YAP Nərimanov rayon təşkilatında Xocalı soyqırımının 23-cü ildönümü ilə bağlı “dəyirmi masa” keçirilib

Bakı:

20 °C

68 %

7 m/s

AZ RU EN

Ana səhifə / Siyasət / YAP Nərimanov rayon təşkilatında Xocalı soyqırımının 23-cü ildönümü ilə bağlı “dəyirmi masa” keçirilib

YAP Nərimanov rayon təşkilatında Xocalı soyqırımının 23-cü ildönümü ilə bağlı “dəyirmi masa” keçirilib

24.02.2015 [11:17]

Dünən Yeni Azərbaycan Partiyası (YAP) Nərimanov rayon təşkilatında Xocalı soyqırımının 23-cü ildönümü ilə bağlı “dəyirmi masa” keçirilib. Tədbir iştirakçıları əvvəlcə Xocalı faciəsini əks etdirən fotosərgi ilə tanış olublar.
Tədbiri giriş sözü ilə açan YAP Nərimanov rayon təşkilatının sədri Təmraz Tağıyev Xocalı faciəsinin xalqımıza qarşı törədilən ən qanlı hadisələrdən biri olduğunu bildirib. T.Tağıyev Xocalı faciəsinin beynəlxalq müstəvidə bir soyqırımı kimi tanıdılması istiqamətində atılan addımlardan söz açaraq Prezident İlham Əliyevin məqsədyönlü siyasəti nəticəsində bu qətliamın dünyanın bir sıra ölkələri, o cümlədən, Meksika, Kolumbiya, Pakistan, həmçinin, Avropada ilk olaraq Çex Respublikası, ABŞ-ın bir neçə ştatı tərəfindən soyqırımı və ya insanlığa qarşı cinayət kimi tanındığını qeyd edib.
Xocalı soyqırımının Azərbaycan tarixinə ən dəhşətli və faciəli səhifələrdən biri kimi daxil olduğunu deyən T.Tağıyev Ermənistan tərəfindən ölkəmizə qarşı yürüdülən işğalçılıq və etnik təmizləmə siyasəti, onun ağır nəticələri, 1992-ci il fevralın 25-dən 26-na keçən gecə Xocalıda baş verən hadisələr barədə məlumat verib, soyqırımı zamanı törədilmiş vəhşiliklərin insanlığa sığmayan hərəkət olduğunu vurğulayıb.
Çıxış edən Nərimanov rayon Gənclər və İdman İdarəsinin rəisi Nəcəf Novruzov 23 il əvvəl baş vermiş bu qətliamla bağlı fikirlərini bildirib. O, vurğulayıb ki, yalnız Ümummilli lider Heydər Əliyev siyasi hakimiyyətə yenidən qayıdandan sonra Xocalı faciəsinə siyasi qiymət verilib, bu qətliam azərbaycanlıların soyqırımı kimi tanınıb, faciə qurbanlarının ailə üzvlərinə dövlət qayğısı göstərilib. Qeyd olunub ki, bu siyasət Ulu öndər Heydər Əliyevin layiqli davamçısı, Azərbaycan Prezidenti İlham Əliyev tərəfindən uğurla davam etdirilir.
Tədbirdə YAP Nərimanov rayon təşkilatı Gənclər Birliyinin sədri Yusif Babanlı çıxış edərək qanlı hadisə zamanı dinc insanlara qarşı törədilən amansızlıqlar barədə danışıb. O, Xocalı faciəsinin erməni daşnaklarının son iki əsrdə Azərbaycan xalqına qarşı törətdiyi kütləvi qətliamın davamı mahiyyətində olduğunu qeyd edib.
“Dəyirmi masa”da, həmçinin, fəal gənclərdən Turizm və Menecmentlik Universiteti Tələbə Gənclər Təşkilatının sədri Ağamir Ağamirov, Kooperasiya Universiteti Tələbə Gənclər Təşkilatının sədri Tamerlan Əkbərov, YAP Nərimanov rayon təşkilatının təlimatçısı Nərminə Yunusova və digərləri çıxış edərək Xocalı faciəsi ilə bağlı həqiqətlərin dünya ictimaiyyətinə çatdırılmasında, erməni vəhşiliklərini əks etdirən materialların beynəlxalq təşkilatlar qarşısında nümayiş etdirilməsində, bu soyqırımın dünya ölkələri tərəfindən tanınmasında Heydər Əliyev Fondunun xidmətlərini, Fondun vitse-prezidenti Leyla Əliyevanın təşəbbüsü ilə keçirilən “Xocalıya ədalət!” kampaniyasını xüsusi qeyd ediblər.
N.BAYRAMLI

Paylaş:

Baxılıb: 612 dəfə