Naxçıvanda İran İslam İnqilabının 35-ci ildönümü münasibətilə tədbir keçirilib

Bakı:

25 °C

66 %

8 m/s

Əlaqə

AZ RU EN

Ana səhifə / Siyasət / Naxçıvanda İran İslam İnqilabının 35-ci ildönümü münasibətilə tədbir keçirilib

Naxçıvanda İran İslam İnqilabının 35-ci ildönümü münasibətilə tədbir keçirilib

13.02.2014 [09:21]

İran İslam Respublikasının Naxçıvandakı baş konsulluğu ölkəsinin milli bayramı - İslam İnqilabı Günü münasibətilə rəsmi qəbul təşkil edib.
Naxçıvan Muxtar Respublikası Ali Məclisinin sədri Vasif Talıbov rəsmi qəbulda iştirak edib.
Naxçıvan Muxtar Respublikası Ali Məclisinin mətbuat xidmətindən AzərTAc-a bildirilib ki, İran İslam Respublikasının və Azərbaycan Respublikasının dövlət himnləri səsləndirildikdən sonra Qurani-Kərimdən ayələr oxunub.
İran İslam Respublikasının Naxçıvandakı baş konsulu Məhəmmədtağı Məhəmmədəli tədbirdə çıxış edərək deyib ki, 1979-cu ildə İran xalqı öz azadlığı və istiqlaliyyəti uğrunda mübarizəyə qalxaraq qələbə qazanıb. İnqilabdan sonra İran İslam Respublikası inkişaf edərək bugünkü səviyyəyə gəlib çatıb. Bu gün İran İslam Respublikası xarici siyasət kursunda qonşular, region və İslam dünyası ilə əlaqələrin genişləndirilməsinə üstünlük verir. Dost və qonşu ölkələr olan İran ilə Azərbaycan arasındakı əlaqələr yüksələn xətlə inkişaf edir. Qarşılıqlı səfərlər zamanı imzalanan sənədlər, əldə olunan razılıqlar siyasi, iqtisadi və mədəni sahələrdə əlaqələrin dərinləşməsi üçün yeni imkanlar açıb. Naxçıvan Muxtar Respublikası ilə İranın yaxın vilayətləri arasındakı əməkdaşlıq ölkələrimizin əlaqələrinin daha da dərinləşməsinə və inkişafına xidmət edir.
Naxçıvan Muxtar Respublikası Ali Məclisinin sədri Vasif Talıbov İslam inqilabının 35-ci ildönümü münasibəti ilə dost və qardaş İran xalqını təbrik edib, İran İslam Respublikasına inkişaf və tərəqqi arzulayaraq deyib: “Azərbaycan ilə İran arasındakı münasibətlər dərin köklərə malikdir. Ümummilli liderimiz Heydər Əliyevin 1992-ci ildə Naxçıvan Muxtar Respublikasının rəhbəri kimi İran İslam Respublikasına səfərindən sonra müxtəlif sahələrdə əlaqələrin əsası qoyulmuş, dahi rəhbərin ölkəmizə rəhbərliyi dövründə siyasi və iqtisadi münasibətlər yeni mərhələyə yüksəlmişdir. Bu gün qarşılıqlı əməkdaşlıq xalqlarımızın mənafeyinə və maraqlarına uyğun şəkildə davam etdirilir”.
Qeyd olunub ki, Azərbaycanın Naxçıvan Muxtar Respublikası ilə İranın Şərqi və Qərbi Azərbaycan vilayətləri arasında da uğurlu əməkdaşlıq mövcuddur. Bu əməkdaşlıq qarşılıqlı səfərlər zamanı daha da möhkəmləndirilib, energetika, kənd təsərrüfatı, təhsil, səhiyyə, mədəniyyət, turizm və idman sahələrində əlaqələrin inkişafı üçün hərtərəfli zəmin yaradılıb.
Ali Məclisin sədri əlaqələrimizin inkişafında İran İslam Respublikasının Naxçıvandakı baş konsulluğunun da mühüm xidmətləri olduğunu diqqətə çatdırıb, bütün bunlara görə baş konsula və konsulluğun əməkdaşlarına təşəkkürünü bildirib, bir daha İran xalqını İnqilab günü münasibətilə təbrik edib.

Paylaş:

Baxılıb: 1029 dəfə