Dağlıq Qarabağ bölgəsinin azərbaycanlı icmasının idarə heyəti ilin yekunları ilə bağlı hesabat verib

Bakı:

28 °C

45 %

2 m/s

AZ RU EN

Ana səhifə / Sosial / Dağlıq Qarabağ bölgəsinin azərbaycanlı icmasının idarə heyəti ilin yekunları ilə bağlı hesabat verib

Dağlıq Qarabağ bölgəsinin azərbaycanlı icmasının idarə heyəti ilin yekunları ilə bağlı hesabat verib

28.12.2019 [09:57]

Dekabrın 27-də “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin idarə heyətinin ilin yekunları ilə bağlı iclası keçirilib.
AZƏRTAC xəbər verir ki, Dağlıq Qarabağın Azərbaycan icmasının sədri Tural Gəncəliyev rəhbərlik etdiyi qurumun 2019-cu ildəki fəaliyyəti və həyata keçirilən layihələrlə bağlı geniş məlumat verib.
İcma sədri ötən müddət ərzində görülən işlərin səmərəli olduğunu diqqətə çatdırıb. “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin yeni idarə heyətinin yaranmasından bir il ötdüyünü xatırladan T.Gəncəliyev bildirib ki, icma beynəlxalq əlaqələri, analitik-informasiya sahəsini, ictimaiyyətlə və media qurumları ilə əlaqələri, sosial şəbəkələrdə fəaliyyəti, ölkədaxili tədbirlərdə iştirakı və digər bu kimi vacib məsələləri diqqətdə saxlayıb.
Qeyd edib ki, beynəlxalq təşkilatların nümayəndələri ilə mütəmadi görüşlərin keçirilməsi, Dağlıq Qarabağ bölgəsinin azərbaycanlı icmasının müxtəlif məsələlərlə bağlı mövqeyinin bu qurumların təmsilçilərinin diqqətinə çatdırılması əsas məqsədlərdən olub. Bu baxımdan, ATƏT-in sədri Miroslav Layçakın rəhbərlik etdiyi nümayəndə heyəti, ATƏT-in Minsk qrupunun həmsədrləri, üzvü olan digər ölkələrin, Azərbaycanda fəaliyyət göstərən səfirləri ilə, həmçinin Avropa İttifaqının, Avropa Şurası, BMT, Qızıl Aypara Komitəsinin Bakı ofislərində keçirilən görüşlər xüsusi əhəmiyyətə malikdir.
“Ölkə rəhbərinin icmanın qarşısına qoyduğu tapşırıqları yerinə yetirməyə çalışdıq. İcma olaraq istər ölkə daxilində, istərsə də beynəlxalq aləmdə fəaliyyətimizi genişləndirdik. Düşünürəm ki, icmamızın işini Prezident İlham Əliyevin ermənilərin iç üzünün ifşa olunması, onların əsil simalarının dünyaya çatdırılması siyasətinə uyğun qura bilmişik. Bir sıra xarici ölkələrdə keçirdiyimiz tədbirlərdə dünya ictimaiyyətinə Dağlıq Qarabağın Azərbaycan icmasının güclü olduğunu göstərdik, Ermənistanın danışıqlar formatının dəyişilməsinə yönəldilmiş təxribat xarakterli addımlarının qarşısını aldıq”, - deyə icma sədri vurğulayıb.
Tural Gəncəliyev bildirib ki, gənclərin və könüllülərin icmanın işinə cəlb olunması sayəsində “Qarabağ Azərbaycandır” mövzusunda videoçarxların sosial şəbəkələrdə yayılması ermənilərin narazılığına səbəb olub. Bu da göstərir ki, onlar bizim icmanın fəaliyyət göstərməsini istəmir və ona mane olmağa çalışırlar. Biz isə öz gücümüzü göstərdik və əminik ki, öz əzəli torpaqlarımıza qayıdacağıq.
Tural Gəncəliyev sosial şəbəkələrdə fəaliyyətin, ictimaiyyət, xüsusilə gənclər və media qurumları ilə əlaqələrin qurulmasının vacibliyini qeyd edib.
Sonra idarə heyətinin üzvü Fərhad Bədəlbəyli Qarabağın əzəli və əbədi Azərbaycan torpağı olduğunu diqqətə çatdırıb və hamını bir nəfər kimi işğal edilmiş torpaqlarımız uğrunda mübarizədə həmrəy olmağa səsləyib. Bildirib ki, erməni vandalizminə qarşı mübarizədə dövlətimizin başçısının ətrafında sıx birləşməli, eyni hədəfə vurmalıyıq. Bu, hamımızın işidir və hər bir vətəndaş, ictimaiyyət, media orqanları səfərbər olmalıdır. Fərhad Bədəlbəyli, həmçinin Qarabağ Fondunun yaradılmasını təklif edib.
Daha sonra çıxış edən idarə heyətinin üzvü Əli Həsənov bildirib ki, Azərbaycan tərəfi hər zaman Ermənistan-Azərbaycan Dağlıq Qarabağ münaqişəsinin sülh yolu ilə həllinin tərəfdarıdır. Prezident İlham Əliyevin müdrik siyasəti sayəsində ölkəmizdə sabitlik hökm sürür. “Vətən doğulduğun torpaqdan başlayır”, - deyən Əli Həsənov hər bir Azərbaycan vətəndaşını Qarabağ uğrunda mübarizədə fəal olmağa çağırıb. O, torpaqlarımızın işğaldan azad olacaq günün yaxında olduğuna əminliyini bildirib.

Paylaş:

Baxılıb: 453 dəfə