Azərbaycan-İran əlaqələrinin dərin tarixi kökləri var

Bakı:

25 °C

68 %

9 m/s

Əlaqə

AZ RU EN

Ana səhifə / Siyasət / Azərbaycan-İran əlaqələrinin dərin tarixi kökləri var

Azərbaycan-İran əlaqələrinin dərin tarixi kökləri var

04.12.2014 [10:21]

Dini Qurumlarla İş üzrə Dövlət Komitəsinin sədri Mübariz Qurbanlı İranın İslam Mədəniyyəti və Əlaqələri Təşkilatının sədri Əbuzər İbrahimi Türkman ilə görüşüb.
Görüşdə ölkələrimizin din və mədəniyyət sahələrində əməkdaşlığının daha da genişləndirilməsi ilə bağlı məsələlər müzakirə edilib. M.Qurbanlı bildirib ki, Azərbaycan ilə İran arasında bütün sahələrdə olduğu kimi, din və mədəniyyət sahəsində də əlaqələr yüksək səviyyədə qurulub. Hər iki ölkə qədim tarixi mədəniyyətə malikdir. Ulu öndər Heydər Əliyev Azərbaycan-İran əlaqələrinə hər zaman böyük diqqət yetirib. Prezident İlham Əliyev də bu siyasəti ardıcıl davam etdirir.
Azərbaycan ilə İran arasında beynəlxalq müstəvidə əməkdaşlıqdan danışılarkən Komitə sədri qeyd edib ki, istər İslam Əməkdaşlıq Təşkilatı və Birləşmiş Millətlər Təşkilatı, istərsə də digər beynəlxalq qurumlarda qarşılıqlı münasibətlər yüksək səviyyədədir.
Görüşdə M.Qurbanlı Ermənistan-Azərbaycan, Dağlıq Qarabağ münaqişəsindən bəhs edərək bildirib ki, Azərbaycan torpaqlarının 20 faizi işğal olunub. İslam dininə aid olan bütün tarixi abidələr, o cümlədən məscidlər, ziyarətgahlar ermənilər tərəfindən dağıdılıb.
Azərbaycandakı dini durum haqqında məlumat verən Dövlət Komitəsinin sədri bildirib ki, ölkənin əhalisinin 96 faizi müsəlmanlardır və hazırda burada iki mindən çox məscid var. İslami dəyərlər dövlətin təminatı altındadır. Din dövlətdən ayrı olsa da, dövlətimiz daim dinə, dini ibadət yerlərinə - məscidlərə, ziyarətgahlara xüsusi diqqət yetirir. Yeni məscidlər tikilir, bərpa və təmir olunur. M.Qurbanlı deyib: “Biz bütövlükdə İslamda radikalizmin əleyhinəyik və ölkəmizdə radikal meyillərin yayılmasının qarşısının alınması üçün bütün tədbirlər görülür”.
Əbuzər İbrahimi Türkman deyib ki, iki qardaş ölkə arasında əlaqələrin dərin tarixi kökləri var. Bu vəzifədə ilk xarici səfərini Azərbaycana etdiyini bildirən qonaq səfərin İranla Azərbaycan arasında din və mədəniyyət sahəsində əlaqələrin daha da genişlənməsinə təkan verəcəyini vurğulayıb. “İslam mərhəmət dinidir”,- deyən Ə.İ.Türkman din və mədəniyyət üzərində qurulan əlaqələrin daha da genişlənməsinin vacibliyindən danışaraq qeyd edib ki, bu əməkdaşlıq gələcəkdə də davam etdiriləcək. Vurğulanıb ki, İran Prezidenti Həsən Ruhaninin Azərbaycana səfəri iki ölkə arasındakı münasibətləri yeni müstəviyə keçirib. Ə.İ.Türkman M.Qurbanlını İrana səfərə dəvət edib.
Qeyd edək ki, İslam Mədəniyyəti və Əlaqələri Təşkilatının sədri Azərbaycana Dini Qurumlarla İş üzrə Dövlət Komitəsinin dəvəti ilə gəlib.

Paylaş:

Baxılıb: 664 dəfə