Azərbaycan məqsədyönlü imic siyasəti vasitəsilə öz dinamik inkişafını nümayiş etdirir

Bakı:

18 °C

72 %

3 m/s

Əlaqə

AZ RU EN

Ana səhifə / Siyasət / Azərbaycan məqsədyönlü imic siyasəti vasitəsilə öz dinamik inkişafını nümayiş etdirir

Azərbaycan məqsədyönlü imic siyasəti vasitəsilə öz dinamik inkişafını nümayiş etdirir

05.02.2016 [09:42]

Rusiyanın nüfuzlu “Mejdunarodnaya jizn” elmi-analitik jurnalında siyasi elmlər namizədi, “Public Diplomacy Group” beynəlxalq konsaltinq şəbəkəsinin rəhbəri, Rusiyanın Azərbaycanlı Gənclər Birliyinin (RAGB) nəzarət-təftiş komissiyasının üzvü İbrahim İbrahimovun “Qlobal imic layihələri Azərbaycanın dövlət brendinin formalaşması vasitəsi kimi” sərlövhəli məqaləsi (bax: https://interaffairs.ru/news/show/14521) dərc olunub.
Məqalə qlobal bazarlar və müasir media dövründə beynəlxalq münasibətlərin əsas vasitəsi kimi dövlət brendinin yaradılması məsələsinə həsr olunub, dövlət brendi anlayışı isə özündə iqtisadi, siyasi və mədəni aspektləri ehtiva edən çoxşaxəli kateqoriya kimi təqdim edilib.
Məqalədə deyilir ki, milli brendinqin rolunun artmasını ilk növbədə modern və beynəlxalq münasibətlər geosiyasəti paradiqmalarının postmodern “obrazlar və təsir dünyası” konsepsiyası ilə əvəzlənməsi şərtləndirir. Müəllif yazır ki, dövlətin beynəlxalq arenada uğur qazanması üçün müasir siyasətçilər brend-menecment vərdişlərinə yiyələnməlidirlər.
Milli brend-menecment sahəsində müasir xarici konsepsiyaların nəzəri bazalarının geniş tədqiqinə əsaslanan müəllif Azərbaycanın dövlət brendinqi strategiyasının konseptual əsaslarının təhlilini aparıb və onları yığcam ifadə edib.
Gənc azərbaycanlı alimin fikrincə, müstəqilliyini 25 il əvvəl bərpa edən Azərbaycan üçün düzgün brendinq strategiyasının qurulması həm siyasi, həm də iqtisadi əhəmiyyət daşıyan vacib strateji məsələdir. Məqalədə deyilir: “Sovet İttifaqının dağılması Azərbaycana beynəlxalq humanitar məkanda öz identikliyini formalaşdırmaq, qlobal dünyada öz yerini müəyyən etmək üçün tarixi imkan verdi. Deməli, Azərbaycan brendində dünyaya müraciət yer almalıdır. Bir tərəfdən o, Azərbaycan tarixini, mədəniyyətini əks etdirməli, yəni Azərbaycanın milli kökləri barədə məlumat verməli, digər tərəfdən, gələcəyə tuşlanmalı, ölkənin inkişaf vektorunu, onun müasirliyini nümayiş etdirməli, həm daxili, həm də xarici auditoriyanı ruhlandırmalı, cəlb etməlidir”.
Bu kontekstdə müəllif dövlət brendinin formalaşmasının səmərəli vasitələrindən biri kimi Azərbaycanda qlobal əhəmiyyətli mədəni, idman və siyasi tədbirlərin təşkilinə xüsusi yer ayıraraq yazır: “Bir tərəfdən bu, dövlətin artan iqtisadi qüdrətini nümayiş etdirmək üçün nadir imkan, digər tərəfdən, Azərbaycanın inkişaf vektorunun, dünya birliyində sanballı mövqeni hədəf götürən, yaradıcı inkişafa və beynəlxalq əməkdaşlığa tuşlanan ambisiyalarının göstəricisidir”.
Müəllif hesab edir ki, irimiqyaslı beynəlxalq tədbirlərin keçirilməsi Azərbaycanın qlobal proseslərdə tərəfdaşların etibarını və hörmətini qazanan fəal iştirakçı imicini formalaşdırır. Eyni zamanda, imic xarakterli tədbirlərin keçirilməsi çoxsaylı xarici qonaq qəbul etmək üçün zəruri olan infrastrukturun - hava limanlarının, mehmanxanaların, beynəlxalq səviyyəli idman və mədəniyyət qurğularının, mədəniyyət mərkəzlərinin və s. geniş miqyaslı inkişafını tənzimləyərək, ölkənin təkcə siyasi deyil, həm də xarici simasını dəyişir.
Müəllif yazır: “Qlobal əhəmiyyətli beynəlxalq tədbirlərin keçirilməsinə həm ictimai diplomatiya kontekstində, həm də xarici turizmin inkişafı və ölkənin investisiya cəlbediciliyinin artırılması nöqteyi-nəzərindən baxılmalıdır. Azərbaycanın regional mədəni və siyasi mərkəz kimi təşəkkülü onun bir dövlət kimi cəlbediciliyini və buna müvafiq olaraq, Qarabağ münaqişəsinin sülh yolu ilə həlli üçün onun “yumşaq güc” imkanlarını artırır”.
Müəllif tutarlı arqumentlərlə sübut edir ki, Bakıda dünyanın elmi, siyasi və işgüzar elitasının görkəmli nümayəndələrinin cəlb olunduğu nüfuzlu tədbirlərin müntəzəm keçirilməsi Azərbaycanın mühüm beynəlxalq və humanitar meydan brendini formalaşdırır. Onun fikrincə, Ümumdünya Mədəniyyətlərarası Dialoq Forumu, Bakı Humanitar Forumu və Qlobal Açıq Cəmiyyətlər Forumu kimi beynəlxalq tədbirlər bu strategiyanın karkasıdır. Azərbaycanda belə diskussiya meydanlarının yaradılması brend yaratmaqdan başqa, ölkənin ictimai diplomatiyasının bir sıra mühüm məsələlərinin həllinə də kömək edir.
Məqalədə idman diplomatiyasının təkcə ölkənin müsbət imicinin formalaşmasında deyil, həm də xarici turizmin inkişafında təsirli mexanizm olduğu vurğulanıb. Müasir dünyada beynəlxalq idman ilə siyasətin qarşılıqlı təsiri şəksizdir. Bu da idmanı “yumşaq gücün” ayrılmaz komponentinə çevirir. Müəllif birinci Avropa Oyunlarının keçirilməsini, qarşıdan gələn Şahmat Olimpiadasını və İslam Həmrəylik Oyunlarını bu baxımdan yüksək qiymətləndirib.
Qeyd edək ki, məqalədə sadalanan, ölkənin brendini formalaşdıran imic aksiyalarının təsiri çoxsəviyyəli xarakter daşıyır. Humanitar forumların keçirilməsi Azərbaycanın ilk növbədə məhdud hədəf auditoriya (dünya intellektual, siyasi və işgüzar elitası) tərəfindən qəbul edilməsinə təsir göstərirsə, mədəni-kütləvi tədbirlər (musiqi müsabiqələri, idman yarışları) geniş auditoriyanı əhatə etməyə imkan verir.
Beləliklə, müstəqilliyini 25 ildən bir qədər əvvəl bərpa edən Azərbaycan Respublikası məqsədyönlü imic siyasəti vasitəsilə müasirliyini, dinamik inkişafını nümayiş etdirir, siyasi, idman və humanitar təşəbbüslərin yeni mərkəzi kimi dünya siyasi xəritəsində öz yerini təsdiq edir.

Paylaş:

Baxılıb: 633 dəfə