Ermənistanın qarayaxma kampaniyası fiaskoya məhkumdur

Bakı:

24 °C

47 %

3 m/s

Əlaqə

AZ RU EN

Ana səhifə / Siyasət / Ermənistanın qarayaxma kampaniyası fiaskoya məhkumdur

Ermənistanın qarayaxma kampaniyası fiaskoya məhkumdur

30.09.2023 [11:24]

Hikmət Hacıyev: Azərbaycan Qarabağın erməni sakinlərinin ərazidə qalmağını istəyir

Azərbaycan Ordusunun 24 saat ərzində keçirdiyi lokal antiterror tədbirləri nəticəsində Qarabağdakı separatçı rejimin təslim olması və özünü buraxması Ermənistanın və onun xarici havadarlarının təxibatçı planlarını pozdu. Bu səbəbdən, Azərbaycana qarşı növbəti qarayaxma kampaniyalarına başlanılıb. Bu dairələr Qarabağdan Ermənistana könüllü gedən erməni sakinlərdən növbəti siyasi şou düzəltməyə çalışırlar. Ermənistanın baş naziri Nikol Paşinyan Azərbaycanın guya Qarabağ ermənilərini “etnik təmizləməyə” məruz qoyduğunu deyərək, beynəlxalq birliyi bunu “pisləməyə” çağırıb.

Azərbaycanın Xarici İşlər Nazirliyi isə Paşinyanın bu bəyanatını əsassız sayaraq rədd edib. Bu barədə nazirliyin açıqlamasında qeyd olunub ki, bu cür həyəcan təbili çalan rəvayət, Ermənistan baş nazirinin Azərbaycan tərəfindən erməni sakinlərə qarşı heç bir təhlükənin olmadığını söylədiyi 21 sentyabr tarixli bəyanatı ilə ziddiyyət təşkil etməklə yanaşı, o cümlədən Azərbaycanın humanitar dəstək və reinteqrasiya istiqamətində göstərdiyi səyləri pozmağa və Azərbaycan ilə Ermənistan arasında sülhün mümkün perspektivlərini sarsıtmağa hədəflənib. Ermənistan rəhbərliyi, Azərbaycanın mərkəzi hökumət institutlarının operativ şəkildə Qarabağ bölgəsində yaşayan erməni sakinlər üçün zəruri humanitar dəstək tədbirlərinin həyata keçirilməsinə və təcili ehtiyaclarının ödənilməsinə başladığını nəzərdən qaçırır. “Azərbaycanın Qarabağ bölgəsində yaşayan erməni sakinlərin gedişinin onların şəxsi və fərdi qərarı olduğu, bunun məcburi yerdəyişmə ilə heç bir əlaqəsi olmadığı baş nazir Paşinyana yaxşı məlumdur. Əgər erməni sakinlərin hansısa seqmenti Azərbaycan qanunvericiliyi və hakimiyyəti çərçivəsində yaşamaq və ona tabe olmaq istəmirsə, onları buna məcbur edə bilmərik. Bunun əksinə, biz erməni sakinləri öz yaşayış yerlərini tərk etməməyə və multietnik Azərbaycan cəmiyyətinin bir hissəsi olmağa çağırırıq. Ermənistan regionda sülhün və təhlükəsizliyin bərqərar olması üçün erməni sakinlərin reinteqrasiya prosesinə maneələri aradan qaldırmalı və hər iki ölkənin ərazi bütövlüyü və suverenliyinə əsaslanan sülh müqaviləsi üzrə danışıqlar prosesinin uğurla başa çatmasına fokuslanmalıdır”, - deyə XİN bəyan edib.

Yeri gəlmişkən, Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev “CBC News”a müsahibəsində deyib ki, Azərbaycan Qarabağın erməni sakinlərinin ərazidə qalmağını istəyir: “Azərbaycanın onları təhlükəsiz və daha yaxşı yaşayış şəraiti ilə təmin etmək istiqamətində hərtərəfli planı var. Ancaq istəyəcəkləri təqdirdə ərazini tərk etməkdə də sərbəstdirlər. Azərbaycanın Qarabağdakı erməni sakinləri oranı tərk etməyə məcbur etmək kimi bir planı olmayıb və hazırda da yoxdur. Əksinə, Azərbaycan Qarabağda qaldıqları təqdirdə onların təhlükəsizliyinə tam zəmanət verdiyini bildirib. Biz onların qalmağını istərdik. Azərbaycan onlara təhlükəsizliklərinin təmin ediləcəyi ilə bağlı çağırışlara davam edir. Amma biz ermənilərin hərəkət sərbəstliyini də dayandıra bilmərik. Bu, ərazidəki hər kəsin suveren və şəxsi seçimidir”.

Hikmət Hacıyev Ermənistanın baş naziri Nikol Paşinyanın əsassız bəyanatını şərh edərkən “etnik təmizləmə” ifadəsindən yararlanmasını da təhqir adlandırıb: “Təəssüf ki, dezinformasiya elementlərinin çox olduğunu görürük. Azərbaycan heç vaxt etnik təmizləmə həyata keçirməyib və keçirməz, ərazidə mülki insanlara qarşı güc tətbiq etmək kimi bir vəziyyət yoxdur”.

Prezidentin köməkçisi bildirib ki, Azərbaycan hökuməti avtomobili olmayan erməni sakinlərin kömək istəməsindən sonra Xankəndiyə avtobuslar göndərib: “Lakin insanlar avtobuslara minməyə məcbur edilmirlər. Azərbaycan əlindən gələni edəcək və elə bir yol təşkil edəcək ki, mülki insanlar təhlükəsiz şəkildə seçdikləri istiqamətə gedə bilsinlər”. O, diqqətə çatdırıb ki, Azərbaycan bir neçə gün ərzində BMT-nin beynəlxalq ekspert qrupunu mediaya çıxış potensialı ilə birlikdə əraziyə buraxmaq niyyətindədir.

Ermənistanın baş naziri Nikol Paşinyanın uydurma “etnik təmizləmə” iddiasını ifşa edən tutarlı faktlardan biri Qarabağın erməni sakinlərinin qeydiyyatının aparılması üçün konkret addımların atılmasıdır. Belə ki, Azərbaycan Prezidentinin Administrasiyasının sentyabrın 28-də açıqladığı məlumata görə, Azərbaycan Respublikasının Qarabağ bölgəsində yaşayan erməni sakinlərin Azərbaycan cəmiyyətinə dayanıqlı reinteqrasiyasının təmin edilməsi və Azərbaycan dövlətinin himayəsindən istifadə etmələrinə imkan yaradılması məqsədilə Qarabağ bölgəsində sosial, humanitar, iqtisadi və infrastruktur məsələlərinin həlli üzrə İşçi qrupa həmin şəxslərin hüquqi statusunun müəyyən olunması ilə bağlı müvafiq tapşırıqlar verilib. Bu fəaliyyət çərçivəsində ilkin mərhələdə Qarabağ bölgəsində yaşayan erməni sakinlərin qeydiyyatının aparılması nəzərdə tutulur. Müraciətlərin qəbulu və qeydiyyata alınma prosesi Dövlət Miqrasiya Xidməti tərəfindən bu məqsədlə yaradılmış xüsusi portal vasitəsilə müraciət edən şəxslərin maksimum rahatlığı və informasiya əlçatanlığını təmin edəcək şəkildə elektron qaydada həyata keçiriləcək. İlkin qeydiyyata alınma Qarabağ bölgəsində yaşayan erməni sakinlərin bütün dövlət xidmətlərindən səmərəli şəkildə yararlanmasına, həmçinin sosial-iqtisadi və humanitar ehtiyaclarının qarşılanmasına imkan yaradacaq. Azərbaycan Prezidentinin Administrasiyası nəzərə çatdırıb ki, “Qarabağ bölgəsində yaşayan erməni sakinlər ilkin qeydiyyata alınmaq üçün könüllü şəkildə reintegration.gov.az portalına və ya müvafiq əlaqə vasitələri ilə müraciət edə bilərlər”.

Beləliklə, bu faktlar Azərbaycan dövlətinin Qarabağ ermənilərinin reinteqrasiyasına maraqlı olduğunu təsdiqləyir. Ona görə də, Ermənistanın qarayaxma kampaniyası fiaskoya məhkumdur. Eləcə də, bölgəyə gələcək BMT missiyası da bu reallığın şahidi olacaq.

Nardar BAYRAMLI

Paylaş:

Baxılıb: 479 dəfə