YAP siyasi sistemin aparıcı qüvvəsidir

Bakı:

30 °C

35 %

5 m/s

Əlaqə

AZ RU EN

Ana səhifə / Arxiv / YAP siyasi sistemin aparıcı qüvvəsidir

YAP siyasi sistemin aparıcı qüvvəsidir

09.09.2026 [22:12]

Sentyabrın 9-da Yeni Azərbaycan Partiyası (YAP) Ordubad rayon təşkilatının XIII konfransı keçirilib.

Əvvəlcə xalqımızın Ümummilli Lideri Heydər Əliyevin abidəsi ziyarət olunub, önünə gül dəstələri düzülüb.

Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.

Konfransda YAP Ordubad rayon təşkilatının sədri Ehtibar İsmayılov hesabat məruzəsi ilə çıxış edib. O bildirib ki, Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin rəhbərliyi ilə həyata keçirilən məqsədyönlü siyasət nəticəsində ölkəmiz dünyanın ən nüfuzlu ölkələrindən birinə çevrilib.

E.İsmayılov qeyd edib ki, ötən müddət ərzində YAP Ordubad rayon təşkilatı qarşıya qoyulan vəzifələrin icrası istiqamətində fəaliyyətini ardıcıl olaraq davam etdirib.

Konfransda Ordubad Rayon İcra Hakimiyətinin başçısı Nurlan Hacıyev çıxış edərək Azərbaycanın əldə etdiyi nailiyyətlərdən bəhs edib. O, Yeni Azərbaycan Partiyasının Azərbaycanın davamlı inkişafının təmin edilməsində və siyasi sistemin möhkəmləndirilməsində mühüm rol oynadığını vurğulayıb.

Milli Məclisin deputatı Vüqar Rəhimzadə çıxışında Azərbaycanın ərazi bütövlüyünün və suverenliyinin bərpasının tarixi əhəmiyyətini qeyd edib. Onun sözlərinə görə, qalib Azərbaycan regionda yeni reallıqlar yaradıb. V.Rəhimzadə bu tarixi nailiyyətin Prezident İlham Əliyevin qətiyyətli siyasətinin nəticəsi olduğunu diqqətə çatdırıb.

Daha sonra YAP Mərkəzi Aparatının Siyasi təhlil, maarifləndirmə və seçkilərlə iş şöbəsi müdirinin müavini Asif İmaməliyev çıxış edərək Yeni Azərbaycan Partiyasının Azərbaycanın ictimai-siyasi həyatında aparıcı rolundan bəhs edib, partiyanın ölkənin inkişafına verdiyi töhfələri diqqətə çatdırıb. O vurğulayıb ki, bu gün sıralarında 700 mindən çox üzvü birləşdirən YAP cəmiyyətin aparıcı siyasi qüvvəsi kimi çıxış edir: “Qarşıya qoyulan məqsədlərin reallaşdırılmasında yerli təşkilatların fəaliyyəti də mühüm əhəmiyyət daşıyır”.

Ordubad şəhər 1 nömrəli tam orta məktəbin direktoru, Azərbaycanın Əməkdar müəllimi Könül İsmayılova və gənc fəal Rəvanə Seyidova gənc nəslin ictimai-siyasi proseslərə cəlb olunmasının, onların təşəbbüskarlığının dəstəklənməsinin önəmindən bəhs ediblər.

Konfransda YAP Ordubad rayon təşkilatının hesabat dövrü ərzindəki fəaliyyəti qənaətbəxş qiymətləndirilib və Yeni Azərbaycan Partiyasının VIII Qurultayına nümayəndələr seçilib.

Tədbir Yeni Azərbaycan Partiyasının himninin səsləndirilməsi ilə başa çatıb.

Paylaş:

Baxılıb: 297 dəfə