Dövlət Statistika Komitəsi tərəfindən keçirilən statistik olimpiadanın qaliblərinin mükafatlandırma mərasimi olub

Bakı:

26 °C

66 %

8 m/s

AZ RU EN

Ana səhifə / Siyasət / Dövlət Statistika Komitəsi tərəfindən keçirilən statistik olimpiadanın qaliblərinin mükafatlandırma mərasimi olub

Dövlət Statistika Komitəsi tərəfindən keçirilən statistik olimpiadanın qaliblərinin mükafatlandırma mərasimi olub

03.11.2023 [20:01]

Noyabrın 3-də "Heydər Əliyev İli" çərçivəsində Azərbaycan Respublikasının Dövlət Statistika Komitəsi tərəfindən yuxarı sinif şagirdləri və ali məktəb tələbələri arasında təşkil olunmuş statistik olimpiadanın final mərhələsi və qaliblərin mükafatlandırılması mərasimi keçirilib.

Tədbirdə çıxış edən Dövlət Statistika Komitəsinin sədri Tahir Budaqov, Elm və təhsil naziri Emin Əmrullayev olimpiadada iştirak edən şagird və tələbələri təbrik edib, Azərbaycan xalqının Ümummilli Lideri Heydər Əliyevin keşməkeşli həyat yolundan və xalqımız qarşısındakı misilsiz xidmətlərindən danışıb, müstəqilliyimizin məhz onun sayəsində əbədi və dönməz xarakter aldığını vurğulayıblar.

Qeyd olunub ki, olimpiadanın keçirilməsində əsas məqsəd yuxarı sinif şagirdlərinin və ali məktəb tələbələrinin statistikaya marağını artırmaq, statistik biliklərə malik istedadlı şagird və tələbələri aşkar etmək, onları həvəsləndirmək və intellektual inkişaflarına təkan vermək, statistik kadr hazırlığı potensialını gücləndirmək, statistik savadlılığı dərinləşdirmək, cəmiyyətdə Azərbaycan xalqının Ümummilli Lideri Heydər Əliyevin həyat və fəaliyyətinə, onun milli statistika sisteminin beynəlxalq standartlara uyğun təkmilləşdirilməsi və dünya statistika sisteminə inteqrasiyası, ümumilikdə statistika sisteminin inkişafına verdiyi töhfələrə dair məlumatlılığın daha da artırılması olmuşdur. Vurğulanıb ki, olimpiada şagird və tələbələrin təhsil dövründə qazandıqları statistik bilik və bacarıqlarını nümayiş etdirmələri üçün yeni platforma rolunu oynayıb, eyni zamanda onlar statistika elmi, habelə ölkənin sosial-iqtisadi həyatında baş verən hadisə və proseslər haqqında daha geniş rəsmi statistik məlumatlar əldə etmək imkanı qazanıblar.

Statistik olimpiadanın yekunlarına dair hesabat məruzəsi ilə çıxış edən Dövlət Statistika Komitəsi sədrinin müavini, təşkilat komitəsinin sədri Yusif Yusifov qeyd edib ki, statistik olimpiada Azərbaycan xalqının ümummilli lideri Heydər Əliyevin anadan olmasının 100-cü ildönümü ilə əlaqədar onun əziz xatirəsinə ehtiram əlaməti olaraq həyata keçirilən tədbirlər çərçivəsində, Dövlət Statistika Komitəsi kollegiyasının 14 dekabr 2022-ci il tarixli, 8/1 nömrəli qərarı ilə təsdiq edilmiş təqvim planına uyğun təşkil olunmuş, olimpiadanın şəffaf, obyektiv və peşəkar səviyyədə təşkili və keçirilməsini, bununla bağlı ölkə üzrə fəaliyyətlərin əlaqələndirilməsini təmin etmək məqsədilə Dövlət Statistika Komitəsində təşkilat komitəsi yaradılıb. Olimpiada təşkilat komitəsi tərəfindən təsdiq edilmiş qaydalara və tədbirlər planına uyğun keçirilib, bu məqsədlə test tapşırıqları və nəticələrin real vaxt rejimində əldə edilməsi üçün elektron informasiya sistemi hazırlanıb.

Olimpiadada ümumilikdə 3106 nəfər şagird, 203 nəfər tələbə iştirak etmişdir. Şagirdlər arasında keçirilmiş olimpiadanın nəticələrinə görə İsmayıllı rayonu Diyallı kənd Aqil Məmmədov adına tam orta məktəbin 11-ci sinif şagirdi Göyüşov Namaz Veyis oğlu 1-ci, Masallı rayonu Musaküçə kənd Fayəddin Xancanov adına tam orta məktəbin 11-ci sinif şagirdi Kazımzadə Mircəlal Mirkazım oğlu 2-ci, Lənkəran rayonu Hirkan qəsəbə Ağaxan Quliyev adına tam orta məktəbin 10-cu sinif şagirdi - Baxşiyev Cavidan Cavid oğlu 3-cü, tələbələrdən isə Azərbaycan Dövlət İqtisad universitetinin 2-ci kurs magistrantı Topçubaşova Yaqut Əziz qızı 1-ci, Bakı Mühəndislik Universitetinin 4-cü kurs tələbəsi İslamov İsrafil Rasim oğlu 2-ci, Azərbaycan Memarlıq və İnşaat Universitetinin 3-cü kurs tələbəsi - Mirzəyeva Nigar Oqtay qızı isə 3-cü yeri tutmuşdur.

Tədbirdə daha sonra statistik olimpiadanın final mərhələsinə keçmiş tələbə və şagirdlərə sertifikat və hədiyyələr, olimpiadanın qaliblərinə isə diplom və hədiyyələr təqdim olunmuşdur.

Sonda xatirə şəkilləri çəkilmişdir.

Paylaş:

Baxılıb: 719 dəfə