Azərbaycan və Belçika xarici işlər nazirlərinin görüşündə bir sıra önəmli məsələlər müzakirə olunub

Bakı:

25 °C

50 %

1 m/s

AZ RU EN

Ana səhifə / Siyasət / Azərbaycan və Belçika xarici işlər nazirlərinin görüşündə bir sıra önəmli məsələlər müzakirə olunub

Azərbaycan və Belçika xarici işlər nazirlərinin görüşündə bir sıra önəmli məsələlər müzakirə olunub

29.04.2015 [10:19]

Aprelin 28-də Azərbaycanın xarici işlər naziri Elmar Məmmədyarov ölkəmizdə səfərdə olan Avropa Şurası Nazirlər Komitəsinin sədri, Belçika Baş nazirinin müavini, xarici işlər, xarici ticarət və inkişafa yardım naziri Didier Reinderslə görüşüb.
AZƏRTAC xəbər verir ki, görüşdə iki ölkə arasında siyasi dialoqun inkişafından məmnunluq ifadə edilib və yüksək səviyyəli qarşılıqlı səfərlərin əməkdaşlığın inkişafına töhfə verdiyi qeyd olunub. Azərbaycan və Belçika arasında iqtisadi əməkdaşlığın inkişaf etdirilməsi üçün mövcud olan geniş imkanlar, ölkəmizin regiondakı beynəlxalq layihələrin həyata keçirilməsində aparıcı rolu və Avropanın etibarlı tərəfdaşı olması, Dağlıq Qarabağ münaqişəsinin həlli yolları, regional, beynəlxalq məsələlər barədə fikir mübadiləsi aparılıb.
Görüşdən sonra birgə mətbuat konfransı keçirilib.
Elmar Məmmədyarov deyib ki, o, həmkarını Ermənistan-Azərbaycan, Dağlıq Qarabağ münaqişəsi ilə bağlı Azərbaycanın mövqeyi və problemin həllinə dair danışıqların son vəziyyəti barədə məlumatlandırıb. Nazir 30 aprel-1 may tarixlərində həmsədrlərlə görüşmək məqsədilə Parisə səfər etməyi planlaşdırdığını diqqətə çatdıraraq deyib: “İnanırıq ki, münaqişə ilə bağlı irəliləyişə nail olunmasının zamanı çatıb”.
İkitərəfli əlaqələrdən danışan nazir bildirib ki, hazırda Belçikanı təmsil edən 60-dan çox şirkətin Azərbaycanda olması böyük önəm kəsb edir və bu şirkətlərin bəziləri ölkəmizdə fəaliyyət göstərir. Bundan əlavə, müxtəlif sahələrdə, ilk növbədə enerji sahəsində Belçika şirkətləri bizimlə əməkdaşlıqda çox maraqlıdır. Diqqətə çatdırılıb ki, görüşdə Şərq Tərəfdaşlığı üzrə Riqa Sammiti çərçivəsində danışıqlar barədə də müzakirələr aparılıb.
Humanitar sahədə əməkdaşlıqdan danışan E.Məmmədyarov hər iki ölkədə müxtəlif mədəniyyət tədbirlərinin keçirildiyini diqqətə çatdırıb. O, Belçikanı təmsil edən 160 idmançının Azərbaycanda keçiriləcək birinci Avropa Oyunlarında iştirak edəcəyini bildirib.
Ermənistan-Azərbaycan, Dağlıq Qarabağ münaqişəsinin həllinin zəruriliyini vurğulayan Didier Reinders cəbhə xəttindəki insidentlərdən narahat olduğunu bildirib. O deyib: “Biz danışıqlarda irəliləyişin əldə edilməsindən çox şad olardıq”.
Bu gün Azərbaycanın qaçqın və məcbur köçkün problemi ilə üzləşdiyini deyən Didier Reinders ölkəmizə səfəri çərçivəsində məcburi köçkünlərin məskunlaşdıqları yerlərə baş çəkdiyini və onların yaşayış şəraiti ilə tanış olduğunu diqqətə çatdırıb. O qeyd edib ki, problemlə daha yaxından tanış olmaq üçün məcburi köçkünlərin yaşadıqları yerlərə getmək çox önəmlidir. D.Reinders deyib: “Avropa qitəsində bir az qaçqın problemi yaşanan kimi biz böyük müzakirələrə başlayırıq, ancaq Azərbaycandakı bir milyonluq qaçqın və məcburi köçkün problemini görəndə mən vəziyyətin tam fərqli olduğunu başa düşdüm”.

Paylaş:

Baxılıb: 575 dəfə