İsveçin imtinası...

Bakı:

29 °C

50 %

3 m/s

Əlaqə

AZ RU EN

Ana səhifə / Siyasət / İsveçin imtinası...

İsveçin imtinası...

21.12.2022 [10:44]

Türkiyənin tələblərini yerinə yetirməməklə özünün NATO yolunu bağlayır

İsveçdə yaşayan Fəthullahçı Terror Təşkilatının (FETÖ) üzvü Bülənt Keneşin Türkiyəyə ekstradisiyası tələbinin rədd edildiyi açıqlanıb. İsveç Ali Məhkəməsindən verilən açıqlamada ekstradisiya tələbinin yerinə yetirilməsi üçün şübhəlinin 1 il və ya daha çox müddətə azadlıqdan məhrum edilməsinin lazım olduğu və Keneş üçün belə bir durumun olmadığı bildirilib.

Xatırladaq ki, bu ilin iyununda NATO-nun Madrid Sammitində Türkiyə, Finlandiya və İsveç arasında danışıqlar baş tutmuşdu. Danışıqların nəticəsi olaraq isə üçtərəfli Memorandum imzalanmışdı. Qeyd edək ki, Memorandumda öz əksini tapan müddəalara görə, hər iki Skandinaviya ölkəsi PKK və FETÖ üzvləri ilə bağlı ekstradisiya məsələsini aktual saxlamalı və adıçəkilən terror təşkilatı üzvlərinin Türkiyəyə ekstradisiyalarını təmin etməli idi. Türkiyənin İsveçdən ekstradisiyasını istədiyi terrorçular arasında isə FETÖ üzvü olduqları iddia edilən Harun Tokak, Yılmaz Aytan, Murat Çetiner, Alperen Melikhan Doğan, Bülent Keneş, Orhan Er və Harun Ayvaz da var.

Yeri gəlmişkən, Prezident Rəcəb Tayyib Ərdoğan noyabrın 9-da İsveç Baş naziri Ulf Kristersson ilə görüşündə də FETÖ-çü Bülent Keneşin təhvil verilməsinin Türkiyə üçün böyük önəm kəsb etdiyini demişdi. Təşkil edilən birgə mətbuat konfransında çıxış edən Prezident Ərdoğan bildirmişdi ki, görüşümüzün hədəfi, xüsusilə, İsveçin terrorla mübarizədə bu nöqtədə tutduğu mövqedir: “FETÖ üzvü Bülent Keneş İsveçdəndir. Türkiyəyə deportasiya olunması bizim üçün önəmlidir. İsveçin bu mövzuda daha həssas olmasını gözləyirik”.

Amma bu ekstradisiya baş tutmadı. Bu isə hadisələrin fərqli məcrada inkişafını təmin edə bilər.

Məsələ ilə bağlı fikirlərini bölüşən Milli Məclisin Azərbaycan-Türkiyə parlamentlərarası əlaqələr üzrə işçi qrupunun üzvü Ramil Həsən bildirib ki, artıq qlobal aktora çevrilmiş Türkiyə ən yüksək səviyyədə öz maraqlarını qorumaq əzmindədir. NATO kimi mühüm bir təşkilatın genişlənməsi ilə bağlı məsələ məhz Türkiyənin iradəsinə əsaslanır: “Bu ilin iyununda baş tutmuş Madrid Zirvə görüşündə rəsmi Ankara ilə iki Skandinaviya ölkəsi arasında rəsmi razılaşma imzalandı. İmzalanan Memoranduma əsasən, rəsmi Ankaranın tələblərinə qarşı Skandinav ölkələri PKK və onun uzantıları ilə mübarizədə Türkiyə ilə tam əməkdaşlığa, terrorun bütün forma və təzahürləri ilə mübarizədə Türkiyə ilə həmrəylik nümayiş etdirilməsinə, PYD/YPG və FETÖ-yə dəstək verməmək öhdəliyinə razılaşıb. İndiki halda isə, İsveçin atdığı addım bu razılaşma ilə uyğun gəlmir. Bu mənada, Türkiyə lazım olan cavabı verəcək. Fikrimcə, prosesin bu şəkildə inkişafı İsveçin NATO yolunda irəliləməsinə böyük bir maneəyə çevriləcək”.

Millət vəkilinin fikrincə, Türkiyənin və bu ölkənin Prezidentinin məsələ ilə bağlı mövqeyi qətidir. R.Həsən Prezident Ərdoğanın bir müddət öncə baş tutmuş “Səfirlər Konfransı”ndakı çıxışını xatırladıb. “Prezident Ərdoğan qeyd etmişdi ki, verilən vədlər yerinə yetirilməsə, Türkiyə bu iki dövlətin NATO üzvlüyünə razılıq verməyəcək. Dövlət başçısı vurğulamışdı ki, bu mövqe NATO-nun Madriddə keçirilən sonuncu sammitində bir daha nümayiş etdirilib. O qətiyyətlə bildirmişdi ki, küçələrində PKK-çıların dolaşdığı dövlətlərin üzvlüyü NATO-nun müdafiə etdiyi dəyərlərə xələl gətirəcək. Təbii ki, səslənən həmin bəyanat bu gün də aktualdır. Türkiyə bu gün dünyanın hərbi nizamının tənzimlənməsində rol onayan ölkədir. Bu baxımdan da, Türkiyənin xəbərdarlığı İsveç üçün mühüm əhəmiyyət kəsb etməlidir”, - deyə millət vəkili əlavə edib.

P.SADAYOĞLU

Paylaş:

Baxılıb: 988 dəfə