Türk Dövlətləri Təşkilatında təhlükəsizlik sahəsində əməkdaşlığın gücləndirilməsi mühüm əhəmiyyət daşıyır

Bakı:

26 °C

53 %

5 m/s

AZ RU EN

Ana səhifə / Diaspor / Türk Dövlətləri Təşkilatında təhlükəsizlik sahəsində əməkdaşlığın gücləndirilməsi mühüm əhəmiyyət daşıyır

Türk Dövlətləri Təşkilatında təhlükəsizlik sahəsində əməkdaşlığın gücləndirilməsi mühüm əhəmiyyət daşıyır

22.09.2026 [14:24]

Nəzrin Əlizadə

YAP Nərimanov rayon təşkilatının məsləhətçisi

Türk Dövlətləri Təşkilatı (TDT) üzv və müşahidəçi ölkələr arasında çoxşaxəli əməkdaşlığın inkişaf etdirilməsi, ortaq maraqların təşviqi və beynəlxalq məsələlərdə qarşılıqlı fəaliyyətin gücləndirilməsi baxımından mühüm platformaya çevrilib. Təşkilatın fəaliyyətində siyasi, iqtisadi və humanitar istiqamətlərlə yanaşı, təhlükəsizlik sahəsində əməkdaşlıq da xüsusi yer tutur.

Azərbaycan Respublikasının Prezidenti İlham Əliyevin Türk Dövlətləri Təşkilatına üzv ölkələrin təhlükəsizlik üzrə rəhbər şəxsləri ilə görüşü bu baxımdan mühüm əhəmiyyət daşıyır. Görüşdə dövlətimizin başçısı TDT-nin beynəlxalq nüfuzunun artdığını və təşkilatın malik olduğu potensialdan daha səmərəli istifadə edilməsinin vacibliyini diqqətə çatdırıb.

Prezident İlham Əliyevin çıxışında əsas diqqət yetirilən məsələlərdən biri TDT-nin beynəlxalq arenadakı mövqeyinin daha da möhkəmləndirilməsidir. Dövlətimizin başçısı qeyd edib ki, təşkilat çərçivəsində keçirilən görüşlər beynəlxalq təhlükəsizlik, ticarət, nəqliyyat, enerji və digər mühüm məsələləri əhatə edir. Bu isə TDT-nin fəaliyyət dairəsinin geniş olduğunu və beynəlxalq gündəlikdə rolunun artdığını göstərir.

Müasir dövrdə təhlükəsizlik sahəsində yeni çağırışların meydana çıxması dövlətlər arasında əməkdaşlığın daha da gücləndirilməsini zəruri edir. Bu baxımdan TDT-yə üzv ölkələrin təhlükəsizlik qurumları arasında əlaqələrin genişləndirilməsi, məlumat və təcrübə mübadiləsinin aparılması mühüm əhəmiyyət daşıyır. Prezident İlham Əliyev xüsusilə operativ məlumat mübadiləsinin və mümkün təhdidlərin əvvəlcədən müəyyənləşdirilərək qarşısının alınmasının vacibliyini vurğulayıb.

TDT Təhlükəsizlik Şuraları katiblərinin görüşləri də bu istiqamətdə əməkdaşlığın inkişafına mühüm imkan yaradır. Belə görüşlər zamanı ümumi təhlükəsizlik məsələləri müzakirə edilir, mövcud çağırışlara qarşı birgə fəaliyyət və koordinasiya imkanları nəzərdən keçirilir.

Təşkilatın beynəlxalq mövqeyinin möhkəmləndirilməsində üzv dövlətlərin malik olduğu iqtisadi, enerji və nəqliyyat potensialı da mühüm rol oynayır. Türk dövlətlərini birləşdirən ortaq tarixi, mədəni və mənəvi dəyərlər isə qarşılıqlı etimad və həmrəyliyin daha da gücləndirilməsi üçün möhkəm zəmin yaradır.

Azərbaycan TDT çərçivəsində əməkdaşlığın inkişafına fəal töhfə verən dövlətlərdən biridir. Ölkəmizin təşəbbüsləri təşkilat daxilində siyasi dialoqun intensivləşdirilməsinə, qarşılıqlı əlaqələrin genişləndirilməsinə və TDT-nin beynəlxalq nüfuzunun artırılmasına xidmət edir. Prezident İlham Əliyevin çıxışında da təşkilatın mövcud imkanlarından maksimum istifadə etməsinin vacibliyi xüsusi qeyd olunub.

Prezident İlham Əliyevin Türk Dövlətləri Təşkilatına üzv ölkələrin təhlükəsizlik üzrə rəhbər şəxsləri ilə görüşdəki çıxışı TDT-nin qarşısında dayanan mühüm vəzifələri və geniş imkanları bir daha ortaya qoydu. Təhlükəsizlik sahəsində əməkdaşlığın gücləndirilməsi, məlumat və təcrübə mübadiləsinin genişləndirilməsi, mümkün təhdidlərin qarşısının alınması və təşkilatın beynəlxalq mövqeyinin möhkəmləndirilməsi əsas istiqamətlər kimi diqqətə çatdırıldı.

TDT ölkələri arasında qarşılıqlı etimad və həmrəyliyin daha da möhkəmləndirilməsi təşkilatın gələcək inkişafı üçün mühüm əsasdır. Mənim fikrimcə, təhlükəsizlik sahəsində əlaqələrin genişləndirilməsi ilə yanaşı, siyasi, iqtisadi, enerji və nəqliyyat istiqamətlərində əməkdaşlığın inkişaf etdirilməsi də Türk Dövlətləri Təşkilatının beynəlxalq rolunun daha da güclənməsinə mühüm töhfə verə bilər.

Paylaş:

Baxılıb: 384 dəfə

Xəbər lenti

Hamısına bax