Azərbaycanın mülki aviasiya işçiləri peşə bayramlarını qeyd ediblər

Bakı:

29 °C

54 %

1 m/s

Əlaqə

AZ RU EN

Ana səhifə / Siyasət / Azərbaycanın mülki aviasiya işçiləri peşə bayramlarını qeyd ediblər

Azərbaycanın mülki aviasiya işçiləri peşə bayramlarını qeyd ediblər

03.06.2009 [15:22]

Azərbaycanın mülki aviasiya işçiləri dünən peşə bayramlarını - Mülki Aviasiya gününü qeyd ediblər. Builki bayram Azərbaycan Mülki Aviasiyasının 71-ci ildönümünə təsadüf edib. “Azərbaycan Hava Yolları” Qapalı Səhmdar Cəmiyyətinin, Milli Aviasiya Akademiyasının, Azərbaycan Dövlət Mülki Aviasiya Administrasiyasının rəhbərliyi və əməkdaşları Fəxri Xiyabana gələrək ümummilli lider Heydər Əliyevin məzarı önünə əklil qoyub, müstəqil dövlətimizin memarı və qurucusunun əziz xatirəsini ehtiramla yad ediblər.
Görkəmli oftalmoloq alim, akademik Zərifə xanım Əliyevanın da məzarı üzərinə çiçək dəstələri düzülüb. Sonra “Holiday İnn” mehmanxanasında mərasim keçirilib.
Milli Aviasiya Akademiyasının rektoru, akademik Arif Paşayevin də iştirak etdiyi mərasimdə aviatorlar marşı səslənib, “Azərbaycan Hava Yolları” Qapalı Səhmdar Cəmiyyətinin prezidenti Cahangir Əsgərov peşə bayramı münasibətilə Prezident İlham Əliyevin Sərəncamı ilə “Şöhrət” ordeni ilə təltif edilən iki nəfərə ali dövlət mükafatını təqdim edib.
Yığıncaqda məruzə ilə çıxış edən Azərbaycan Mülki Aviasiya Administrasiyasının (AMAA) direktoru Arif Məmmədov bildirib ki, Prezident İlham Əliyevin müvafiq Sərəncamına əsasən, ölkə aviatorları 2006-cı ildən başlayaraq peşə bayramlarını qeyd edirlər. Bu gün həm də Azərbaycan Mülki Aviasiyasının həyatında tarixi bir gündür, ölkəmizin mülki aviasiyasının 71 yaşı tamam olur.
Mülki aviasiyamızın inkişafında ümummilli liderimiz Heydər Əliyevin böyük xidmətlərini vurğulayan məruzəçi deyib ki, aviatorlar aviasiyamızın milli strategiyasının əsl memarı olan ulu öndərə həmişə minnətdar olacaqlar. ölkəmizdə mülki aviasiyamızın inkişafına, infrastrukturunun təkmilləşdirilməsinə, aviaparkın yeniləşməsinə Prezident İlham Əliyevin qayğı və diqqəti olduqca böyük əhəmiyyətə malikdir.
Mülki aviasiyanın ötən bir illik qısa tarixinə nəzər salan A.Məmmədov qeyd edib ki, 2008-ci ildə “AZAL” Qapalı Səhmdar Cəmiyyəti yaranıb və bu cəmiyyətin, onun strukturunun formalaşması başa çatıb. İki müasir aeroport - “Lənkəran” və “Zaqatala” hava limanları yenidən qurulub və istismara verilib. Milli aviaşirkətimizin parkına daxil olan “ATR-42” və “ATR-72” təyyarələri üçün uçuş heyətinin hazırlanması uğurla davam edir və yay mövsümündə onlar tam həcmdə istismar ediləcək. Qısa müddətdə - 2005-2008-ci illər ərzində şirkətlərimizin aviaparkı “Airbus-319”, “ATR-42-500” və “ATR-72-500” tipli yeni sərnişin təyyarələri, müasir mühərriklərlə təchiz edilib, “İL-76” yük təyyarələri və müasir “Evrokopter” vertolyotları ilə təzələnib. “An-12” və “İL-76” təyyarələrini istismar edən “Silk Way” yük şirkəti “Boinq-747” hava gəmisini parkına daxil edib və onun istismarına başlayıb.
Məruzəçi qeyd edib ki, ötən il fəaliyyətə başlayan Dövlət Mülki Aviasiya Administrasiyası mülki aviasiya sahəsinin hüquqi bazasının formalaşması məqsədi ilə ötən il ərzində bir çox qaydaları təzələyib, aviasiya sahəsinin təməlinin möhkəmlənməsinə, uçuşların təhlükəsizliyinə yönəldilən sənədlər işləyib hazırlayıb. Bu il İKAO tərəfindən keçirilən təkrar audit zamanı görülən işlərə yüksək qiymət verilib. İndi EKAG və FAA tərəfindən keçiriləcək auditlərə hazırlıq prosesi gedir.
Hazırda ölkəmizin EVROCONTROL-a üzv olması üçün müzakirələr aparıldığını deyən A.Məmmədov bildirib ki, Azərbaycan ümumdünya Mülki Aviasiya sistemində 20-dən artıq beynəlxalq konvensiyaya qoşulub və daha iki konvensiyaya qoşulmaq barədə müzakirələr aparılır. 2008-ci ildə beynəlxalq təşkilatların bir neçə seminarı Bakıda keçirilib. Bir neçə gündən sonra mülki aviasiya üzrə Baku Kaspian Karqo Sammitinin üçüncü iclası öz işinə başlayacaq. Oktyabrın 7-8-də EKAG aviasiya təhlükəsizliyi üzrə seminarın Bakıda keçirilməsini nəzərdə tutub. Bu cür tədbirlərin Bakıda keçirilməsi aviasiya sahəmizin beynəlxalq aləmdə nüfuzunun artmasına zəmin yaradır. Bu gün aviatorlar peşə bayramlarını qürur hissi ilə qeyd edir, sabaha nikbinliklə baxır, aviasiyamızın gələcəyinə böyük ümid bəsləyirlər.
Yığıncaq iştirakçıları adından Azərbaycan Prezidenti İlham Əliyevə müraciət qəbul edilib.

Paylaş:

Baxılıb: 1637 dəfə