Teatrlarımız yeni mövsümü açıb

Bakı:

26 °C

50 %

2 m/s

Əlaqə

AZ RU EN

Ana səhifə / Mədəniyyət / Teatrlarımız yeni mövsümü açıb

Teatrlarımız yeni mövsümü açıb

26.09.2017 [10:25]

Akademik Milli Dram Teatrı və Gənc Tamaşaçılar Teatrı maraqlı repertuarlarla sevənlərinin görüşünə gəlib
Azərbaycan Dövlət Akademik Milli Dram Teatrı öz 145-ci mövsümünü ənənəvi olaraq “Qarabağnamə” tamaşası ilə açıb. Tamaşanın nümayişindən öncə çıxış edən Xalq artistləri Hacı İsmayılov və Ramiz Məlik mədəniyyət ocağının yeni mövsümə çox ciddi hazırlaşdığını deyiblər. Bildirilib ki, teatrın təmir olunmuş yeni səhnələri bu mövsümdən istifadəyə veriləcək. Belə ki, sənətçilər artıq sevimli tamaşaçılarının qarşısına təmir olunmuş yeni səhnələrdə çıxacaqlar.
Tamaşa Xalq yazıçısı, görkəmli dramaturq İlyas Əfəndiyevin “Hökmdar və qızı” əsəri əsasında hazırlanıb. Səhnə əsəri isə Xalq artisti, Azərbaycan teatrında xüsusi yaradıcılıq dəst-xətti ilə seçilən və uzun illər İlyas Əfəndiyevlə birlikdə işləyib, onun yaradıcılığına yaxından bələd olan rejissor Mərahim Fərzəlibəyova həvalə edilib.
Məlumat üçün bildirək ki, teatrın tarixinə silinməz sətirlərlə yazılmış “Qarabağnamə” tamaşası XVIII əsrdə Qarabağ xanlığının mərkəzi olan Şuşada baş vermiş tarixi hadisələrdən və Qarabağ hökmdarı İbrahim xanın ictimai-siyasi, ailə-məişət həyatından bəhs edir. Güclü milli ruh aşılayan səhnə əsərinin başlıca mövzusu isə xanlıqları birləşdirib vahid dövlət yaratmaqdır.
Sənətçilərin ifalarının rəngarəngliyi, səhnə və musiqi tərtibatı, gözoxşayan dekorasiya və aktyorların bir-birindən parlaq geyimləri gecəni unudulmaz edib.
Tamaşada, heç şübhəsiz, erməni fitnəkarlığının qurbanı olan İbrahim xan və şücaəti ilə ürəkləri riqqətə gətirən Cavad xan obrazları ön plana çıxmağı bacarıblar.
Tamaşaçılar tərəfindən çox maraq və çoşqu ilə qarşılanan sözügedən səhnə əsərində rolları Xalq artistləri Firəngiz Mütəllimova, Rafiq Əzimov, Hacı İsmayılov, Ramiz Məlik, Əməkdar artistlər Kazım Abdullayev, Elxan Quliyev, Əjdər Həmidov, Əli Nurzadə, Sabir Məmmədov, Məsmə Aslanqızı, Kazım Həsənquliyev və başqaları ifa ediblər.
Həmçinin ötən həftə Azərbaycan Dövlət Gənc Tamaşaçılar Teatrı (ADGTT) da özünün 90-cı yubiley mövsümünə start verib. Həmin gün teatrın səhnəsində Azərbaycanın görkəmli dramaturqu M.F.Axundzadənin “Hekayəti-Xırs-Quldurbasan” əsərinin eyniadlı tamaşası nümayiş olunub.
Tamaşanın nümayişindən əvvəl teatrın direktoru, Əməkdar artist, Kalmıkiya Respublikasının Əməkdar İncəsənət Xadimi Mübariz Həmidov, teatrın veteran aktyorları və ötən mövsümdə “Sima” mükafatına layiq görülmüş əməkdaşları mövsümün açılışı ilə əlaqədar tamaşaçıları təbrik ediblər. Direktor çıxışı zamanı diqqətə çatdırıb ki, bu il Azərbaycan Dövlət Gənc Tamaşaçılar Teatrı özünün 90 illik yubileyinə hazırlaşır. Bu gündən etibarən nümayiş olunan hər bir tamaşa həm də yubiley ərəfəsində tamaşaçılarımıza bir hədiyyədir.
Mövsümün açılışı ilə əlaqədar çıxış edən teatrın baş rejissoru, Azərbaycanın və Kalmıkiyanın Əməkdar İncəsənət Xadimi Bəhram Osmanov, Xalq artistləri Cənnət Səlimova, Yasin Qarayev tamaşaçıları teatrın səhnəsində nümayiş olunan bir-birindən maraqlı tamaşalara dəvət edərək yeni mövsümdə həm kollektivə, həm də tamaşaçılara uğurlar arzulayıblar.
Məlumat üçün bildirək ki, sözügedən komediyada Tarverdi və Pərzadın sevgi hekayəsi, Pərzadı dərin məhəbbətlə sevən və onun yolunda ölümə belə hazır olduğunu deyən Bayram və qazanc əldə etmək üçün min cür oyunlar quran Zalxa obrazları və onların düşdükləri komik vəziyyətlər tamaşaçıda xoş ovqat yaradıb və onların həftəsonunu maraqlı keçirmələrinə səbəb olub.
Sonda tamaşaçılarla dolu olan zal uzun müddət ayaq üstə aktyorları alqışlayıb.
Müşfiqə BAYRAMLI

Paylaş:

Baxılıb: 1005 dəfə