Mədəniyyət Diplomatiyası üzrə İnstitutun Vaşinqton konfransında Azərbaycan haqqında danışılıb

Bakı:

26 °C

50 %

1 m/s

Əlaqə

AZ RU EN

Ana səhifə / Siyasət / Mədəniyyət Diplomatiyası üzrə İnstitutun Vaşinqton konfransında Azərbaycan haqqında danışılıb

Mədəniyyət Diplomatiyası üzrə İnstitutun Vaşinqton konfransında Azərbaycan haqqında danışılıb

06.11.2013 [09:34]

Azərbaycanın ABŞ-dakı səfiri Elin Süleymanov noyabrın 4-də Mədəniyyət Diplomatiyası üzrə İnstitutun Vaşinqton konfransında çıxış edib.
Qərargahı Almaniyanın Berlin şəhərində yerləşən Mədəniyyət Diplomatiyası üzrə İnstitutun bu konfransı “Qitələr arasında əməkdaşlıq üzrə zirvə görüşü” adı altında noyabrın 4-də öz işinə başlayıb və 3 gün davam edəcək.
E.Süleymanovun məruzəsi “BMT Təhlükəsizlik Şurası və beynəlxalq hüquq” mövzusuna həsr olunub. O, Azərbaycanın hazırda BMT Təhlükəsizlik Şurasının 10 qeyri-daimi üzvündən biri olduğunu xatırladıb, cəmi 22 il müstəqillik tarixinə malik ölkəmizin ilk dəfə, Cənubi Qafqaz və Mərkəzi Asiya dövlətləri arasında birinci olaraq dünyanın ən mötəbər beynəlxalq qurumuna seçilməsinin respublikamız üçün çox əlamətdar hadisə olduğunu bildirib. Səfir bu uğurun Azərbaycanın qısa müddətdə əldə etdiyi nailiyyətlərin göstəricisi olduğunu və Təhlükəsizlik Şurasının üzvü kimi ölkəmizin dünyada sülhün və təhlükəsizliyin təmin edilməsinə töhfə vermək üçün səylərini əsirgəmədiyini söyləyib.
Diplomat BMT Təhlükəsizlik Şurasının strukturu, fəaliyyət prinsipləri, vəzifələri və məqsədlərindən danışıb, təşkilatın qəbul etdiyi qərarların yaratdığı beynəlxalq hüquq öhdəlikləri və onların icra mexanizmləri barədə tədbir iştirakçılarına məlumat verib.
Təhlükəsizlik Şurasının qərarlarının icrası kontekstində E.Süleymanov Ermənistan-Azərbaycan, Dağlıq Qarabağ münaqişəsi ilə bağlı qurumun hələ 1993-cü ildə dörd qətnamə qəbul etdiyini xatırladıb, 20 il keçməsinə baxmayaraq, Ermənistanın bu qətnamələri yerinə yetirməkdən imtina etdiyini, beynəlxalq ictimaiyyətin isə bu məsələyə lazımı münasibət bildirmədiyini vurğulayıb.
Səfir Mədəniyyət Diplomatiyası üzrə İnstitutun fəaliyyətini təqdir edib, Azərbaycanın dinlər və mədəniyyətlər arasında dialoqun təşviqinə verdiyi önəmi vurğulayıb. Üçüncü Bakı Beynəlxalq Humanitar Forumundan danışan diplomat Azərbaycan Prezidenti İlham Əliyevin tədbirin açılışında söylədiyi nitqdən sitatlar gətirib, dövlətimizin başçısının dünyada əməkdaşlığı, sivilizasiyalararası dialoqu gücləndirmək sahəsində medianın roluna dair fikirlərini bölüşüb.
Konfrans iştirakçılarının suallarını cavablandıran E.Süleymanov Azərbaycanda müxtəlif etnik və dini qruplara mənsub insanların yaşadıqları qarşılıqlı anlaşma və hörmət mühitindən bəhs edib, bu baxımdan Azərbaycanın digər ölkələr üçün nümunə ola biləcəyini söyləyib. O, Azərbaycanın dövlət qurumları ilə yanaşı, Heydər Əliyev Fondunun da yerli və beynəlxalq səviyyədə mədəniyyətlərarası dialoqa verdiyi töhfələri diqqətə çatdırıb.

Paylaş:

Baxılıb: 2060 dəfə