Ölkələr öz multikultural təhlükəsizliyini düzgün qursalar, onların həyatında təhlükəli məqamlar azalar

Bakı:

25 °C

62 %

4 m/s

AZ RU EN

Ana səhifə / Siyasət / Ölkələr öz multikultural təhlükəsizliyini düzgün qursalar, onların həyatında təhlükəli məqamlar azalar

Ölkələr öz multikultural təhlükəsizliyini düzgün qursalar, onların həyatında təhlükəli məqamlar azalar

19.05.2015 [09:52]

Bakıda öz işini uğurla davam etdirən üçüncü Ümumdünya Mədəniyyətlərarası Dialoq Forumu çərçivəsində “Multikulturalizm: Gələcək vəd edən həqiqətlər” mövzusunda seminar keçirilib.
AZƏRTAC xəbər verir ki, tədbirə moderatorluq edən Azərbaycan Respublikasının millətlərarası, multikulturalizm və dini məsələlər üzrə Dövlət müşaviri, akademik Kamal Abdullayev seminarın çox aktual bir mövzuya həsr olunduğunu bildirib.
K.Abdullayev deyib ki, bu gün biz öz terminologiyamıza daha bir təhlükəsizlik konsepsiyasını əlavə edə bilərik. Bu, bir ölkə daxilində multikultural təhlükəsizlik ifadəsidir. Ölkələr öz multikultural təhlükəsizliyini doğru-düzgün qura bilsələr, onların siyasi, iqtisadi, mədəni həyatında təhlükəli məqamlar daha az olar. Azərbaycan bu gün özünün multikultural təhlükəsizliyini təmin etməyə çalışan bir ölkədir. Bu bizim həyatımızın müxtəlifliyindən, zənginliyindən, millətlərin bu ölkədə qardaş kimi yaşamasından irəli gəlir.
Rusiya Rəssamlıq Akademiyasının vitse-prezidenti Tahir Salahov Azərbaycan paytaxtında belə bir forumun keçirilməsindən mənən qürur duyduğunu söyləyib. Dünya şöhrətli rəssam bildirib ki, Azərbaycan hazırda elmi və mədəni beynəlxalq əməkdaşlıqda ən münbit mərkəzlərdən birinə çevrilib. Bakıda Prezident İlham Əliyevin dəstəyi ilə gənc nəsil müasir incəsənət qalereyaları yaradır. Məhz bunun nəticəsində Azərbaycan rəssamları dünya incəsənət proseslərinin fəal iştirakçısına çevriliblər.
Bu istiqamətdə YARAT Müasir İncəsənət Mərkəzinin fəaliyyətini yüksək qiymətləndirən Tahir Salahov bildirib ki, Mərkəz gənc rəssamların yaradıcılığını dəstəkləyir və onların təbliğinə öz töhfəsini verir. Azərbaycanın milli mədəniyyətini unutmayan gənclər, eyni zamanda yeni ideyaların daşıyıcılarıdırlar.
UNESCO-nun keçmiş baş direktoru Koişiro Matsuura Bakıda keçirilən üçüncü Ümumdünya Mədəniyyətlərarası Dialoq Forumunun əhəmiyyətini vurğulayıb, bu tədbirin sivilizasiyalararası dialoqun möhkəmləndirilməsi işinə töhfələr verəcəyinə əminliyini bildirib. O deyib ki, mədəniyyət təkcə musiqi, incəsənətlə bağlı deyil. Bu məfhum özlüyündə çox böyük məna daşıyır. Bakı forumu mədəniyyətin qloballığını bir daha insanlara çatdırır.
Simon Viezental Mərkəzinin dekan müavini Ravvin Abraham Kuper müasir dünyada internetin gənclərin həyatında yarada biləcəyi bir sıra təhlükəli məsələlərdən söz açıb. O, gəncləri vebsaytlarda yayımlanan neqativ çağırışlardan kənar durmağa səsləyib.
TÜRKSOY-un baş katibi Düsen Kaseinov Azərbaycanın ev sahibliyi ilə son illər möhtəşəm tədbirlərin keçirilməsini yüksək dəyərləndirərək yaxın vaxtlarda Bakıda keçiriləcək birinci Avropa Oyunlarının əhəmiyyətini vurğulayıb, bu möhtəşəm tədbirin Avropanın idman tarixində mühüm yer tutacağını deyib.
Düsen Kaseinov TÜRKSOY-un fəaliyyətindən, gördüyü işlərdən və gələcək planlarından söz açıb.
Seminarda Simon Viezental Mərkəzinin dinlərarası məsələlər üzrə beynəlxalq məsləhətçisi Anet Blum, İstanbul 29 May Universitetinin kafedra müdiri Tahsin Görgün, Anne Frank Evində müəllim yetişdirmə və kurikulum inkişafı üzrə beynəlxalq direktor Bari van Driel və Küveyt Xarici İşlər Nazirliyinin idarə rəisi Naser Alhayen çıxış edərək öz fikirlərini bölüşüblər.

Paylaş:

Baxılıb: 611 dəfə