Makron istefanın bir addımlığında

Bakı:

25 °C

54 %

3 m/s

Əlaqə

AZ RU EN

Ana səhifə / Dünya / Makron istefanın bir addımlığında

Makron istefanın bir addımlığında

21.09.2024 [06:13]

İmpiçmentlə bağlı təşəbbüs petisiyasını 311 min insan imzalayıb

Emmanuel Makron Fransa tarixində mənfi tendensiyalı bir “ilk” yaşayacaq. Belə ki, prezident Makronun istefası ilə bağlı irəli sürülən impiçment prosedurunun məqbul olduğuna qərar verilib - qətnamə layihəsi 81 deputat tərəfindən imzalanıb.

Qeyd edək ki, Fransa V Respublika tarixində bu ilk dəfə baş verir - deputatlar prezidentin vəzifədən potensial kənarlaşdırılmasını müzakirə etməli olublar. Sentyabrın 17-də Milli Assambleyanın ali icraedici orqanı olan Bürosu “Əyilməz Fransa” (La France insoumise-LFİ) siyasi partiyasının Emmanuel Makronun istefası ilə bağlı irəli sürdüyü impiçment prosedurunun məqbul olduğuna qərar vermək üçün toplaşıb. Sosialist deputatlar bu təklifə baxılmasına qarşı çıxmayacaqlarını bildirsələr də, bunun əleyhinə səs verəcəkləri ilə bağlı xəbərdarlıq ediblər. Solçular hesab edirlər ki, E.Makron prezident səlahiyyətlərini aşıb, öz vəzifəsini yerinə yetirmir.

Milli Assambleyada (MA) “Əyilməz Fransa” partiyasının deputat fraksiyasının rəhbəri Matilda Pano bu təklifin Makronun güc işlədərək demokratiyaya qarşı etdiyi çevrilişinə cavab olduğunu bildirib. Əgər Milli Assambleyanın Bürosu icazə verərsə, E.Makronun mühakimə edilməsi üçün Ali Məhkəmənin çağırılmasının mümkünlüyü hüquq komitəsində, sonra isə Milli Assambleyanın sessiyasında müzakirə olunacaq.

Parlamentarilərin 2/3 dəstəkləyəcəyi halda...

Makronun apardığı “özbaşına” siyasi xətt onun başını bəlaya salıb - ortadakı impiçment məsələsinin kökü isə bir sıra səbəblərlə əlaqələndirilir. Təşəbbüsün səbəblərindən biri Makronun parlament seçkilərində qalib gələn Milli Xalq Cəbhəsi partiyasının namizədi Lüsi Casteti baş nazir postuna təyin etməməsi olub. “Le Parisien”in yazdığına görə, təşəbbüsü növbəti mərhələdə Qanunvericilik Komitəsi tərəfindən araşdırılacaq. Komitə təşəbbüsü dəstəkləyəcəyi halda bu, parlament gündəliyinə salınacaq - yalnız Assambleya və Senat (parlamentin aşağı və yuxarı palataları) üzvlərinin üçdə ikisinin səsisnin toplanacağı halda isə impiçment reallaşacaq. Prosesdə təşəbbüs üzvlərin üçdə ikisi, yəni 925 parlamentaridən 617-si tərəfindən dəstəklənməlidir və bir ay ərzində impiçment elan edilməlidir.

Makron pis vəziyyətdə...

Atılan ilkin addım isə çox şeydən xəbər verir - mövcud Respublika dövründə ilk dəfə prezidentə qarşı impiçment təşəbbüsünün qaldırılması Parisin yaşadığı siyasi böhranın açıq təzahürüdür. Təbii ki, səbəb yalnız ölkədaxili siyasi proseslər deyil - Fransanın Makron dövründə adının qeyri-demokratik, neokolonialist sıralarda hallanması, separatizmə verilən açıq dəstək, Aİ daxilində Fransanın nüfuzdan düşməsinin real görüntüləri bu istefa tələbini gündəmə gətirib.

Siyasi şərhçilərin fikrincə, Makron impiçmentlə bağlı növbəti mərhələnin reallaşmaması üçün parlamentdə çoxluğa malik fraksiyanı dağıtmağa çalışacaq - onun buna şansı böyükdür. Səbəb isə təşəbbüsü irəli s?rən solçu blokun vahid mövqeyə malik olmamasıdır. Bu vəziyyətdən isə prezident Makron yararlanacaq.

“Le Parisien” impiçmentlə bağlı sol partiyaların fikir ayrılığı ilə yanaşı, mərkəz və sağ partiyaların da məsələyə bitərəf qalacağını yazır “Fransa üçün bu, olduqca qeyri-adi vəziyyətdir, ona görə də solçuların bu təşəbbüsünün uğurla nəticələnməsinə ümid azdır. Bu, ölkəni pis vəziyyətdə qoya bilər”, - deyə ekspertlər bildiriblər.

Növbəti hədəf 400 mindir...

“Əyilməz Fransa” nın bu təşəbbüsü isə petisiya şəklində yüz minlərlə insan tərəfindən dəstəklənib. Petisiyanın yer aldığı internet saytının məlumatına görə, on? 311 min 458 nəfər imza atıb. “Növbəti hədəf 400 min imzadır”, - sayt qeyd edib.

Paralel olaraq media diqqəti” sağ mərkəzçi “Respublikaçılar”ın nümayəndəsi Mişel Barnyenin Fransanın baş naziri təyin edilməsinə qarşı sentyabrın 21-nə planlaşdırılan nümayişə çəkib. Əgər bu aksiya genişlənərsə, petisiyaya imza atan insanlar real olaraq təşəbbüslərinin arxasında durarlarsa, Yelisey sarayı daha bir ilkin - impiçmentlə prezidentin öz vəzifəsindən kənarlaşırılmasının da şahidi ola bilər.

S.İSMAYILZADƏ

Paylaş:

Baxılıb: 565 dəfə