Mövsümlə bağlı qrip xəstəliyinə tutulanların sayı artıb

Bakı:

18 °C

88 %

4 m/s

Əlaqə

AZ RU EN

Ana səhifə / Sosial / Mövsümlə bağlı qrip xəstəliyinə tutulanların sayı artıb

Mövsümlə bağlı qrip xəstəliyinə tutulanların sayı artıb

15.10.2016 [10:24]

Məhəbbət İbrahimova: Hazırda insanlarda əsasən A qrupuna daxil olan qrip müşahidə edilir ki, bu da qripin adi formasıdır və boğaz ağrısı, öskürmə, hərarətlə özünü büruzə verir
Payız-qış mövsümünün başlanması ilə əlaqədar əhali arasında qrip xəstəliyinə tutulanların sayında artım müşahidə edilir. Lakin, bəzən insanlar bu xəstəliyin müalicəsi zamanı səhvlərə yol verir, yaxud vaxtında həkimə müraciət etmirlər. Bəs, bu xəstəliyə qarşı necə müabrizə aparılmalıdır?
Həmin sualı cavablandırmaq üçün müraciət etdiyimiz Kliniki Tibbi Mərkəzin baş həkim müavini, Yeni Azərbaycan Partiyası (YAP) Nərimanov rayon təşkilatı Qadınlar Şurasının sədri Məhəbbət İbrahimova bildirib ki, mövsümlə bağlı qrip xəstəliyinə tutulanların sayının artması insanların immun sisteminin düşməsi ilə əlaqəlidir: “Hazırda insanlarda əsasən A qrupuna daxil olan qrip müşahidə edilir ki, bu da qripin adi formasıdır və boğaz ağrısı, öskürmə, hərarətlə özünü büruzə verir. Bu qrip 7-8 gün davam edə bilər və müalicəsi mümkündür. Əgər müalicə vaxtında həyata keçirilərsə, xəstədə onun fəsadları yaranmaz. Ancaq xəstəlik müalicə olunmadıqda ağır fəsadlara yol aça bilər”.
Məhəbbət İbrahimova onu da vurğulayıb ki, ölkəmizdəki tibb müəssisələrində yoluxucu xəstəliklərin müalicəsi üçün hər cür şərait var: “Xəstəliyin qarşısını almaq üçün profilaktik tədbirlər görülməli və sahə həkiminə müraciət edilməlidir. Azərbaycanda vətəndaşların böyük əksəriyyəti həkimə müraciət etmədən, ev şəraitində özü-özünü müalicə edir. Lakin xəstəliyə fikir verməyərək işə çıxmaq təhlükəlidir. Çünki bununla siz digər insanların da qrip xəstəliyinə yoluxmasına səbəb ola bilərsiniz”.
Onun sözlərinə görə, hərarət yüksək olduğu halda xəstə mütləq yataq rejiminə əməl etməlidir: “Bu zaman bol mineral suların qəbul edilməsi vacibdir. Çünki hərarət zamanı insan çoxlu maye itirir və orqanizmdə susuzlaşma inkişaf edə bilər. Yaxşı olar ki, vətəndaşlar daha çox meyvə-tərəvəz qəbul etsinlər. İştahanın kəskin azalması halları da müşahidə oluna bilər. Bu, normaldır. Xəstəni zorla yedirtmək düzgün deyil. Soyuqdəymə zamanı xəstənin olduğu otağın havası tez-tez dəyişdirilməlidir. Əksər xəstələr yenidən soyuqlama qorxusu ilə otağın havalandırılmasından qaçırlar. Bu halda isə həmin məkanda xəstə tərəfindən havaya ötürülən bakteriya və viruslar çoxalaraq xəstənin sağalmasına mane olur”.
Yeri gəlmişkən onu da qeyd edək ki, 2016-2017-ci ilin payız-qış mövsümünün başlanması ilə əlaqədar əhali arasında qrip və kəskin respirator virus infeksiyalarına qarşı profilaktik və əks-epidemik tədbirlərin, həmçinin infeksiya üzərində epidemioloji monitorinqin gücləndirilməsi məqsədilə səhiyyə naziri Oqtay Şirəliyev əmr imzalayıb. Əmrdə Səhiyyə Nazirliyinin tibb idarə və müəssisələrinin rəhbərlərinə məktəb və məktəbəqədər uşaq müəssisələrində, ali və orta təhsil müəssisələrində tibbi müşahidələrin təşkili, qripə şübhəli xəstələrin, xüsusən uşaqların və yaşlı əhalinin hospitalizasiyası üçün xüsusi palataların ayrılmasının təminatı tapşırılıb.
Bildirilib ki, lazım gəldikdə tibb müəssisələrində məhdudlaşdırıcı rejimin tətbiqi, tibb personalının fərdi qoruyucu vasitələrdən (maskalardan) istifadəsi təmin olunmalı, dezinfeksiya işlərinin aparılmasına xüsusi diqqət yetirilməli, ağır kəskin respirator xəstəlik halları barədə məlumat dərhal yerli gigiyena və epidemiologiya mərkəzlərinə verilməli və şübhəli xəstələrdən götürülmüş nümunələr Respublika Taun Əleyhinə Stansiyasına çatdırılmalı, qrip və kəskin respirator virus xəstəliklərin müalicəsi üçün dərman preparatlarının ehtiyatı yaradılmalıdır.
Həmçinin Elmi-Tədqiqat Ağciyər Xəstəlikləri İnstitutunun rəhbərliyinə ağır formalı qrip xəstələrinin hospitallaşdırılması üçün mənfi təzyiqli boksların tam hazır vəziyyətə gətirilməsi, dərman vasitələri, tibbi ləvazimat və inventarla təchiz edilməsi təminatına dair göstərişlər verilib.
Müşfiqə BAYRAMLI

Paylaş:

Baxılıb: 762 dəfə