reallıqlar ATƏT-in Minsk qrupunun siyasi gündəlikdən çıxmasını da şərtləndirdi. Onsuz da Azərbaycan qurumun vasitəçiliyi ilə keçirilən danışıqlardan məmnun deyildi: “Artıq bu qurum demək olar ki, yoxdur. Ukrayna müharibəsi fonunda ABŞ və Fransa Qafqazda sülhün və təhlükəsizliyin qorunması üçün Rusiya ilə birgə fəaliyyətdən imtina edir. Rusiya isə bunun qarşılığında Minsk qrupundakı həmsədr İqor Xovayevi xüsusi nümayəndə təyin etdi. Nəzərə alsaq ki, qlobal müstəvidə ABŞ ilə Rusiya arasında mübarizə gedir, Ağ Ev prosesə susqun qala bilməzdi. ABŞ ATƏT-in Minsk qrupunun keçmiş həmsədri Endryu Şoferi xüsusi nümayəndə qismində regiona təyin edib. Şofer bundan sonra həm də Gürcüstan məsələsi ilə bağlı fəaliyyəti tənzimləyəcək. Bu diplomat regionu yaxşı tanıyır. Ötən həftə Ermənistan, bu həftə isə Azərbaycan səfər etdi. Bu onu göstərir ki, ABŞ regionda sülhün və təzhlükəsizliyin bərpası və qorunması ilə yanaşı, vasitəçilik imkanlarını da genişləndirmək niyyətindədir. Eyni zamanda, ABŞ da Brüssel danışıqlarının davam etdirilməsi niyyətindədir. Görüş öncəsi ABŞ dövlət katibi Blinken hər iki ölkənin rəhbərləri ilə telefonla danışmışdı. Beləliklə də, Brüssel sülh gündəliyini rəsmi Vaşinqton da dəstəkləyir”.

İ.Hüseynovun fikrincə, hətta ABŞ bu prosesə müəyyən təkan da verməyə çalışır. Endryu Şofer isə birbaşa ABŞ maraqları kontekstində Cənubi Qafqazda sülhün və təhlükəsizliyin qorunub saxlanmasına çalışacaq: “Cənubi Qafqazın ABŞ ilə Rusiya arasında mübarizə məkanına çevrilməsi arzuolunan deyil. Bunun üçün regionda sülh yaranmalıdır. Fikrimcə, əsas niyyət sülh müqaviləsinin imzalanması və qalıcı sülhün dəstəklənməsidir. Üzücü və böyük problemlərə səbəb olan müharibələrə son qoyulmalı, münaqişə aradan qaldırılmalı və region yeni mərhələyə qədəm qoymalıdır. Bunun üçün diplomatlar böyük səylə fəaliyyət göstərməlidir. Arzuolunandır ki, Endryu Şofer də bu istiqamətdə fəaliyyət göstərəcək”, - deyə politoloq əlavə edib.

Paylaş:

Baxılıb: 1093 dəfə