Vatikan Dövlətinin mədəniyyət üzrə pontifik şurasının prezidenti kardinal Canfranko Ravazi Şəkidə olub

Bakı:

26 °C

50 %

1 m/s

AZ RU EN

Ana səhifə / Siyasət / Vatikan Dövlətinin mədəniyyət üzrə pontifik şurasının prezidenti kardinal Canfranko Ravazi Şəkidə olub

Vatikan Dövlətinin mədəniyyət üzrə pontifik şurasının prezidenti kardinal Canfranko Ravazi Şəkidə olub

06.11.2013 [09:47]

Vatikan Dövlətinin mədəniyyət üzrə pontifik şurasının prezidenti kardinal Canfranko Ravazinin başçılıq etdiyi nümayəndə heyəti Azərbaycana səfəri çərçivəsində noyabrın 5-də Şəkidə olub.
AzərTAc xəbər verir ki, Vatikan nümayəndə heyətinin bu qədim diyarla tanışlığı XVIII əsrə aid dünya əhəmiyyətli nadir tarixi-memarlıq abidəsi Şəki xanlarının sarayından başlayıb.
Sarayın qarşısında kardinal Canfranko Ravazi və nümayəndə heyətinin üzvləri şəhər rəhbərliyi tərəfindən səmimiyyətlə qarşılanıb.
Vatikanlı qonaqların diqqətinə çatdırılıb ki, qədim dövlətçilik ənənələrinə, yüksək mədəniyyətə malik olan Şəki şəhəri, eyni zamanda, sənətin, sənətkarlığın yüksək səviyyədə inkişaf etdiyi ərazilərdən biri olub. Şəki sənətkarlarının fədakar əməyi sayəsində bu qədim şəhərdə zəngin tarixi-mədəni irs yaranıb. Məlumat verilib ki, Şəki, həm də dünya əhəmiyyətli tarixi-memarlıq abidələri ilə məşhurdur. Şərq memarlığının nadir incilərindən hesab olunan Şəki xanlarının sarayı 1761-1762-ci illərdə tikilib. İkimərtəbəli, 6 otaq, 4 dəhliz və 2 güzgülü eyvandan ibarət olan sarayın tikintisində mismar və yapışqandan istifadə olunmayıb. Sarayın divar rəsmləri əsasən həndəsi və nəbati naxışlardan ibarətdir. İkinci mərtəbədəki otaqların tavan və divarlarını bəzəyən döyüş və ov səhnələri xüsusilə böyük maraq doğurur. Yüksək sənətkarlıqla hazırlanmış şəbəkənin hər kvadratmetri bir-birinə geydirilən 5 min xırda hissədən ibarətdir.
Sarayın həyətindəki yaşı beş yüzə çatan qoşa Xan çinarları qonaqlarda böyük maraq doğurub. Diqqətə çatdırılıb ki, ötən il Şəki xanları sarayının 250 illik yubileyi böyük təntənələrlə qeyd olunub.
Qonaqlar sarayın eyvanından Şəkinin qədim məhəllələrini seyr edib, sarayın önündə xatirə şəkilləri çəkdiriblər.
Şəkiyə səfərləri çərçivəsində vatikanlı qonaqlar Kiş kəndində yerləşən qədim alban məbədini də ziyarət ediblər. Qonaqların diqqətinə çatdırılıb ki, məbəd eramızın birinci əsrində Qafqaz Albaniyasında geniş yayılan Ay məbədinin özülü üzərində inşa edilib. Əhəng daşından tikilən bu abidə erkən orta əsrlərdə yaranan ilk günbəzli, zal tipli məbəddir. Məbəd dövlət tərəfindən tarixi-memarlıq abidəsi kimi qorunur.
Məbədin içərisindəki Yaloylutəpə mədəniyyətinə aid nümunələr, orta tunc-antik dövrünə aid saxsı qablar, Qafqaz Albaniyasının tarixi xəritəsi və digər eksponatlar, habelə məbədin həyətindəki ilkin orta əsrlərə aid sərdabələr qonaqların böyük marağına səbəb olub.
Kardinal Canfranko Ravazi və nümayəndə heyətinin üzvləri məbədin həyətində Şəki şirniyyatları ilə bəzədilmiş çay süfrəsinə qonaq olub, yerli kamera ansamblının ifasını dinləyiblər.
Şəhər icra hakimiyyətinin başçısı Elxan Usubov kardinala Şəki ilə bağlı xatirə hədiyyələri - ipək xalça, ipək məmulatları, albom və buklet hədiyyə edib.
Vatikan Dövlətinin mədəniyyət üzrə pontifik şurasının prezidenti kardinal Canfranko Ravazi və nümayəndə heyətinin üzvləri Şəkidən xoş və zəngin təəssüratlarla ayrılıblar.

Paylaş:

Baxılıb: 1176 dəfə