“İşğal altında qalmış abidələrimiz - tarixi yaddaşın izi ilə” mövzusunda konfrans keçirilib

Bakı:

26 °C

59 %

3 m/s

Əlaqə

AZ RU EN

Ana səhifə / Siyasət / “İşğal altında qalmış abidələrimiz - tarixi yaddaşın izi ilə” mövzusunda konfrans keçirilib

“İşğal altında qalmış abidələrimiz - tarixi yaddaşın izi ilə” mövzusunda konfrans keçirilib

19.02.2015 [12:40]

Fevralın 18-də Bakıda Azərbaycan Milli Elmlər Akademiyasının (AMEA) İnsan Hüquqları İnstitutu və Dini Qurumlarla İş Üzrə Dövlət Komitəsinin (DQİDK) birgə təşkilatçılığı ilə “İşğal altında qalmış abidələrimiz - tarixi yaddaşın izi ilə” mövzusunda konfrans keçirilib.
AzərTAc xəbər verir ki, tədbirdə Milli Məclisin deputatları, dini qurumların nümayəndələri, alimlər, ictimai xadimlər, KİV-lərin təmsilçiləri iştirak ediblər.
Tədbirin bəşəriyyətin ən dəhşətli faciələrindən olan Xocalı soyqırımının 23-cü ildönümü ərəfəsində keçirildiyini diqqətə çatdıran DQİDK-nin sədri Mübariz Qurbanlı bildirib ki, işğal altında qalan abidələrimiz yalnız Dağlıq Qarabağda deyil, eyni zamanda, tarixi Azərbaycan ərazisində, Qərbi Azərbaycan torpaqlarındadır. Mədəniyyətimizlə, dinimizlə bağlı olan müxtəlif xarakterli nümunələr - məscidlər, mədəniyyət evləri, kitabxanalar, ziyarətgahlar erməni vandalları tərəfindən dağıdılıb, özününküləşdirilib. Qarabağ ərazisində dağıdılmış abidələrimizlə bağlı hazırda Azərbaycanda çox böyük işlər görülür. Konfransın təşkili də bu işlərin tərkib hissəsidir. Belə tədbirləri dünyada, xarici ölkələrdə keçirməli, həqiqətləri yaymalıyıq. Bu yolla biz ermənilərin törətdikləri vəhşilikləri bir daha dünyaya çatdıra bilirik.
İnsan Hüquqları İnstitutunun direktoru, Milli Məclisin deputatı Aytən Mustafayeva bildirib ki, konfransın keçirilməsinin əsas məqsədi Ermənistanın işğal etdiyi tarixi Azərbaycan torpaqlarında dağıdılmış, eyni zamanda, ermənilərin özününküləşdirməyə cəhd göstərdikləri dini abidələrimizlə bağlı elmi müzakirə və diskussiyaların aparılması, bu barədə ictimaiyyətin məlumatlandırılmasıdır.
A.Mustafayeva qeyd edib ki, Azərbaycanın işğal altında olan ərazilərində tarixi, dini abidələrimizi, maddi-mədəni irsimizi, işğal nəticəsində ölkəmizə dəyən iqtisadi zərəri araşdırıb ortaya qoymalı və bunların hesabını işğalçılardan tələb etməliyik. Məqsədimiz beynəlxalq məhkəmələrə müraciət etmək üçün əsaslar hazırlamaqdır. İşğal altında qalan dini abidələrimiz təkcə məscidlər deyil, orada alban, pravoslav kilsələri də var. Ermənilər hansı xalqa mənsub olmasına fərq qoymadan bütün tarixi abidələri dağıdır, məhv edirlər. Azərbaycanın qədim İrəvan xanlığı ərazisində də belə abidələr var idi və onların şəkilləri bizim əlimizdədir. Biz bu abidələrlə də bağlı araşdırmalar aparacaq, məlumatlar yayacağıq.
Tolerantlığın, multikulturalizmin xalqımız üçün həyat tərzi olduğunu bildirən A.Mustafayeva deyib ki, ölkəmizdə bu istiqamətində mühüm işlər görülür, Azərbaycan bu cəhətdən bütün dünyaya nümunədir.
Konfransda DQİDK-nin əməkdaşı Əliheydər Zülfüqarovun “Erməni təcavüzü və dini abidələrimiz”, “Azərbaycanın İşğal Olunmuş Ərazilərindəki Tarix və Mədəniyyət Abidələrini Mühafizə Təşkilatı” İctimai Birliyinin sədri Faiq İsmayılovun “Dağlıq Qarabağda monumental incəsənət və din abidələrinin ermənilər tərəfindən dağıdılmasının tarixi səbəbləri” mövzularında məruzələri dinlənilib. Bildirilib ki, işğal olunmuş ərazilərdə dövlət qeydiyyatında olan tarix və mədəniyyət abidələrinin sayı 900-dən çoxdur. Bunlardan 347-si tarixi dini abidələrdir. Bu abidələrin 67-si məscid, 140-ı məbəd, 140-ı ziyarətgahdır.
Daha sonra mövzu ətrafında geniş müzakirələr aparılıb.
AMEA-nın vitse-prezidenti, Milli Məclisin deputatı, akademik İsa Həbibbəyli çıxış edərək bildirib ki, Qarabağ reallıqlarının dünya ictimaiyyətinə çatdırılması üçün dövlət səviyyəsində ardıcıl və məqsədyönlü iş aparılır. Bu sahədə dövlət qurumları ilə elm müəssisələrinin əməkdaşlığı böyük əhəmiyyət kəsb edir. İnanırıq ki, hər iki qurumun birgə fəaliyyəti Azərbaycan həqiqətlərinin dünyaya çatdırılması işinə mühüm töhfələr verəcəkdir.
Bakı Dağ Yəhudiləri Dini İcmasının sədri Milix Yevdayev və digər çıxış edənlər konfransın aktual mövzuya həsr olunduğunu, erməni saxtakarlığının ifşa edilməsində belə tədbirlərin əhəmiyyətini vurğulayıblar.
Tədbirdə AMEA-nın İnsan Hüquqları İnstitutu ilə Dini Qurumlarla İş Üzrə Dövlət Komitəsi arasında əməkdaşlıq haqqında memorandum imzalanıb.
Sənədi A.Mustafayeva və M.Qurbanlı imzalayıblar.
Memorandumda Azərbaycan həqiqətlərinin dünyaya çatdırılması istiqamətində birgə işin aparılması, konfransların mütəmadi təşkili nəzərdə tutulur.

Paylaş:

Baxılıb: 659 dəfə