Təxribatlar davam edir...

Bakı:

30 °C

51 %

3 m/s

Əlaqə

AZ RU EN

Ana səhifə / Siyasət / Təxribatlar davam edir...

Təxribatlar davam edir...

09.08.2022 [10:25]

Nicat DİLQƏMLİ

Azərbaycan-Ermənistan sərhədində artıq bir neçə gündür gərginlik müşahidə edilir. Azərbaycan ərazisindəki qeyri-qanuni erməni silahlı dəstələrinin avqustun 3-də Ordumuzun bölmələrinə qarşı törətdiyi terror-təxribat nəticəsində hərbi qulluqçumuz əsgər Kazımov Anar Rüstəm oğlu şəhid olub. Bundan əlavə, qeyri-qanuni erməni silahlı dəstələrinin ünsürləri Kəlbəcər və Laçın rayonlarının ərazisini əhatə edən dağ silsiləsində yerləşən Qırxqız yüksəkliyini ələ keçirmək və orada yeni döyüş mövqelərini qurmağa cəhd göstərib.

Azərbaycan Ordusu bölmələrinin keçirdiyi “Qisas” cavab əməliyyatı nəticəsində Qır?qız yüksəkliyi, həmçinin Kiçik Qafqaz dağ silsiləsinin Qarabağ silsiləsi boyu Sarıbaba və bir sıra digər əhəmiyyətli hakim yüksəkliklər nəzarətə götürülüb.

Azərbaycan Müdafiə Nazirliyinin (MN) dünən yaydığı rəsmi açıqlamada isə ötən sutka ərzində erməni silahlı birləşmələri tərəfindən mövqelərimizin ümumilikdə 10 dəfə atəşə tutulduğu bildirilir: “Bunlardan 6-sı Azərbaycan-Ermənistan dövlət sərhədinin Basarkeçər, Qarakilsə və Gorus rayonları istiqamətlərində yerləşən mövqelərindən Ordumuzun Kəlbəcər və Laçın rayonları istiqamətlərində yerləşən mövqelərini atəşə tutmaqla baş verib”.

“Digər 4 hadisə isə Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Azərbaycan Ordusunun Kəlbəcər, Goranboy və Füzuli rayonları istiqamətlərində yerləşən mövqelərini snayper tüfəngindən və müxtəlif çaplı atıcı silahlardan fasilələrlə atəşə tutmaqla qeydə alınıb”.

Məlumatda qeyd olunur ki, şəxsi heyət və texnikamızda itki yoxdur: “Bütün hallarda Azərbaycan Ordusunun bölmələri tərəfindən adekvat cavab tədbirləri görülüb. Bildiririk ki, son vaxtlar Azərbaycan-Ermənistan dövlət sərhədində, eləcə də Rusiya sülhməramlılarının müvəqqəti yerləşdiyi Azərbaycan ərazisində baş verən gərginliyə görə bütün məsuliyyət Ermənistanın hərbi-siyasi rəhbərliyinin üzərinə düşür”.

“Son vaxtlar Kəlbəcər və Laçın istiqamətində baş verən təxribatlara müxtəlif prizmalardan yanaşmaq olar”. “Yeni Azərbaycan” qəzetinə danışan hərbi məsələlər üzrə ekspert Ramil Məmmədli bu qənaətdədir. Ekspertin sözlərinə görə, məsələyə “Ermənistan nə istəyir?” sualı qoyaraq yanaşdıqda bəzi məqamlar ortaya çıxmış olur: “Onların düşüncəsinə görə, birinci məqam diqqəti yenidən Qarabağ probleminə, “münaqişənin həlli”nə yönəltmək məsələsidir. İkinci bir məsələ ermənilərin orada hansısa bir hüquqi statusa nail olmaq istəyidir. Sonuncu məsələ isə Ermənistanın öz üzərinə götürdüyü öhdəlikləri icra etməməsidir. Bu məsələyə ümumiləşdirilmiş formada yanaşdıqda meydana çıxan məqam Ermənistan tərəfindən sülhün bərqərar olunması üçün atılan addımlarda siyasi iradənin nümayiş etdirilməməsidir”.

Hərbi ekspert hesab edir ki, Ermənistan, xüsusilə Kəlbəcər və Laçın istiqamətində atəşkəsi davamlı olaraq pozmaqla həmin ərazidə müəyyən hərbi-taktiki uğur qazanmaq istəyir, bununla yanaşı prosesdə mövcudluğunu sübut etməyə çalışır: “Təbii ki, bunun da əsas səbəblərindən biri üçtərəfli bəyanatın müddəalarının doğru-düzgün icra olunmamasıdır. Xüsusilə də 10 noyabr bəyanatının 4-cü bəndinin - Erməni silahlı birləşmələrinin Azərbaycan ərazisindən, Qarabağdan çıxması. Hesab edirəm ki, bu məsələ əsas məqamlardan biridir və Azərbaycan həmişə olduğu kimi, sonuncu dəfə də öz mövqeyini ortaya qoydu. Dövlətimizin başçısı sonuncu dəfə də bu məsələ ilə bağlı açıq şəkildə fikrini bildirdi”.

R.Məmmədli açıqlamasında hadisələrin belə davam edəcəyi halda anti-terror əməliyyatının qaçılmaz olduğunu da diqqətə çatdırıb: “Ermənistan hərbi birləşmələri oradan çıxmalıdır. Əks təqdirdə, bu cür qarşıdurmalar, təxribatlar olacaq. Və təəssüfedici hal da odur ki, proses belə davam edərsə, bir müddətdən sonra Azərbaycan təkrar olaraq anti-terror əməliyyatı keçirmək məcburiyyətində qalacaq”.

Paylaş:

Baxılıb: 697 dəfə