Prezident İlham Əliyev “Yeni Azərbaycan” qəzetini 20 illik yubileyi münasibəti ilə təbrik edib

Bakı:

25 °C

66 %

8 m/s

Əlaqə

AZ RU EN

Ana səhifə / Gündəm / Prezident İlham Əliyev “Yeni Azərbaycan” qəzetini 20 illik yubileyi münasibəti ilə təbrik edib

Prezident İlham Əliyev “Yeni Azərbaycan” qəzetini 20 illik yubileyi münasibəti ilə təbrik edib

23.04.2013 [17:16]

“Yeni Azərbaycan” qəzetinin kollektivinə:
Əziz dostlar! Sizi “Yeni Azərbaycan” qəzetinin 20 illik yubileyi münasibətilə səmimi qəlbdən təbrik edirəm.
“Yeni Azərbaycan” qəzeti 1993-cü ilin aprelində - dövlətimiz üçün taleyüklü bir vaxtda Yeni Azərbaycan Partiyasının rəsmi orqanı kimi fəaliyyətə başlamışdır. Ermənistanın hərbi təcavüzü, ölkə daxilində dərinləşən iqtisadi, sosial və siyasi böhran, vətəndaş qarşıdurması təhlükəsi və s. kimi neqativ proseslər həmin dövrdə Azərbaycanın müstəqilliyini ciddi sınaqlarla üz-üzə qoymuşdur. Yalnız xalqımızın təkidli tələbi ilə, yenidən hakimiyyətə qayıdan Ümummilli lider Heydər Əliyevin böyük səyləri nəticəsində respublikanın suverenliyi və milli dövlətçiliyi xilas edilmiş, ölkə sabit və davamlı inkişaf yoluna çıxmışdır. Belə mürəkkəb şəraitdə “Yeni Azərbaycan” qəzeti həm Prezident Heydər Əliyevin ideyalarını, həm də hakim Yeni Azərbaycan Partiyasının siyasi xəttini ardıcıl şəkildə təbliğ etmiş, cəmiyyətin aktual problemlərini qətiyyətlə ictimai müzakirəyə çıxarmış, vətənpərvər ziyalıların, demokratik düşüncəli insanların dialoq platformasına çevrilmişdir. “Yeni Azərbaycan” qəzeti keçən 20 ildə daim öz prinsipial mövqeyinə sadiq qalmış, Azərbaycan dövlətinə, xalqımızın maraqlarına əzmkarlıqla xidmət etmiş, əsl vətənpərvərlik və təəssübkeşlik nümunəsi göstərmişdir.
Bu gün özünün sosial-iqtisadi tərəqqi dövrünü yaşayan Azərbaycanda müasirləşmə prossesi geniş vüsət almış, ölkəmiz beynəlxalq birliyin fəal üzvü kimi böyük nüfuz qazanmışdır. Qloballaşma dövrünün çağırışları və ölkəmizin müasir inkişaf tələbləri müstəqil dövlətçilik ideyalarının yorulmaz daşıyıcısı olan “Yeni Azərbaycan” qəzetinin qarşısında da mühüm vəzifələr qoyur. Hakim və ümumxalq partiyasının rəsmi orqanı kimi, “Yeni Azərbaycan” qəzeti respublikada demokratik cəmiyyət quruculuğuna, vətəndaş həmrəyliyinin güclənməsinə, siyasi mədəniyyətin inkişafına, milli mənəvi dəyərlərin təbliğinə öz sanballı töhfələrini verir.
Əminəm ki, qəzetin kollektivi qarşıda duran vəzifələrin öhdəsindən bundan sonra da layiqincə gələcək və xalqımızın müqəddəs amallarına, ölkəmizin hərtərəfli inkişafına şərəflə xidmət göstərəcək. Bu yolda bütün “yeni azərbaycançılara” uğurlar arzulayıram.
İlham Əliyev,
Azərbaycan Respublikasının Prezidenti.

Paylaş:

Baxılıb: 1238 dəfə