Sahibkarlığın inkişafı üçün!

Bakı:

27 °C

49 %

3 m/s

Əlaqə

AZ RU EN

Ana səhifə / MEDİA / Sahibkarlığın inkişafı üçün!

Sahibkarlığın inkişafı üçün!

09.01.2025 [08:47]

Vergi güzəştləri tətbiq edilir...

İnkişaf etmiş ölkələrdə azad sahibkarlıq iqtisadi tərəqqinin əsas elementlərindən biri hesab olunur. Liberal iqtisadiyyat məhz azad sahibkarlıq və azad rəqabətin üzərində qurulur. Ölkəmizdə azad sahibkarlıq mühitinin təmin edilməsi yürüdülən iqtisadi siyasətin əsas istiqamətlərindən biridir. Bu sahədə dövlət tərəfindən ardıcıl olaraq müxtəlif stimullaşdırıcı və təşviqedici addımlar atılır. Bunun nəticəsidir ki, Azərbaycanın sürətli sosial-iqtisadi inkişafında son illərdə özəl sektorun, kiçik və orta sahibkarlığın payı artır.

Sahibkarların gəlirlərinin 75 faizi vergidən azad edilir

Məlum olduğu kimi, ölkə başçısı 27 dekabr 2024-cü il tarixində Milli Məclisin ötən il dekabrın 16-da qəbul etdiyi “Vergi Məcəlləsində dəyişiklik edilməsi haqqında” qanunu təsdiqləyib. Vergi inzibatçılığının təkmilləşdirilməsi məqsədilə Məcəllədə edilmiş dəyişikliklərdən biri bəzi xidmət sahələri üzrə mikro sahibkarların gəlirlərinin 75 faiz hissəsinə vergi güzəştinin tətbiqi ilə bağlıdır. Belə ki, Vergi Məcəlləsinə 2024-cü ildən qüvvəyə minmiş dəyişikliyə əsasən, müvafiq il üzrə orta aylıq muzdlu işçi sayı 3 nəfərdən az olmayan və məcburi dövlət sosial sığorta haqları üzrə borcu olmayan mikro sahibkar fiziki şəxslərin sahibkarlıq fəaliyyətindən gəlirinin 75 faizi gəlir vergisindən azad edilsə də, bu sahədə müəyyən uyğunsuzluqlar və sui-sitifadə hallarına yol verilməsi aşkarlanıb. Belə ki, aparılmış təhlillər nəticəsində bir sıra fiziki şəxslərin əhaliyə deyil, digər vergi ödəyicilərinə xidmət göstərdikləri, buna görə də sadələşdirilmiş verginin ödəyicisi olmadıqları müəyyənləşdirilib.

Məhz bu səbəbdən bəzi xidmət sahələri üzrə fəaliyyət göstərən və illik dövriyyəsinin həcmi xərclər nəzərə alınmadan 45 min manatadək olan mikro sahibkar fiziki şəxslərə münasibətdə gəlirlərinin 75 faizinin hər hansı şərt tətbiq edilmədən gəlir vergisindən azad olunması ilə bağlı Vergi Məcəlləsinə dəyişikliklər edilib. Qeyd olunan güzəştin tətbiqi nəticəsində real sahibkarlıq fəaliyyəti ilə məşğul olan mikro sahibkarların fəaliyyətinin dəstəklənməsi, eləcə də azgəlirli mikro sahibkarların vergi yükünün optimallaşdırılması nəzərdə tutulur.

6 KOB subyektinə “Startap” şəhadətnaməsi verilib

Sahibkarlığın təşviqində startapların fəaliyyəti də mühüm yer turur, dövlət bu subyektlərə də müxtəlif güzəştlər tətbiq edir. Kiçik və Orta Biznesin İnkişafı Agentliyi (KOBİA) tərəfindən daha 6 KOB subyektinə “Startap” şəhadətnaməsi verilib ki, bununla da “Startap” şəhadətnaməsi almış KOB subyektlərinin sayı 188-ə çatıb.

KOBİA-dan bildirilib ki, KOB subyektləri şəhadətnaməni aldıqları tarixdən etibarən innovasiya fəaliyyətindən əldə etdikləri gəlirlər üzrə mənfəət və gəlir vergisindən 3 il müddətinə azad edilir.

Sahibkarlara vergi təşviqləri veriləcək...

Azərbaycanda dövlət-özəl sektor tərəfdaşlığı çərçivəsində sahibkarlara vergi təşviqlərinin verilməsi də əsas dəstək mexanizmlərindəndir. İqtisadiyyat Nazirliyi yanında Dövlət Vergi Xidmətindən verilən məlumata görə, investisiya mühitinin və sahibkarlıq fəaliyyətinin təşviqi istiqamətində Vergi Məcəlləsinə edilmiş mühüm dəyişikliklərdən biri dövlət - özəl sektor tərəfdaşlığının və “yaşıl iqtisadiyyat”ın dəstəklənməsi məqsədilə bərpaolunan enerji mənbələrindən istifadə edilməklə elektrik enerjisi istehsalı layihələrinə vergi təşviqlərinin verilməsi ilə bağlıdır.

Bütövlükdə, dövlət - özəl sektor tərəfdaşlığı və elektrik enerjisi istehsalı layihələri çərçivəsində xidmətlərin göstərilməsi, eləcə də həmin xidmətlərlə bağlı zəruri infrastrukturun yaradılması və idarəedilməsi ilə əlaqədar layihələrin icrasına investisiyaların cəlb edilməsi məqsədilə vergi azadolmaları tətbiq olunur. Belə ki, dövlət - özəl sektor tərəfdaşlığı layihələri üzrə özəl tərəfdaşlara, bərpaolunan enerji mənbələrindən istifadə edilməklə elektrik enerjisi istehsalı layihələri üzrə isə istehsalçılara müvafiq müqavilələrdə müəyyənləşdirilmiş müddətdə, lakin 30 ildən çox olmayaraq mənfəət (gəlir), əmlak, torpaq, idxalda isə ƏDV üzrə güzəştlər verilir.

Qeyd olunan istiqamətlərdə vergi təşviqlərinin verilməsi ölkənin investisiya mühitinin bir qədər də təkmilləşdirilməsinə, iqtisadiyyatın ayrı-ayrı sahələrinə cəlb olunmuş özəl investisiyaların dəstəklənməsinə şərait yaradacaq. Bundan başqa, birbaşa xarici investisiyaların həcminin artırılmasına, o cümlədən dövlət - özəl sektor tərəfdaşlığının və dövlətin satınalma öhdəliyi ilə özəl sektor tərəfindən həyata keçirilən elektrik enerjisi istehsalı layihələrinin dəstəklənməsinə öz töhfəsini verəcək.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azad sahibkarlığın və liberal iqtisadiyyatın təşviqi” istiqaməti üzrə hazırlanmışdır.

Paylaş:

Baxılıb: 690 dəfə